Miño - REGULAMENTO ORGÁNICO DO CONCELLO DE MIÑO

TÍTULO PRELIMINAR - DISPOSICIÓNS XERAIS

TÍTULO I - DOS GRUPOS POLÍTICOS MUNICIPAIS

TÍTULO II - ESTATUTO DOS MEMBROS DA CORPORACIÓN

CAPÍTULO I - DEREITOS

CAPÍTULO II - DEBERES E RESPONSABILIDADES

CAPÍTULO III - DA ADQUISICIÓN, SUSPENSIÓN E PERDA DA CONDICIÓN DE CONCELLEIRO OU CONCELLEIRA

TÍTULO III - DA ORGANIZACIÓN MUNICIPAL

CAPÍTULO I - DOS ÓRGANOS NECESARIOS

Sección 1ª - Constitución, vixencia e finalización do mandato corporativo

Sección 2ª - O alcalde ou a alcaldesa

Sección 3ª - Dos e das tenentes de alcalde

Sección 4ª - Do Pleno

Sección 5ª - Da Xunta de Goberno Local

CAPÍTULO II - DOS ÓRGANOS COMPLEMENTARIOS

Sección 1ª - Das concellerías delegadas

Sección 2ª - Das Comisións Informativas Permanentes e do seguimento da xestión do alcalde ou da alcaldesa, Xunta de Goberno Local e concelleiros e concelleiras que exerzan delegacións

Goberno e concelleiros e concelleiras que exerzan delegacións

Sección 3ª - Da Comisión Especial de Contas

Sección 4ª - Das Comisións Informativas Especiais

Sección 5ª - Da Xunta de Portavoces

TÍTULO IV - DO FUNCIONAMENTO DOS ÓRGANOS DE GOBERNO

CAPÍTULO I - FUNCIONAMENTO DO PLENO

Sección 1ª - Clases de sesións e requisitos anteriores á súa realización

Sección 2ª - Dos debates

Sección 3ª - Das votacións

Sección 4ª - Do control e fiscalización polo Pleno da actuación dos demais órganos de goberno

Sección 5ª - Das actas

CAPÍTULO II - FUNCIONAMENTO DA XUNTA DE GOBERNO LOCAL

CAPÍTULO III - FUNCIONAMENTO DAS COMISIÓNS INFORMATIVAS PERMANENTES E DE SEGUIMENTO DA XESTIÓN DO ALCALDE OU ALCALDESA, XUNTA DE GOBERNO LOCAL E CONCELLEIROS E CONCELLEIRAS QUE EXERZAN DELEGACIÓNS, ASÍ COMO DAS COMISIÓNS INFORMATIVAS ESPECIAIS E DA COMISIÓN ESPECIAL DE CONTAS

CAPÍTULO IV - FUNCIONAMENTO DA XUNTA DE PORTAVOCES

DISPOSICIÓN FINAL

Artigo 1

O Concello de Miño, no exercicio das potestades regulamentaria e de autoorganización que lle recoñece a Lei 7/1985, do 2 de abril, reguladora das bases do réxime local [artigos 4.1 a), 20.1 d.) e 3], e a Lei 5/1997 do 22 de xullo, de Administración local de Galicia [artigos 6.1.a) e 59.1], e con suxeición a elas, promove polo presente regulamento, a súa organización e réxime de funcionamento dos órganos necesarios e complementarios que nel se establecen.

Artigo 2

A organización e funcionamento interno do concello axustarase á seguinte orde xerárquica de fontes normativas:

a) Lei 7/1985 de 2 de abril, reguladora das bases do réxime local e demais lexislación básica que se dite en diante.

b) Lei 5/1997, do 22 de xullo, de Administración local de Galicia.

c) O Regulamento orgánico municipal.

d) Real decreto 2568/1986, do 28 de novembro, polo que se aproba o Regulamento de organización, funcionamento e réxime xurídico das entidades locais, para aquelas materias nas que resulte insuficiente a normativa establecida no Regulamento orgánico, polo que este ten preferencia sobre aquel.

Artigo 3

Correspóndelle ao pleno ditar as instrucións interpretativas e aclaratorias da normativa sinalada no artigo anterior, para a súa aplicación no municipio.

Artigo 4

1 - Os concelleiros e as concelleiras, para os efectos da súa actuación corporativa, constituiranse en grupos, que se corresponderán cos partidos políticos, federacións, coalicións ou agrupacións que obtivesen postos na Corporación.

2 - Cada partido político, federación, coalición ou agrupación constituirá un único grupo.

3 - Ninguén pode pertencer simultaneamente a máis dun grupo.

Artigo 5

1 - O mínimo de concelleiros e concelleiras para constituír un grupo é de dous.

2 - Integraranse, en todo caso, no grupo mixto, os membros dos partidos políticos, federacións, coalicións ou agrupacións que non obtivesen un mínimo de dous escanos.

No suposto de que non existise grupo mixto, este quedará constituído polo membro do partido político, federación, coalición ou agrupación que obtivese un só escano.

Artigo 6

1 - Os grupos políticos constituiranse mediante escrito dirixido ao presidente e subscrito por todos os seus integrantes, que se presentará na Secretaría Xeral da Corporación, dentro dos cinco días hábiles seguintes á constitución da Corporación.

Se algún concelleiro ou concelleira non asinase o escrito de constitución do grupo, isto non impedirá a súa constitución, e os non asinantes integraranse no grupo mixto.

2 - No mesmo escrito de constitución farase constar a designación do voceiro ou da voceira do grupo, podendo tamén designarse suplentes.

Artigo 7

1 - Da constitución dos grupos políticos e dos seus integrantes e voceiros ou voceiras, a presidencia daralle conta ao Pleno na primeira sesión que se realice logo de cumprirse o prazo previsto anteriormente.

Artigo 8

1 - Os membros da Corporación que adquiran a súa condición con posterioridade á sesión constitutiva, deberanse incorporar ao grupo correspondente á lista na que foron elixidos ou, se é o caso, ao grupo mixto, segundo o establecido nos artigos cuarto e quinto. En calquera suposto disporán dun prazo de cinco días hábiles, que comezará a contar desde que tomen posesión do seu cargo, para acreditar a incorporación ao grupo que lles corresponda mediante escrito dirixido á Presidencia e asinado, igualmente, polo correspondente voceiro ou voceira.

2 - De non se producir a súa integración na forma prevista na alínea anterior, e agás forza maior, integraranse automaticamente no grupo correspondente á lista na que saíron elixidos ou elixidas.

Artigo 9

1 - O voceiro ou a voceira de cada grupo será a persoa encargada de intervir, normalmente, na deliberación dos asuntos. Non obstante, no propio escrito de designación, poderase facer constar que, por razón das materias, sexa delegada a exposición dos asuntos, votos particulares, etc¿, a prol doutros membros do grupo.

2 - As modificacións respecto dos voceiros ou suplentes serán efectivas desde a presentación do escrito no Rexistro xeral, dando conta dela ao Pleno na primeira sesión que teña lugar.

3 - O grupo mixto poderá establecer unha rolda rotativa para o desempeño da función de voceiro ou voceira, ou ben distribuír entre os seus compoñentes o tempo que lle corresponda ao grupo.

Artigo 10

Correspóndelles aos grupos políticos designar, mediante escrito do seu voceiro ou voceira dirixido á Presidencia, a aqueles dos seus compoñentes que os deban representar en todos os órganos colexiados integrados por membros da Corporación pertencentes aos diversos grupos.

Artigo 11

1 - Os grupos políticos disporán, na Casa do Concello ou nun inmoble próximo pertencente ao Concello, dun local ou despacho para se reunir de maneira independente e recibir visitas da cidadanía. Os devanditos locais estarán dotados dunha infraestrutura en medios materiais informáticos e de comunicación necesarios, en consonancia coa capacidade económica e técnica do Concello.

2 - Logo da solicitude á Alcaldía, os grupos políticos poderán facer uso de locais da Corporación para realizaren reunións e sesións de traballo con asociacións para a defensa dos intereses colectivos, xerais ou sectoriais da poboación. Estas xuntanzas non se permitirán se no salón de sesións coinciden con sesións do Pleno, e respecto do resto dos locais municipais cando a dispoñibilidade dos espazos para outros actos político-administrativos da Corporación o impida, se estas últimas estivesen xa programadas ou concertadas con anterioridade á solicitude do grupo municipal demandante, salvo razóns de urxencia que o impidan.

Artigo 12

1 - O Pleno da Corporación, con cargo aos orzamentos municipais dela, poderá asignarlles aos grupos políticos unha dotación económica que deberá contar cun compoñente fixo, idéntico para todos os grupos, e outro variable, en función do número de membros de cada un deles, dentro dos límites que, se é o caso, se establezan con carácter xeral nas leis de orzamentos xerais do Estado, e sen que poidan destinarse ao pagamento de remuneracións do persoal de calquera tipo ao servizo da Corporación ou á adquisición de bens que poidan constituír activos fixos de carácter patrimonial.

2 - Os grupos políticos deberán levar unha contabilidade específica da dotación á que se refire o parágrafo anterior, que porán ao dispor do Pleno da Corporación sempre que este llelo pida.

Artigo 13

Os grupos políticos disporán, na Casa do Concello, ou no inmoble onde teñan o local ou despacho para se reunir, dunha caixa do correo para a correspondencia oficial interior e maila de procedencia externa. As comunicacións ou mensaxes que se poidan recibir con destino a eles por calquera outro medio (avisos telefónicos, fax, correo electrónico, etc¿), seranlles comunicadas por correo electrónico ou telefonicamente.

Artigo 14

Os concelleiros e as concelleiras gozarán, unha vez que tomen posesión do seu cargo, dos honores, prerrogativas e distincións propias que se establecen nas leis do Estado e da Comunidade Autónoma.

Artigo 15

1 - Os concelleiros e as concelleiras terán o dereito de asistir con voz e voto ás sesións do Pleno da Corporación e ás das comisións das que formen parte. Así mesmo, poderán asistir, sen dereito a voto, ás sesións das comisións das que non formen parte, do xeito que se regula no artigo 138.1 do presente regulamento.

2 - Os concelleiros e as concelleiras terán dereito a formar parte, polo menos, dunha comisión, e a exercer as facultades e desempeñar as funcións que este regulamento lles atribúe.

Artigo 16

1 - Todos os concelleiros e todas as concelleiras terán dereito a obter do alcalde ou alcaldesa ou presidente/a da Xunta de Goberno Local cantos antecedentes, datos ou información consten en poder dos servizos da Corporación e sexan necesarios para desenvolver a súa función.

2 - O pedimento de acceso ás informacións entenderase concedido por silencio administrativo no caso de que o/a presidente/a ou a Xunta de Goberno Local non diten resolución ou acordo denegatorio e sexa notificado persoalmente ao concelleiro interesado ou á concelleira interesada no termo dos cinco días naturais contados desde a data de presentación da solicitude no Rexistro de Entrada. En todo caso, a denegación do acceso á documentación informativa deberase facer a través de resolución ou acordo motivado.

3 - Malia o anteriormente disposto, os servizos da Corporación facilitaranlles directamente a información aos membros da Corporación nos seguintes casos:

a) Cando se trate do acceso de membros da Corporación que teñan delegacións ou responsabilidades de xestión do acceso á información para exercelas.

b) Cando se trate do acceso de calquera membro da Corporación á información e maila documentación correspondente aos asuntos que deban ser tratados polos órganos colexiados dos que formen parte, así como ás resolucións aos acordos adoptados por calquera órgano da Corporación.

c) Cando se trate do acceso de membros da Corporación á información ou á documentación da entidade local que sexa de libre acceso para a cidadanía.

4 - Co fin de facilitar aos concelleiros e ás concelleiras a información precisa para o desenvolvemento da súa función, e sen prexuízo do seu dereito a formular peticións de información concretas, o equipo de goberno remitirá no prazo de quince días, a contar dende a finalización de cada trimestre natural, informe detallado por escrito do estado da execución orzamentaria. O citado documento virá acompañado, así mesmo, de informe emitido da Intervención municipal sobre a súa realidade e certeza.

5 - Así mesmo, e coa mesma periodicidade que no punto anterior, o alcalde ou alcaldesa facilitará aos diferentes grupos municipais, informe detallado sobre as actuacións levadas a cabo polos diferentes órganos colexiados nos que o Concello de Miño tivera representación. O citado informe será acompañado das actas de reunión ou xuntanzas que tiveran lugar.

Artigo 17

1 - A consulta e o exame concreto dos expedientes, libros e documentación en xeral rexerase polas seguintes normas:

a) A consulta xeral de calquera expediente ou antecedentes documentais poderase realizar, ben no arquivo xeral ou na dependencia onde se atope, ben mediante a entrega deles ou de copia ao membro da Corporación interesado para que os poida examinar no despacho ou salas reservadas aos membros da Corporación ou onde estimen conveniente.

b) En ningún caso os expedientes, libros ou documentación poderán saír da Casa do Concello ou das correspondentes dependencias e oficinas locais.

c) A consulta dos libros das actas e mais os libros de resolucións da alcaldía deberase efectuar no arquivo ou na Secretaría xeral.

d) O exame de expedientes sometidos á sesión poderá facerse unicamente no lugar no que se atopen de manifesto a partir da convocatoria. Non obstante, entregarase aos voceiros e ás voceiras dos grupos políticos integrantes da Corporación, unha carpeta que conterá copia da proposta e informe/s en que se fundamente esta, respecto dos asuntos incluídos na convocatoria, iso sen prexuízo de que o expediente completo estea a disposición de todos os membros da Corporación para o seu exame.

2 - O dereito a consulta inclúe o dereito a obter copia, entendendo por dereito á consulta tanto o acceso directo dos concelleiros e das concelleiras á información previsto no apartado 3 do artigo anterior, como a autorización expresa ou presunta outorgada de conformidade co establecido no apartado 2 do mesmo artigo.

3 - Tratarase en todos os casos, e particularmente naqueles en que a documentación sexa voluminosa, de proceder o máis selectivamente posible de forma que, sen mingua do dereito á información de todos os concelleiros e todas as concelleiras, só se reproduzan os documentos imprescindibles, debendo quedar constancia no departamento xestor do expediente, mediante a correspondente dilixencia.

Artigo 18

Os membros da Corporación terán dereito en ¿exercicio da súa función de control" a ser informados previamente de cantos actos públicos ou privados se celebren no municipio e coa participación económica do Concello de Miño, para que poidan participar neles.

Artigo 19

1 - Os membros da Corporación percibirán retribucións polo exercicio dos seus cargos cando os desempeñen con dedicación exclusiva e, neste caso, serán dados de alta no Réxime xeral da Seguridade Social, asumindo a Corporación o pagamento das cotas empresariais que corresponda, salvo o disposto no artigo 74 da Lei 7/1985, do 2 de abril, reguladora das bases do réxime local para a situación de servizos especiais.

No suposto destas retribucións, a súa percepción será incompatíbel con outras retribucións con cargo aos orzamentos das administracións públicas e dos entes, organismos ou empresas delas dependentes, así como para o desenvolvemento doutras actividades, todo iso nos termos da Lei 53/1984, do 26 de decembro, de incompatibilidades do persoal ao servizo das administracións públicas.

2 - Os membros da Corporación que desempeñen os seus cargos con dedicación parcial por realizar funcións de presidencia, vicepresidencia ou ostentar delegacións, ou desenvolver responsabilidades que así o requiran, percibirán retribucións polo tempo de dedicación efectiva a estas, e nestes casos serán igualmente dados de alta no Réxime xeral da Seguridade Social en tal concepto, asumindo a Corporación as cotas empresariais que corresponda, salvo o disposto no artigo 74 da Lei 7/1985, do 2 de abril, reguladora das bases do réxime local para os membros en situación de servizos especiais. Estas retribucións non poderán superar en ningún caso os límites que se fixen, no seu caso, nas Leis de orzamentos xerais do Estado. Nos acordos plenarios de determinación dos cargos que leven parella esta dedicación parcial e das retribucións destes, deberase conter o réxime da dedicación mínima necesaria para a percepción destas retribucións que, en todo caso, non poderá ser inferior a 20 horas semanais.

Os membros da Corporación que sexan persoal das administracións públicas e dos entes, organismos e empresas delas dependentes soamente poderán percibir retribucións pola súa dedicación parcial ás súas funcións fóra da súa xornada nos seus respectivos centros de traballo, nos termos sinalados no artigo 5 da Lei 53/1984, do 26 de decembro, sen prexuízo do dereito que lles asiste a gozar de permisos polo tempo indispensable para o desempeño do cargo electivo de concelleiro ou concelleira.

Para os efectos do disposto no artigo 37.3.d) do Estatuto dos traballadores e no artigo 30.2 da Lei 30/1984, enténdese por tempo indispensable para o desempeño do cargo electivo dunha Corporación local, o necesario para a asistencia ás sesións do Pleno da Corporación ou das comisións, e atención ás delegacións de que forme parte ou que desempeñe o/a interesado/a.

Artigo 20

1 - O Pleno corporativo, por proposta da presidencia, determinará, dentro da consignación global contida para este fin no orzamento e de conformidade coas limitacións establecidas na normativa vixente, a relación dos cargos da Corporación que poderán desempeñarse en réxime de dedicación exclusiva ou parcial, e con dereito a retribución, así como as contías que lles correspondan a cada un deles tendo en conta o seu grao de responsabilidade.

2 - Unha vez adoptado o acordo, corresponde ao alcalde ou á alcaldesa determinar os membros da Corporación que realizarán as súas funcións en réxime de dedicación exclusiva ou parcial.

3 - O nomeamento dun membro da Corporación para un destes cargos só suporá a aplicación do réxime de dedicación exclusiva ou parcial se é aceptado expresamente por aquel, e esta circunstancia seralle comunicada ao Pleno na seguinte sesión ordinaria. A aceptación deberase producir no prazo dos dez días desde a notificación á persoa interesada. Transcorrido o devandito prazo, entenderase que non acepta o cargo.

Artigo 21

1 - Todos os membros da Corporación, incluídos os que desempeñen cargos en réxime de dedicación exclusiva ou parcial, percibirán indemnizacións polos gastos ocasionados polo exercicio do cargo, cando sexan efectivos, e logo da súa xustificación documental, segundo as normas de aplicación xeral nas administracións públicas, e as que en desenvolvemento delas aprobe o Pleno corporativo.

2 - Só os membros da Corporación que non teñan dedicación exclusiva ou parcial percibirán asistencias pola concorrencia efectiva ás sesións dos órganos colexiados dos que formen parte, na contía que sinale o Pleno dela. Non obstante, todos poderán percibir esta clase de indemnizacións cando se trate de órganos reitores de organismos dependentes da Corporación local que teñan personalidade xurídica independente, de consellos de administración de empresas con capital ou control municipal.

Artigo 22

1 - Todos os membros da Corporación, incluídos os que desempeñen cargos en réxime de dedicación exclusiva ou parcial, terán dereito a percibir indemnizacións por desprazamento, manutención, aloxamento e outros gastos ocasionados como consecuencia directa do exercicio do cargo.

2 - A contía deste tipo de indemnizacións fixarase polo Pleno do Concello, establecéndose a forma de percepción e os termos da súa xustificación nas bases de execución do orzamento anual.

3 - A contía e regulación das indemnizacións por desprazamento, aloxamento e manutención estableceranse nas bases de execución dos orzamentos, e deberán publicarse no Boletín Oficial da Provincia, no taboleiro de anuncios da Casa de Concello e na páxina web municipal.

Artigo 23

1 - A Corporación consignará no seu orzamento as retribucións, indemnizacións, compensacións e asistencias ás que se fan referencia nos artigos anteriores.

2 - As cantidades acreditadas aboaranse, en termos xerais, unha vez ao mes, sen prexuízo de que o Concello adiante cantidades a xustificar no caso das indemnizacións e outros gastos.

3 - Publicaranse integramente no Boletín Oficial da Provincia, taboleiro de anuncios da Corporación e páxina web municipal, os acordos plenarios referentes a retribucións brutas dos cargos con dedicación exclusiva e parcial e réxime de dedicación destes últimos, indemnizacións e asistencias, así como as Resolucións da Alcaldía determinando os membros da Corporación que realizarán as súas funcións en réxime de dedicación exclusiva ou parcial.

Publicaranse igualmente no Boletín Oficial da Provincia, taboleiro de anuncios da Corporación e páxina web municipal, o nomeamento, características e retribucións do persoal eventual.

4 - Mensualmente publicaranse na páxina web municipal as cantidades percibidas polos membros da Corporación en concepto de asistencias a órganos colexiados.

Artigo 24

Os concelleiros e as concelleiras están obrigados á observación deste regulamento, e a respectar a orde e mais a cortesía corporativa.

Artigo 25

Os concelleiros e as concelleiras non poderán invocar ou facer uso da súa condición de corporativos para o exercicio de actividade mercantil, industrial ou profesional.

Artigo 26

1 - Os concelleiros e as concelleiras deberán observar en todo momento as normas sobre incompatibilidades establecidas na lexislación electoral, e deberán poñer en coñecemento da Corporación calquera feito que puidese constituír causa dela.

2 - Para tal efecto, unha vez constituídos os órganos de estudo, informe ou consulta e seguimento da xestión aos que se refire o artigo 20 da Lei 7/1985 do 2 de abril, na nova redacción dada pola Lei 11/1999 do 21 de abril, é dicir, as comisións informativas correspondentes, aquela comisión á que lle sexan atribuídos os asuntos de réxime interior, deberá elevar, no prazo dun mes desde a súa constitución, proposta ao Pleno da Corporación sobre a situación de incompatibilidade de cada concelleiro ou concelleira.

3 - Declarada a incompatibilidade polo Pleno, a persoa afectada por tal declaración deberá optar no prazo dos dez días seguintes a aquel no que reciba a notificación da súa incompatibilidade, entre a renuncia á condición de concelleiro ou concelleira ou o abandono da situación que dea orixe á devandita incompatibilidade.

4 - Transcorrido o devandito prazo sen se exercitar a opción, entenderase que a persoa afectada renunciou ao seu posto de concelleiro ou concelleira, debendo declararse polo Pleno corporativo a vacante correspondente e poñer o feito en coñecemento da Administración electoral, para os efectos da expedición da credencial ao candidato ou á candidata ou, se é o caso, ao suplente da mesma lista a quen lle corresponda.

5 - A mesma comisión informará nos supostos de calquera alteración na declaración presentada para os efectos de incompatibilidade polos concelleiros e polas concelleiras, ou cando se presenten denuncias ao respecto.

Artigo 27

1 - Os concelleiros e as concelleiras terán o deber de asistir ás sesións do Pleno da Corporación e ás das comisións das que formen parte, agás xusta causa que llelo impida, que deberán comunicarlle, se é posible, coa antelación necesaria á presidencia da Corporación.

2 - En todo caso, se se ausentasen do termo municipal por máis de oito días, deberán poñelo en coñecemento do señor alcalde ou da señora alcaldesa, facéndoo por escrito, ben persoalmente ou a través do voceiro ou voceira do grupo político, concretando, en calquera caso, a duración previsible da ausencia.

Artigo 28

Todos os concelleiros e todas as concelleiras teñen a obriga de gardar reserva en relación coas informacións que lles sexan facilitadas para facer posible o desenvolvemento das súas funcións, singularmente das que servirán de antecedentes para decisións que aínda se atopen pendentes de adopción, así como para evitar a reprodución da documentación que lles poida ser facilitada, en orixinal ou copia, para o seu estudo. En todo caso, deberán respectar a confidencialidade da información á que teñen acceso, se o feito de publicalo pode prexudicar os intereses do concello ou de terceiros.

Artigo 29

1 - Os membros da Corporación están suxeitos a responsabilidade civil e penal polos actos ou omisións realizados no exercicio do seu cargo. As responsabilidades esixiránselles ante os tribunais de xustiza competentes e tramitaranse polo procedemento ordinario aplicable.

2 - Son responsables dos acordos municipais os membros da Corporación que os votasen favorablemente.

3 - A Corporación poderá esixir a responsabilidade dos seus membros, cando por dolo ou culpa grave, causasen danos e perdas á Corporación ou a terceiros, se estes tivesen que ser indemnizados por aquela.

Artigo 30

1 - Os concelleiros e as concelleiras deberanse abster de participar na deliberación, votación, decisión e execución de calquera asunto se concorren neles algunha das causas ás que se refire a lexislación sobre procedemento administrativo e a de contratos das administracións públicas. Nestes casos, a persoa interesada deberá abandonar o salón de sesións unha vez que a Alcaldía-Presidencia lea o punto da orde do día que se vai tratar, e respecto do que el ou ela é interesado ou interesada.

2 - A actuación dos concelleiros e das concelleiras nos que concorran as devanditas causas levará consigo, se foi determinante, a invalidez dos actos nos que interviñeron.

Artigo 31

1 - Todos os membros da Corporación, antes de tomar posesión como concelleiros e concelleiras, e como requisito imprescindible, presentarán ante a Secretaría xeral do Concello:

- Declaración sobre causas de posible incompatibilidade e sobre calquera actividade que lles proporcione ou poida proporcionar ingresos económicos.

- Declaración dos seus bens patrimoniais e da participación en sociedades de todo tipo, con información das sociedades por elas participadas.

2 - As declaracións de actividades e de bens, efectuadas obrigatoriamente nos modelos aprobados polo Pleno, se presentarán tamén:

- Con ocasión do cesamento no cargo.

- Ao final do mandato.

- Cando se modifiquen as circunstancias de feito, de acordo co previsto no art. 34.2.

3 - As declaracións presentaranse ante o secretario/a da Corporación, que as asinará na súa calidade de fedatario público municipal, xunto coa persoa interesada, facendo constar, igualmente, a data de anotación e número de orde correspondente ao Libro de rexistro de intereses.

De todas as declaracións que se presenten se entregará á persoa interesada unha copia debidamente dilixenciada.

4 - De conformidade co establecido no artigo 75.7 da Lei 7/1985, do 2 de abril, reguladora das bases do réxime local, os membros da Corporación respecto dos que, en virtude do seu cargo, resulte ameazada a súa seguridade persoal ou a dos seus bens ou negocios, a dos seus familiares, socios/as , empregados/as ou persoas con quen tiveran relación económica ou profesional, poderán realizar a declaración dos seus bens e dereitos patrimoniais ante o secretario/a da Deputación provincial da Coruña ou, se é o caso, ante o órgano competente da Xunta de Galicia, para a súa inscrición no Rexistro Especial de Intereses.

Neste suposto, achegarán ao secretario/a da Corporación, unha certificación simple e sucinta, acreditativa de ter cumprimentadas as súas declaracións, e que estas están inscritas no Rexistro Especial de Intereses, expedida polo/a funcionario/a encargado/a del.

A citada certificación deberá presentarse nos mesmos supostos previstos nas alíneas 1 e 2 do presente artigo.

Artigo 32

1 - As declaracións formuladas inscribiranse nos Rexistros de Intereses constituídos no Concello de Miño:

- Libro 1º: Rexistro de bens patrimoniais

- Libro 2º: Rexistro de incompatibilidades e de actividades

2 - Ambos os dous rexistros están residenciados na Secretaría xeral. A súa custodia e dirección corresponde ao/á secretario/a da Corporación.

3 - As inscricións en ambos os dous rexistros referiranse a cada declaración formulada por orde correlativa de presentación, e conterán as referencias aos seguintes extremos:

- Número de orde

- Nome e apelidos da persoa declarante

- Causa da declaración, segundo o establecido no artigo 30 de presente regulamento

- Data de presentación ou inscrición no rexistro

- Documento no que se presenta

Artigo 33

1 - Os rexistros previstos no artigo anterior teñen carácter público. Para o acceso aos datos contidos neles rexerán as seguintes regras:

Calquera persoa cidadá, a título individual ou en representación de persoa xurídica que desexe coñecer as declaracións, deberá presentar no Rexistro xeral ou polos medios do artigo 38 da Lei 30/1992, unha solicitude dirixida ao secretario/a da Corporación, na que se faga constar o nome e apelidos da persoa interesada e, de ser o caso, da persoa que o represente, lugar que sinala para os efectos de notificacións, feitos, razóns e petición na que se indique o nome do membro corporativo sobre cuxa declaración se interesa consulta. No serán admisibles as solicitudes xenéricas.

2 - O/a secretario/a da Corporación, no prazo de cinco días hábiles desde a presentación do escrito do solicitante, e mediante comparecencia da persoa interesada na propia secretaría municipal, deberá exhibir as declaracións correspondentes.

3 - O/a secretario/a da Corporación informará ao membro corporativo do que se solicite o acceso ao rexistro, da petición formulada e da comparecencia, se é o caso, para o seu coñecemento.

4 - As regras contidas nas alíneas deste artigo son de aplicación aos membros da Corporación.

Artigo 34

1 - Non se poderá tomar posesión como concelleiro ou concelleira, sen ter presentado a declaración sobre causas de posible incompatibilidade e sobre calquera actividade que proporcione ou poida proporcionar ingresos económicos, a declaración de bens patrimoniais e da participación en sociedades de todo tipo, con información das sociedades por elas participadas, obrigatoriamente nos modelos aprobados polo Pleno da Corporación.

As declaracións presentaranse aínda que xa se presentasen no mandato anterior.

2 - Durante o período de mandato, os concelleiros e as concelleiras deberán formular a correspondente declaración no modelo aprobado polo Pleno, no suposto de que se produzan variacións substanciais respecto do consignado na declaración de bens patrimoniais e da participación en sociedades ou na declaración sobre causas de posible incompatibilidade e actividades, relacionando as alteracións producidas. O prazo para comunicar as citadas variacións será dun mes a contar desde o seguinte a aquel no que se teñan producidas.

3 - Igualmente, os concelleiros e as concelleiras deberán presentar as declaracións no prazo de dez días desde o cesamento no cargo.

Cando o suposto sexa por finalización do mandato, o prazo contarase a partir do momento en que os concelleiros e as concelleiras cesen no exercicio das súas funcións para a administración ordinaria, por toma de posesión dos seus sucesores.

No suposto de renuncia, desde que se tome coñecemento do escrito de renuncia polo Pleno da Corporación e se declare a vacante.

No suposto de perda da condición de concelleiro ou concelleira por incompatibilidade, desde que se tome coñecemento do escrito de renuncia polo Pleno da Corporación ou desde que o Pleno declare a vacante, segundo se establece no artigo 26.4 do presente regulamento.

No suposto de perda da condición de concelleiro ou concelleira por decisión xudicial, desde que se tome coñecemento polo Pleno da Corporación e se declare a vacante.

4 - Cando os señores concelleiros e as señoras concelleiras non presenten as declaracións nos prazos establecidos nas alíneas anteriores, o/a secretario/a da Corporación efectuará o correspondente requirimento, outorgando un novo prazo de quince días, e, de seguir co incumprimento, darase coñecemento deste feito na primeira sesión do pleno que teña lugar, e publicarase na páxina web municipal.

5 - Publicarase na páxina web municipal e no BOP a data de presentación das declaracións de bens e actividades así como as variacións das mesmas.

A mesma publicación levarase a cabo coas declaracións presentadas con ocasión do cesamento no cargo ou ao final do mandato.

Artigo 35

1 - As declaracións inscritas nos Rexistros de Intereses serán arquivadas segundo a orde da súa inscrición, e conservadas e custodiadas como documento do Rexistro de Intereses.

2 - Ao terminar o mandato da Corporación, as declaracións presentadas serán encadernadas e remitidas ao arquivo municipal.

Artigo 36

1 - O concelleiro ou concelleira proclamado/a electo/a adquirirá a condición plena de concelleiro/a polo cumprimento conxunto dos seguintes requisitos:

a) Presentar na Secretaría xeral a credencial expedida pola Xunta Electoral de Zona.

b) Cubrir a súa declaración de bens, incompatibilidades e actividades, para a súa inscrición no Rexistro de Intereses.

c) Prestar na primeira sesión do Pleno á que asista, o xuramento ou promesa de acatar a Constitución.

Artigo 37

O concelleiro quedará suspendido nos seus dereitos, prerrogativas e deberes municipais, cando unha resolución xudicial firme condenatoria o comporte.

Artigo 38

O concelleiro ou a concelleira perderá a súa condición de tal polas seguintes causas:

1 - Por decisión xudicial firme que anule a elección ou a proclamación.

2 - Por falecemento ou incapacitación, declarada esta por decisión xudicial firme.

3 - Por extinción do mandato, sen prexuízo de que continúe nas súas funcións soamente para a administración ordinaria, ata a toma de posesión dos seus sucesores.

4 - Por renuncia, que se fará efectiva por escrito ante o Pleno da Corporación, producindo efectos a renuncia desde a presentación do escrito no Rexistro de Entrada do Concello.

5 - Por incompatibilidade, nos supostos e nas condicións establecidas na lexislación electoral.

Artigo 39

1 - O Concello é o órgano de goberno e administración do municipio, con carácter de Corporación de Dereito Público.

2 - Tendo en conta o establecido no artigo 20, alínea 1, letras a), b) e c) e artigo 116 da Lei 7/1985, do 2 de abril, reguladora das bases do réxime local e no artigo 59 da Lei 5/1997, do 22 de xullo, da Administración local de Galicia, son órganos necesarios do Concello de Miño os enumerados a continuación:

a) A Alcaldía

b) As tenencia de alcaldía

c) O Pleno

d) A Xunta de Goberno Local

e) As Comisións Informativas Permanentes.

f) A Comisión Especial de Contas

3 - Polo que se refire aos órganos contidos nas letras e) e f), e dado o seu carácter de órganos complementarios, aínda que de existencia obrigatoria, inclúese o seu tratamento no capítulo correspondente aos órganos complementarios.

Sección 1ª - Constitución, vixencia e finalización do mandato corporativo

Artigo 40

1 - O terceiro día anterior ao sinalado pola lexislación electoral para a sesión constitutiva dos concellos, os concelleiros e as concelleiras cesantes, tanto do Pleno como, se é o caso, da Xunta de Goberno Local, reuniranse en sesión convocada só para o efecto de aprobar a acta da derradeira sesión realizada.

2 - O/a secretario/a e o/a interventor/a tomarán as medidas precisas para que o día da constitución da nova Corporación local, se efectúe un arqueo e estean preparados e actualizados os xustificantes das existencias en metálico ou valores propios da Corporación, depositados na caixa municipal ou entidades bancarias, así como a documentación relativa ao Inventario do patrimonio da Corporación e dos seus organismos autónomos.

Artigo 41

1 - A Corporación constituirase en sesión pública o vixésimo día posterior a aquel no que teñan lugar as eleccións, ás doce horas na Casa do Concello, salvo que se presentase recurso contencioso-electoral contra a proclamación dos concelleiros electos ou das concelleiras electas, e neste caso constituirase o cuadraxésimo día posterior ás eleccións.

A convocatoria para a sesión constitutiva efectuarase polo alcalde ou alcaldesa en funcións coa seguinte orde do día:

1º Formación da Mesa de Idade

2º Xuramento ou promesa e toma de posesión do cargo de concelleiro ou concelleira

3º Elección de alcalde ou alcaldesa

4º Xuramento ou promesa e toma de posesión do cargo de alcalde ou alcaldesa

5º Cumprimento do establecido no artigo 36.2 do Real decreto 2568/1986, do 28 de novembro

2 - Para esta finalidade, constitúese unha Mesa de Idade integrada polas persoas elixidas de maior e menor idade, presentes no acto, actuando como secretario/a o/a que o sexa da Corporación.

3 - A Mesa comproba as credenciais presentadas ou credenciais da personalidade dos/as electos/as, baseándose nas certificacións que ao Concello remitise a Xunta Electoral de Zona.

Igualmente comprobará que se presentaron polas persoas electas as declaracións sobre causas de posible incompatibilidade e sobre calquera actividade que lles proporcione ou poida proporcionar ingresos económicos, así como a declaración dos seus bens patrimoniais.

A teor do establecido nos artigos 31.1, 33.2, e 36 do presente regulamento, os requisitos de presentación das credenciais e declaracións aos que se fixo referencia, son imprescindibles e, polo tanto, deberanse cumprir para tomar posesión do cargo de concelleiro ou concelleira.

4 - Realizada a operación anterior a Mesa declarará constituída a Corporación se concorre a maioría absoluta dos concelleiros electos e das concelleiras electas. No caso contrario realizarase sesión dous días despois, quedando constituída a Corporación, calquera que fose o número de concelleiros/as presentes. Se por calquera circunstancia non se puidese constituír a Corporación, procede a constitución dunha Comisión Xestora nos termos previstos pola lexislación electoral xeral.

Artigo 42

Dentro dos trinta días seguintes ao da sesión constitutiva, a alcaldía convocará a sesión ou sesións extraordinarias do Pleno da Corporación que sexan precisas, co fin de resolver sobre os seguintes puntos:

a) Periodicidade das sesións do Pleno e da Xunta de Goberno Local

b) Creación e composición das Comisións Informativas Permanentes, de seguimento e control

c) Nomeamentos dos representantes da Corporación nos órganos colexiados, que sexan competencia do Pleno

d) Coñecemento das resolucións da alcaldía en materia de nomeamentos das tenencias de alcaldía, membros da Xunta de Goberno Local, e presidencias das Comisións Informativas, así como das delegacións que a Alcaldía estime oportuno conferir

Artigo 43

1 - O mandato dos concelleiros e das concelleiras é de catro anos, contados a partir da data da súa elección.

2 - Unha vez rematado o seu mandato, os concelleiros e as concelleiras cesantes continuarán as súas funcións soamente para a administración ordinaria ata a toma de posesión das persoas que as sucedan, e en ningún caso poderán adoptar acordos para os que legalmente se requira unha maioría cualificada.

Sección 2ª - O alcalde ou a alcaldesa

Artigo 44

O alcalde ou a alcaldesa é o/a presidente/a da Corporación, dirixe o goberno e mais a administración municipal, e correspóndelle a presidencia de todos os órganos municipais.

A excepción das sesións do Pleno e da Xunta de Goberno Local, poderá delegar a presidencia dos demais órganos municipais.

Artigo 45

1 - De conformidade co establecido no artigo 21 da Lei 7/1985, do 2 de abril, reguladora das bases do réxime local, na nova redacción dada pola Lei 11/1999 do 21 de abril, o alcalde ou alcaldesa exerce as seguintes atribución:

a) Dirixir o goberno e mais a administración municipal.

b) Representar ao concello.

c) Convocar e presidir as sesións do Pleno, agás os supostos previstos na lei e na lexislación electoral xeral, da Xunta de Goberno Local e de calquera outro órgano municipal cando así se estableza en disposición legal ou regulamentaria, e decidir os empates co voto de calidade.

d) Dirixir, inspeccionar e impulsar os servizos e obras municipais.

e) Ditar bandos.

f) O desenvolvemento da xestión económica de acordo co orzamento aprobado, dispor gastos dentro dos límites da súa competencia, concertar operacións de crédito, agás as consideradas no artigo 177.5 do Texto refundido da Lei de facendas locais, sempre que aquelas estean previstas no orzamento e o seu importe acumulado dentro de cada exercicio económico non supere o 10 por cento dos seus recursos ordinarios, agás as de tesourería, que lle corresponderán cando o importe acumulado das operacións vivas en cada momento non supere o 15 por cento dos ingresos liquidados no exercicio anterior, ordenar pagamentos e render contas; todo isto de conformidade co disposto no texto refundido da Lei reguladora das facendas locais.

g) Aprobar a oferta de emprego público de acordo co orzamento e mais o cadro de persoal aprobados polo Pleno, aprobar as bases das probas para a selección do persoal e para os concursos de provisión de postos de traballo e distribuír as retribucións complementarias que non sexan fixas e periódicas.

h) Desempeñar a xefatura superior de todo o persoal, e acordar o seu nomeamento e sancións, incluída a separación do servizo do funcionariado da Corporación e o despedimento do persoal laboral, dándolle conta ao Pleno, nestes dous últimos casos, na primeira sesión que teña lugar. Esta atribución entenderase sen prexuízo do disposto nos artigos 99.1 e 3 da Lei 7/1985.

i) Exercer a xefatura da Policía municipal.

l) As aprobacións dos instrumentos do planeamento de desenvolvemento do planeamento xeral non expresamente atribuídas ao Pleno, así como a dos instrumentos de xestión urbanística e dos proxectos de urbanización.

m) O exercicio das accións xudiciais e administrativas e mais a defensa do concello nas materias propias da súa competencia, incluso cando as delegase noutro órgano, e, no caso de urxencia, en materias da competencia do Pleno, neste suposto dándolle conta a este na primeira sesión que realice para a súa ratificación.

n) A iniciativa para propoñerlle ao Pleno a declaración de lesividade nas materias da competencia da Alcaldía.

ñ) Adoptar persoalmente, e baixo a súa responsabilidade, nos casos de catástrofe ou de infortunio públicos ou grave risco deles, as medidas necesarias e axeitadas, dándolle conta inmediata ao Pleno.

o) Sancionar as faltas de desobediencia á súa autoridade ou por infracción das ordenanzas municipais, salvo nos casos nos que tal facultade lle sexa atribuída a outros órganos.

o) A aprobación dos proxectos das obras e dos servizos, cando sexa competente para a súa contratación ou concesión e estean previstos no orzamento.

p) O outorgamento das licenzas, salvo que as leis sectoriais llo atribúan expresamente ao Pleno ou á Xunta de Goberno Local.

q) Ordenar a publicación, execución e facer cumprir os acordos do Concello.

r) As demais que expresamente lle atribúan as leis e aquelas que a lexislación do Estado ou das Comunidades Autónomas lle asignen ao municipio e non atribúan a outros órganos municipais.

2 - Correspóndelle así mesmo á Alcaldía o nomeamento das tenencias de alcaldía.

3 - A Alcaldía pode delegar o exercicio das súas atribucións, agás as de convocar e presidir as sesións do Pleno e da Xunta de Goberno Local, decidir os empates co voto de calidade, a concertación das operacións de crédito, a xefatura superior de todo o persoal, a separación do servizo do funcionariado e o despedimento do persoal laboral, e mais as enunciadas nas alíneas a), e), l), m), n) e ñ) do número 1 deste artigo.

Non obstante, poderá delegar na Xunta de Goberno Local o exercicio das atribucións consideradas na alínea l).

Artigo 46

1 - As decisións da Alcaldía materializaranse formalmente mediante resolucións, que lles serán notificadas aos que teñan interese directo e lexítimo.

2 - As resolucións transcribiranse no libro de resolucións da Alcaldía que estará baixo a custodia da secretaría da Corporación, e que ten o carácter de público, polo que se deberán expedir as certificacións que del fosen solicitadas polos concelleiros e polas concelleiras ou por calquera outra persoa que teña interese directo.

Artigo 47

Para os efectos do control e fiscalización dos órganos do goberno por parte do Pleno, atribución prevista no artigo 22.2.a) da Lei 7/85, do 2 de abril, todos os luns remitirase aos voceiros dos grupos políticos municipais, copia das Resolucións ditadas pola Alcaldía ou concellerías con competencias delegadas durante a semana anterior, sen prexuízo de que os concelleiros e as concelleiras teñen o dereito a consultar, na Secretaría xeral e en horario laboral, o libro de resolucións.

Artigo 48

A Alcaldía, nos termos previstos no artigo 21.3 da Lei 7/1985, do 2 de abril (artigo 45.3 deste regulamento), poderá efectuar delegacións a prol da Xunta de Goberno Local, como órgano colexiado, nas tenencias de alcaldía, en membros da Xunta de Goberno Local e a prol de calquera concelleiro ou concelleira, do exercicio das súas atribucións.

Artigo 49

A Alcaldía pode efectuar delegacións xenéricas a prol das tenencias de alcaldía e dos concelleiros e das concelleiras que sexan membros da Xunta de Goberno Local.

As delegacións xenéricas, cando se confiran con esta expresión, referiranse a unha ou varias áreas ou materias determinadas e poderán abarcar tanto a facultade de dirixir os servizos correspondentes como a de xestionalos en xeral, incluída a facultade de resolver mediante actos administrativos que atinxan a terceiras persoas.

Artigo 50

1 - Poderá tamén a Alcaldía efectuar delegacións especiais en calquera concelleiro ou concelleira, para a dirección e xestión de asuntos determinados incluídos no artigo anterior. Neste caso, o concelleiro ou concelleira que exerza unha delegación xenérica terá a facultade de supervisar a actuación dos/as concelleiros/as con delegacións especiais para cometidos específicos incluídos na súa área.

2 - Estas delegacións especiais poderán ser de dous tipos:

a) Relativas a un proxecto ou asunto determinado. Neste caso a eficacia da delegación que poderá conter todas as facultades delegables da Alcaldía, incluída a de emitir actos que atinxan a terceiras persoas, limitarase ao tempo de xestión ou execución do proxecto.

b) Relativas a un determinado servizo, neste caso a delegación comprenderá a dirección interna dos servizos correspondentes, pero non poderá incluír a facultade de resolver mediante actos administrativos que afecten a terceiras persoas, que quedará reservada á Alcaldía ou Concellería con delegación xenérica na correspondente área.

Artigo 51

1 - Todas as delegacións serán realizadas mediante resolución da alcaldía, que conterá o ámbito dos asuntos aos que se refire a delegación, as facultades ou potestades que se deleguen, así como as condicións específicas do exercicio delas.

2 - A delegación requirirá, para ser eficaz, a súa aceptación por parte do/a concelleiro/a ou órgano delegado. Enténdese aceptada tacitamente se no termo dos tres días hábiles contados desde a notificación persoal, o/a concelleiro/a non fai manifestación expresa perante a Alcaldía de non aceptar a delegación. Todo isto sen prexuízo da preceptiva publicación no Boletín Oficial da Provincia, e da debida comunicación ao Pleno na primeira sesión que teña lugar.

3 - As delegacións, unha vez aceptadas, entenderanse vixentes mentres non sexan revogadas expresamente ou o órgano delegante avoque para si algún asunto concreto na forma establecida pola Lei 30/1992 do 26 de novembro.

4 - Nos documentos que deban asinar as concellerías delegadas no exercicio da delegación, farase constar a data da resolución da Alcaldía pola que se realizou a delegación.

5 - As delegacións efectuadas a prol da Xunta de Goberno Local producirán efecto desde o día seguinte ao da data da resolución, o mesmo que as modificacións posteriores. Isto sen prexuízo da súa publicación no Boletín Oficial da Provincia.

Artigo 52

Calquera modificación posterior das delegacións requirirá as mesmas formalidades seguidas para efectuar a delegación, tendo en conta que a modificación será efectiva desde o momento da notificación persoal á persoa interesada ou posta en coñecemento do órgano delegado.

Artigo 53

Se non se dispón outra cousa, o órgano delegante conservará as seguintes facultades de tutela en relación coa competencia delegada:

a) A de recibir información detallada da xestión da competencia delegada e dos actos ou disposicións emanados en virtude da delegación.

b) A de ser informado previamente á adopción de decisións de transcendencia.

c) Os actos ditados polo órgano delegado no exercicio das atribucións delegadas enténdense ditados polo órgano delegante, correspondéndolle a este, en consecuencia, a resolución dos recursos de reposición que se poidan interpoñer, salvo que na resolución de delegación expresamente se confira a resolución dos recursos de reposición contra os actos ditados polo órgano delegado.

Artigo 54

Ningún órgano poderá delegar nun terceiro as atribucións ou potestades recibidas por delegación doutro órgano.

Artigo 55

As tenencias de alcaldía e mais as concellerías delegadas responderán perante a Alcaldía do exercicio das facultades delegadas. Por isto deberán comparecer e dar conta da súa xestión cando sexan requiridos polo Pleno ou pola comisión informativa correspondente.

Artigo 56

A delegación de atribucións entenderase que é por termo indefinido, salvo que a resolución dispoña outra cousa, ou a temporalidade dela se derive da propia natureza da delegación.

Artigo 57

1 - A Alcaldía poderá, en calquera momento, revogar a delegación de funcións efectuada na Xunta de Goberno Local, nos membros da Xunta de Goberno Local ou en calquera concellería.

2 - A revogación deberase adoptar coas mesmas formalidades que as esixidas para o seu outorgamento, e producirá efectos desde o momento da notificación persoal á persoa interesada, ou posta en coñecemento do órgano delegado.

Artigo 58

1 - A Alcaldía poderá avocar en calquera momento a competencia delegada segundo a lexislación vixente sobre procedemento administrativo.

2 - No caso de revogar competencias delegadas, a Alcaldía poderá revisar as resolucións adoptadas polo órgano ou autoridade delegada nos mesmos casos e condicións establecidos para a revisión de oficio dos actos administrativos.

Sección 3ª - Dos e das tenentes de alcalde

Artigo 59

1 - Os e as tenente de alcalde serán libremente nomeadas e destituídas pola Alcaldía de entre os membros da Xunta de Goberno Local.

2 - O número de tenencias da Alcaldía non poderá exceder do número de membros da Xunta de Goberno Local.

3 - Os nomeamentos e mais os cesamentos faranse mediante resolución da alcaldía, da que se dará conta ao Pleno na primeira sesión que se realice, notificándose ademais persoalmente ás persoas designadas, e publicarase no Boletín Oficial da Provincia.

4 - O nomeamento requirirá, para ser eficaz, a súa aceptación polo persoa destinataria.

Entenderase tacitamente aceptada se no termo dos tres días hábiles contados desde a notificación persoal, o/a concelleiro/a non fai manifestación expresa perante a Alcaldía de non aceptar o nomeamento.

5 - O cesamento ou revogación terá efectividade desde o momento da notificación persoal á persoa interesada.

Artigo 60

A condición de tenencia de alcaldía pérdese, ademais de polo cesamento ou revogación:

a) Por renuncia expresa manifestada por escrito, producindo efectos a renuncia desde a presentación do devandito escrito no Rexistro de Entrada do Concello.

b) Pola perda da condición de membro da Xunta de Goberno Local.

Artigo 61

1 - Correspóndelles ás tenencias de alcaldía en canto tales, substituír na totalidade das súas funcións e pola orde do seu nomeamento, á Alcaldía, nos casos de ausencia, enfermidade ou impedimento que imposibilite a esta para o exercicio das súas atribucións, así como desempeñar as funcións do alcalde ou da alcaldesa nos supostos de vacante na Alcaldía, ata que tome posesión o novo alcalde ou a nova alcaldesa.

2 - Nos casos de ausencia, enfermidade ou impedimento, as funcións da alcaldía non poderán ser asumidas pola tenencias de alcaldía a quen lle corresponda sen expresa delegación na forma sinalada neste regulamento.

A delegación terá efectos desde a data que dispoña a propia resolución, e darase conta ao resto da Corporación mediante comunicación escrita ao/á voceiro/a de cada grupo político.

3 - Malia o anteriormente disposto, cando o alcalde ou alcaldesa se ausente do termo municipal por máis de vinte e catro horas sen conferir a delegación, ou cando por causa imprevista lle resultase imposible outorgala, substituiralle na totalidade das súas funcións a tenencia de alcaldía que corresponda, dando conta ao resto da Corporación na forma prevista na alínea anterior.

4 - Se durante a realización dunha sesión do pleno ou doutro órgano colexiado, o alcalde ou alcaldesa tivese que se abster en relación con algún punto concreto dela, substituiralle automaticamente na Presidencia a tenencia de alcalde á que lle corresponda.

Artigo 62

Nos supostos de substitución da Alcaldía por razóns de ausencia, enfermidade ou impedimento, a tenencia de alcalde que asuma as súas funcións non poderá revogar as delegacións que outorgase a primeira, en virtude do disposto nos artigos 47, 48 e 49 do presente regulamento.

Sección 4ª - Do Pleno

Artigo 63

O Pleno do Concello estará integrado polo alcalde ou alcaldesa, que o preside, e todos os concelleiros e as concelleiras, unha vez fosen designados pola Xunta Electoral e tomasen posesión do seu cargo formalmente ante o propio Pleno.

Artigo 64

1 - De conformidade co establecido no artigo 22 da Lei 7/1985 do 2 de abril reguladora das bases do réxime local, na nova redacción dada pola Lei 11/1999 do 21 de abril, correspóndenlle ao Pleno, unha vez constituído consonte co disposto na lexislación electoral, as seguintes atribucións:

a) O control e mais a fiscalización dos órganos de goberno.

b) Os acordos relativos á participación en organizacións supramunicipais; alteración do termo municipal; creación ou supresión de municipios e das entidades ás que se refire o artigo 45 da Lei 7/1985 do 2 de abril; creación de órganos desconcentrados; alteración da capitalidade do municipio e o cambio de nome deste ou daquelas entidades e mais a adopción ou modificación da súa bandeira, emblema ou escudo.

c) A aprobación inicial do planeamento xeral e mais a aprobación que poña fin á tramitación municipal dos planes e demais instrumentos de ordenación previstos na lexislación urbanística.

d) A aprobación do regulamento orgánico e mais das ordenanzas.

e) A determinación dos recursos propios de carácter tributario; a aprobación e modificación dos orzamentos; a disposición das gastos en materias da súa competencia e mais a aprobación das contas; todo isto de acordo co disposto no texto refundido Lei das facendas locais.

f) A aprobación das formas de xestión dos servizos e dos expedientes de municipalización.

g) A aceptación da delegación de competencias feita por outras administracións públicas.

h) O formulamento dos conflitos de competencias a outras entidades locais e demais administracións públicas.

i) A aprobación do cadro de persoal e da relación de postos de traballo, a fixación da contía das retribucións complementarias fixas e periódicas do funcionariado e o número e réxime do persoal eventual.

l) O exercicio das accións xudiciais e administrativas e mais a defensa da Corporación nas materias da competencia plenaria.

m) A declaración de lesividade dos actos do concello.

n) A alteración da cualificación xurídica dos bens de dominio público.

ñ) A concertación das operacións de crédito nas que a súa contía acumulada, dentro de cada exercicio económico, exceda do 10 por cento dos recursos ordinarios do orzamento, agás as de tesourería, que lle corresponderán cando o importe acumulado das operacións vivas en cada momento supere o 15 por cento dos ingresos correntes liquidados no exercicio anterior, todo isto de conformidade co disposto no texto refundido Lei reguladora das facendas locais.

o) A aprobación dos proxectos de obras e servizos cando sexa competente para a súa contratación ou concesión, e cando aínda non estean previstos nos orzamentos.

p) Aquelas outras que deban corresponderlle ao Pleno por esixir a súa aprobación unha maioría especial.

q) As demais que expresamente lle confiran as leis.

2 - Perténcelle igualmente ao Pleno a votación sobre a moción de censura ao alcalde ou alcaldesa e sobre a cuestión de confianza formulada por este, que se rexerá polo disposto na lexislación electoral xeral, artigos 197 e 197 bis da Lei orgánica 8/1999 do 21 de abril, de modificación da Lei orgánica 5/1985 do 19 de xuño do réxime electoral xeral.

3 - O Pleno pode delegar o exercicio das súas atribucións na Alcaldía e na Xunta de Goberno Local, agás as enunciadas no número 1, letras a), b),c), d), e), f), g), h), i), n) e p) e no número 2 deste artigo.

Artigo 65

1 - A delegación de atribucións do Pleno a prol da Alcaldía e da Xunta de Goberno Local requirirá acordo adoptado por maioría simple do número legal dos membros da Corporación.

2 - O acordo de delegación determinará os asuntos que esta comprenda, as potestades que se deleguen e as condicións concretas do seu exercicio.

3 - O acordo plenario polo que se produza a delegación, producirá efectos legais desde o día seguinte ao da súa adopción, sen prexuízo da súa publicación no Boletín Oficial da Provincia. Estas regras tamén serán de aplicación ás modificacións posteriores do devandito acordo.

Artigo 66

As delegacións do Pleno na Alcaldía ou na Xunta de Goberno Local non quedarán revogadas polo simple feito de se producir un cambio na titularidade da Alcaldía ou na composición concreta da Xunta de Goberno Local.

Artigo 67

Das resolucións ou dos acordos adoptados polo órgano delegado darase conta ao Pleno na primeira sesión que se realice.

Artigo 68

Élle aplicable ao exercicio das competencias delegadas polo Pleno o previsto nos artigos 53, 54, 56, 57 e 58 do presente regulamento.

Sección 5ª - Da Xunta de Goberno Local

Artigo 69

1 - A Xunta de Goberno Local está integrada polo alcalde ou pola alcaldesa, que a preside, e un número de concelleiros e concelleiras non superior ao terzo do número legal deles, nomeados e separados libremente por aquel.

2 - Para os efectos do cómputo non se terán en conta os decimais que resulten de dividir por tres o número total de concelleiros/as.

Artigo 70

1 - Correspóndelle á Alcaldía, mediante resolución, tanto a determinación do número dos membros da Xunta de Goberno Local, como a designación dos seus compoñentes.

2 - O carácter de membro da Xunta de Goberno Local é voluntario, así pois, a resolución na que se efectúe a designación requirirá, para ser eficaz, a súa aceptación por parte do/a concelleiro/a designado. Enténdese que hai aceptación tácita do nomeamento se, no prazo dos tres días hábiles contados desde a notificación persoal, o concelleiro ou a concelleira non fai manifestación expresa perante o alcalde ou alcaldesa de que non acepta a designación. Todo isto sen prexuízo da preceptiva publicación no Boletín Oficial da Provincia, e da debida comunicación ao Pleno na primeira sesión que se realice.

Artigo 71

1 - O alcalde ou a alcaldesa pode destituír libremente, en todo momento, a calquera membro da Xunta de Goberno Local.

2 - O cesamento terá efectividade desde o momento da notificación persoal á persoa interesada, isto sen prexuízo da preceptiva publicación no Boletín Oficial da Provincia, e da debida comunicación ao Pleno e á Xunta de Goberno Local na primeira sesión que se realice.

Artigo 72

Correspóndelle á Xunta de Goberno Local:

a) A asistencia á Alcaldía no exercicio das súas atribucións. É unha atribución propia e indelegable. Para tal fin, a Xunta de Goberno Local será informada de todas as decisións da Alcaldía. Esta información terá carácter previo á adopción da decisión sempre que a importancia do asunto así o requira.

b) As atribucións que a Alcaldía ou o Pleno lle deleguen ou lle atribúan as leis

Artigo 73

1 - A delegación de competencias polo Pleno e pola Alcaldía na Xunta de Goberno Local, efectuarase coas formalidades previstas nas seccións anteriores.

2 - En concordancia co previsto no artigo 66 do presente regulamento, a delegación de competencias polo Pleno e pola Alcaldía na Xunta de Goberno Local, como órgano colexiado, non quedarán revogadas polo simple feito de se producir un cambio na titularidade da Alcaldía ou na composición concreta da Xunta de Goberno Local.

Artigo 74

O réxime das delegacións da Alcaldía e do Pleno na Xunta de Goberno Local é o previsto nas seccións anteriores, artigos 48, 51 ao 58 e 65 deste Regulamento.

Artigo 75

As resolucións adoptadas pola Xunta de Goberno Local no exercicio das competencias delegadas, terán os mesmos efectos que se fosen tomadas polo órgano que ten a competencia orixinaria, sen prexuízo da súa adopción consonte as regras de funcionamento da Comisión.

Artigo 76

1 - Tendo en conta o establecido no artigo 20, alínea 1 letra d) e alínea 3 da Lei 7/1985, do 2 de abril, reguladora das bases do réxime local e no artigo 59, alíneas 3 e 4 , son órganos complementarios do Concello de Miño os enumerados a seguir:

a) As concellerías-delegadas

b) As Comisións Informativas Permanentes.

c) A Comisión Especial de Contas

d) As Comisións Informativas Especiais

e) A Xunta de Portavoces

Sección 1ª - Das concellerías-delegadas

Artigo 77

1 - As concellerías-delegadas son aqueles/as concelleiros/as que exercen algunha das delegacións de atribucións da Alcaldía, segundo prevén os artigos 49 e 50 deste regulamento.

2 - A condición de concellería- delegada pérdese nos casos seguintes:

a) Por renuncia expresa, que deberá ser formalizada por escrito ante a Alcaldía, con efectos desde a súa presentación no Rexistro de Entrada do Concello.

b) Por revogación da delegación, adoptada pola Alcaldía coas mesmas formalidades previstas para outorgala.

c) Nas delegacións xenéricas, a perda da condición de membro da Xunta de Goberno Local levará implícita a revogación da delegación.

Artigo 78

1 - As concellerías-delegadas terán as atribucións que se especifiquen na respectiva resolución de delegación, e exerceranas de acordo co que nela se prevea, en función dos distintos tipos contemplados nos artigos 49 e 50 deste regulamento, e no marco das regras que alí se establezan.

2 - Se a resolución ou acordo de delegación se refire xenericamente a unha materia ou sector da actividade sen especificación de potestades, entenderase que comprende todas aquelas facultades, dereitos e deberes referidos á materia delegada que corresponden ao órgano que ten asignadas orixinariamente as atribucións, coa soa excepción das que segundo a Lei 7/1985 do 2 de abril, non sexan delegables.

Sección 2ª- Das Comisións Informativas Permanentes, Xunta de Goberno Local e concellerías que exerzan delegacións

Artigo 79

1 - De conformidade co establecido no artigo 20.1.c) da Lei 7/1985, do 2 de abril, na nova redacción dada pola Lei 11/1999 do 21 de abril, e artigo 68.1 da Lei 5/1997, son órganos necesarios do Concello de Miño as que ata agora veñen sendo denominadas Comisións Informativas Permanentes.

2 - Defínense como Comisións Informativas Permanentes, aqueles órganos necesarios, sen atribucións resolutivas, nas que participan todos os grupos políticos que integran a Corporación, e que teñen por obxecto:

a) O estudo, informe ou consulta dos asuntos que deban ser sometidos á decisión do Pleno, salvo cando se trate de sesións extraordinarias urxentes, ou de mocións, así como daqueles asuntos que se deban someter á decisión da Xunta de Goberno Local cando actúe por delegación do Pleno (artigo 68.2 da Lei 5/1997).

b) O informe daqueles asuntos da competencia propia ou delegada da Xunta de Goberno Local, ou da Alcaldía, que lle sexan sometidos ao seu coñecemento por expresa decisión daqueles.

Artigo 80

1 - As Comisións Informativas Permanentes constituiranse, con carácter xeral, distribuíndo entre elas as materias que se deben someter ao Pleno.

2 - O seu número e denominación iniciais, decidirase mediante acordo adoptado polo Pleno, por proposta da Alcaldía, tal e como se establece, e na sesión ou sesións extraordinarias ás que se refire o artigo 42 do presente regulamento, procurando, no posible, que se correspondan co número e denominación das grandes áreas nas que se estruturan os servizos corporativos. Calquera variación delas durante o mandato corporativo requirirá acordo plenario ao respecto.

Artigo 81

1 - No acordo de creación das comisións informativas determinarase, por maioría simple, a composición concreta delas, tendo en conta as seguintes regras:

a) O alcalde ou alcaldesa é o presidente nato de todas elas, non obstante, a presidencia efectiva poderá delegala en calquera membro da Corporación, isto a teor do establecido no artigo 45.3 deste regulamento. A delegación realizarase mediante resolución que lle será notificada á persoa interesada, entendéndose aceptada tacitamente se no prazo dos tres días hábiles contados desde a notificación persoal, o concelleiro ou a concelleira non fai manifestación expresa perante a alcaldía de que non acepta a delegación. Todo isto sen prexuízo da preceptiva publicación no Boletín Oficial da Provincia, e da debida comunicación ao Pleno na primeira sesión que se realice. En todo caso, o/a presidente/a efectivo conservará o voto de calidade, para a resolución dos empates.

b) Cada comisión estará integrada de xeito que a súa composición se axuste á proporcionalidade existente entre os distintos grupos políticos representados na Corporación, ou por igual número para cada grupo.

Neste último caso aplicarase o sistema do voto ponderado.

c) A adscrición concreta a cada comisión dos membros da Corporación que deban formar parte dela, en representación de cada grupo, realizarase mediante escrito do voceiro ou da voceira dirixido á Alcaldía e presentado no Rexistro de Entrada do Concello. Poderá designarse, do mesmo xeito, un suplente por cada titular. O devandito escrito presentarase no prazo dos cinco días hábiles contados desde a sesión plenaria na que se adoptou o acordo de creación das comisións informativas ou, de se levar a creación, composición e designación a un único pleno, os cinco días contaranse desde o requirimento que, para tal efecto, se formule pola alcaldía a todos os/as voceiros/as dos grupos políticos.

Sección 3ª - Da Comisión Especial de Contas

Artigo 82

1 - A Comisión Especial de Contas estará constituída polos membros dos distintos grupos políticos da Corporación.

2 - O número dos membros será proporcional ao da súa representatividade no Concello, ou igual para cada grupo. Neste último caso, aplicarase o sistema de voto ponderado.

3 - Constituirase, integrarase e funcionará do mesmo xeito que as demais comisións informativas permanentes.

Artigo 83

1 - Correspóndelle á Comisión Especial de Contas o exame, o estudo e mais o informe da Conta Xeral e das demais contas anuais.

2 - Para o correcto exercicio das súas funcións, a Comisión poderá requirir, por medio da Alcaldía, a documentación complementaria que considere precisa e a presenza dos membros e funcionariado da Corporación especialmente relacionados coas contas que se analicen.

3 - Mediante acordo adoptado polo Pleno da Corporación que así o estableza, a Comisión Especial de Contas poderá actuar como Comisión Informativa Permanente nos asuntos referidos á economía, facenda e outras que se lle puidesen encomendar.

Artigo 84

As competencias da Comisión Especial de Contas entenderanse sen prexuízo das que lles correspondan ao Tribunal de Contas e ao Consello de Contas, de conformidade coa súa lexislación específica.

Sección 4ª - Das Comisións Informativas Especiais

Artigo 85

1 - Denomínanse Comisións Informativas Especiais as que o Pleno acorde constituír con carácter temporal, para o estudo, informe ou consulta dalgún aspecto concreto, específico, considerando as súas características especiais de calquera tipo, isto de conformidade co establecido no artigo 68.4 da Lei 5/1997.

2 - Estas comisións extínguense automaticamente unha vez ditaminasen ou informasen sobre o asunto que constitúe o seu obxecto, salvo que o acordo plenario que as creou dispoña outra cousa.

Artigo 86

Para o acordo de creación estarase ao establecido no artigo 81 do presente regulamento.

Sección 5ª - Da Xunta de Portavoces

Artigo 87

1 - A Xunta de Portavoces está integrada polo alcalde ou alcaldesa, que a presidirá, ou concelleiro/a en que se delegue, e polos/as voceiros/as ou suplentes dos grupos municipais constituídos.

2 - É un órgano de consulta e negociación política que ten por obxecto:

a) Informar sobre a orde do día antes da resolución da alcaldía.

b) Asistir e asesorar á alcaldía en asuntos concretos de interese xeral, cando o

considere necesario.

3 - A Xunta de Portavoces adoptará as súas decisións mediante voto ponderado.

Artigo 88

Poderá constituírse, por proposta da Alcaldía-Presidencia, mediante acordo adoptado para o efecto polo Pleno da Corporación, por maioría simple.

Artigo 89

1 - A Xunta de Portavoces reunirase, con carácter obrigatorio, antes da celebración das sesións ordinarias e extraordinarias do Pleno.

No acordo do pleno de organización poderá determinarse a periodicidade das reunións con carácter ordinario, establecéndose se é o caso horas e días. Neste suposto non se requirirá convocatoria previa.

2 - Reunirase con carácter extraordinario cando así a convoque a Alcaldía, ben por iniciativa propia, ben por instancia dun grupo municipal, notificándose a resolución telefonicamente, por fax ou por calquera outro medio electrónico acordado pola propia xunta.

Sección 1ª - Clases de sesións e requisitos previos á súa realización

Artigo 90

As sesións do Pleno do concello poden ser de tres tipos:

- Ordinarias

- Extraordinarias

- De carácter urxente

Artigo 91

1 - Son sesións ordinarias aquelas das que a súa periodicidade está preestablecida. A devandita periodicidade será fixada por acordo do propio Pleno, adoptado en sesión extraordinaria, que deberá convocar a presidencia, dentro dos 30 días seguintes ao da sesión constitutiva do concello, tal e como se establece no artigo 42 do presente regulamento, e non poderá exceder do límite dos dous meses ao que se refire o artigo 210.2.a) da Lei 5/1997.

2 - No acordo do Pleno estableceranse os días e horas nos que terán lugar as devanditas sesións, que poderán ser modificadas en calquera momento posterior por novo acordo plenario.

Igualmente a Alcaldía, por propia iniciativa ou por pedimento da Xunta de Portavoces, por causa xustificada, poderá variar o día ou a hora dalgunha sesión, arredándoa só o indispensable do día fixado polo Pleno. A resolución que se adopte ao respecto seralles notificada aos/ás voceiros/as e publicarase no taboleiro de anuncios coa maior anticipación posible.

Artigo 92

1 - As sesións extraordinarias convócanse pola Alcaldía con tal carácter por iniciativa propia ou por pedimento da cuarta parte, cando menos, do número legal dos membros da Corporación, sen que ningún concelleiro ou ningunha concelleira poida solicitar máis de tres anualmente.

Tal solicitude deberase facer por escrito no que se razoe o asunto ou asuntos que a motiven, asinado persoalmente por todos os concelleiros e todas as concelleiras que a subscriben e acompañado de todos os documentos que sirvan de antecedentes para poder adoptar a proposta ou propostas de decisións que se formulen, e que deberán estar ao dispor dos concelleiros e das concelleiras desde o momento da convocatoria.

No suposto de que a solicitude adoecese dalgún defecto de forma ou non estivese acompañada dos documentos aos que se fai referencia no epígrafe primeiro desta alínea, concederase un prazo de dous días para a emenda, e de non se cumprir, a Alcaldía deberá, no prazo dos catro días seguintes ao requirimento da emenda, ditar resolución motivada pola que se efectúe ou se denegue a convocatoria.

Contra a denegación expresa da solicitude da convocatoria, poderán interpoñerse polas persoas interesadas os correspondentes recursos, sen prexuízo de que a Administración do Estado ou da Comunidade Autónoma respectiva poidan facer uso das facultades ás que se refire o artigo 65 da Lei 7/1985 do 2 de abril.

2 - A convocatoria da sesión extraordinaria a instancia dos membros da Corporación deberase efectuar dentro dos catro días hábiles seguintes ao pedimento, salvo cando se deba emendar algún defecto na solicitude ou falta de documentación, que se contará desde o requirimento para a emenda, e a realización non poderá demorarse por máis de quince días hábiles desde que o escrito tivese entrada no Rexistro xeral, non podendo incorporarse o asunto á orde do día dun pleno ordinario ou doutro extraordinario con máis asuntos se non o autorizan expresamente as persoas solicitantes da convocatoria.

3 - Se a Alcaldía non convocase o pleno extraordinario solicitado polo número de concelleiros/as indicado, dentro do prazo sinalado, quedará automaticamente convocado para o décimo día hábil seguinte ao do remate do devandito prazo, ás doce horas, o que será notificado polo secretario/a da Corporación a todos os membros dela o día seguinte do remate do prazo citado anteriormente. En ausencia do alcalde ou alcaldesa ou de quen legalmente o substitúa, o pleno quedará validamente constituído sempre que asistan á sesión un terzo do número legal dos membros del, sendo neste caso presidido polo membro da Corporación de maior idade entre os presentes.

Artigo 93

1 - Son sesións extraordinarias de carácter urxente as convocadas pola Alcaldía cando a urxencia do asunto ou asuntos que hai que tratar non permitan convocar a sesión extraordinaria coa antelación mínima dos dous días hábiles esixida pola Lei 7/1985 do 2 de abril.

2 - Neste caso, ademais de que a convocatoria deberá ser motivada, debe incluírse como primeiro punto da orde do día o pronunciamento do Pleno sobre a urxencia de todos os asuntos incluídos na convocatoria. Se esta non resulta apreciada por maioría simple del, levantarase de seguido a sesión.

Artigo 94

1 - O Pleno realizará as súas sesións na Casa do Concello, agás os supostos de forza maior nos que, a través da convocatoria ou dunha resolución da alcaldía ditada previamente e notificada a todos os membros da Corporación, poderase habilitar outro edificio ou local para tal efecto. En todo caso, farase constar na acta esta circunstancia. Verificadas en distinto lugar, as sesións serán nulas.

2 - En lugar preferente do salón de sesións estará colocada a efixie de S.M. El-Rei.

3 - O pleno celebrarase preferentemente pola mañá salvo en caso de extraordinaria urxencia, que terá que ser motivada na resolución da convocatoria.

Artigo 95

1 - Correspóndelle á Alcaldía convocar todas as sesións do pleno. Só a convocatoria das sesións extraordinarias urxentes, deberá ser motivada.

2 - Á convocatoria das sesións achegarase a orde do día comprensiva dos asuntos que se van tratar co suficiente detalle, os borradores das actas das sesións anteriores que deban ser aprobadas na sesión, e mais os ficheiros electrónicos da documentación relativa aos asuntos a tratar sempre que sexa posible.

3 - Xunto coa convocatoria do pleno ordinario e extraordinario, convocaranse tamén as comisións informativas correspondentes, que poderán realizarse nunha única resolución. Neste suposto, a resolución deberá notificarse cunha antelación mínima de dous días hábiles á realización das comisións informativas e da sesión do pleno. Salvo que exista unha causa excepcional apreciada pola Alcaldía, non poderán coincidir, no mesmo día, a realización do pleno e das comisións informativas convocadas para o efecto.

Para o pleno do orzamento, a notificación á comisión informativa correspondente deberá facerse cun mínimo de cinco días hábiles á celebración dela.

4 - A convocatoria, orde do día e borradores das actas do pleno e comisións informativas deberán serlles notificadas aos concelleiros e ás concelleiras no lugar que estes designen, dentro do termo municipal.

5 - Entre a convocatoria e a realización da sesión, non poderán transcorrer menos de dous días hábiles, contados desde a notificación, agás no caso das sesións extraordinarias urxentes.

Artigo 96

1 - A convocatoria para unha sesión, ordinaria ou extraordinaria, dará lugar á apertura do correspondente expediente, no que deberá constar:

a) A relación dos expedientes conclusos que a Secretaría prepare e poña ao dispor da Alcaldía.

b) A fixación da orde do día pola Alcaldía.

c) As copias das notificacións cursadas aos membros da Corporación.

d) Copia do anuncio no taboleiro de edictos do concello.

e) Minuta da acta.

f) Copias dos oficios de remisión dos acordos adoptados ás Administracións do Estado e da Comunidade Autónoma.

g) Publicación dos acordos no taboleiro de edictos.

2 - Sendo preceptiva a notificación aos concelleiros e ás concelleiras das correspondentes ordes do día, na Secretaría xeral deberá quedar debidamente acreditado o cumprimento deste requisito.

Artigo 97

1 - A orde do día das sesións será fixada pola Alcaldía asistido da Secretaría, e logo do informe consultivo da Xunta de Portavoces. Así mesmo, poderá solicitar a asistencia dos membros da Xunta de Goberno Local.

2 - De conformidade co anterior, os expedientes deberán estar concluídos e entregados na Secretaría da Corporación, cunha antelación de catro días á realización das sesións das comisión informativas correspondentes.

O secretario/a, neste prazo, someterao á consideración da Alcaldía para a súa inclusión, se é procedente, na orde do día das comisións informativas e do pleno.

3 - Nas sesións ordinarias poderán tratarse, por razóns de urxencia, asuntos non comprendidos na orde do día que se achegaba á convocatoria e que non teñan cabida no punto de rogos e preguntas. Non obstante, requirirase que o Pleno, por maioría absoluta, ratifique a declaración da urxencia e, polo tanto, a procedencia do seu debate.

4 - Tendo en conta o establecido no artigo 46.2.e) da Lei 7/1985 do 2 de abril, na nova redacción dada pola Lei 11/1999, nos plenos ordinarios incluiranse sempre os puntos de mocións, rogos e preguntas.

Artigo 98

Serán nulos os acordos adoptados en sesións extraordinarias sobre asuntos non comprendidos na súa convocatoria, así como os que se adopten en sesións ordinarias sobre materias non incluídas na respectiva orde do día, salvo especial e previa declaración da urxencia feita polo Pleno, co voto favorable da maioría absoluta do número legal dos membros da Corporación.

Artigo 99

1 - Toda a documentación dos asuntos incluídos na orde do día que debe servir de base e, se é o caso, votación, deberá estar ao dispor dos concelleiros e das concelleiras desde o mesmo día da convocatoria na Secretaría da Corporación, en horario de 9:00 da mañá ata as 15:00 horas.

Os sábados a documentación porase ao dispor dos concelleiros no Rexistro xeral de entrada, das 10:30 ás 13:00 horas.

2 - Calquera concelleiro/a poderá, en consecuencia, examinala e mesmo obter copias de documentos concretos que a integren, pero os orixinais non poderán saír do lugar no que se atopen postos de manifesto. Non obstante, poderanse examinar igualmente no salón de sesións da Casa do Concello.

Artigo 100

1 - As convocatorias das sesións, as ordes do día, mocións, votos particulares, propostas de acordo e ditames das comisións de estudo, informe ou consulta redactaranse en lingua galega, sen prexuízo de que se redacten, ademais, en castelán.

2 - Nos debates utilizarase a lingua galega, sen prexuízo de poder utilizar o castelán.

Artigo 101

1 - Toda sesión, ordinaria ou extraordinaria, deberá respectar o principio de unidade de acto, polo que se deberá levantar dentro do mesmo día en que se iniciase. Non obstante, poderase alongar, con carácter excepcional, a criterio da Alcaldía-Presidencia.

2 - Os asuntos incluídos na orde do día que non puidesen ser debatidos e resoltos, deberanse incluír na orde do día da seguinte sesión que se realice, ordinaria ou extraordinaria.

3 - Durante o transcurso da sesión, a proposta da Alcaldía ou a instancia de calquera dos grupos municipais presentes, interromperase por un tempo non superior a dez minutos, co fin de permitir as deliberacións dos grupos por separado ou en conxunto sobre a cuestión debatida, ou para descanso dos debates. Cada grupo terá dereito a formular unha única interrupción por pleno.

Artigo 102

1 - Serán públicas as sesións do Pleno. Non obstante, poderá ser secreto o debate e mais a votación daqueles asuntos que poidan atinxir ao dereito fundamental da cidadanía ao que se refire o artigo 18.1 da Constitución Española, cando así se acorde por maioría absoluta.

2 - Para ampliar a difusión auditiva ou visual do desenvolvemento das sesións, poderanse instalar sistemas megafónicos ou circuítos de televisión.

3 - O público asistente ás sesións non poderá intervir nestas, nin tampouco poderán permitirse manifestacións de agrado ou desagrado, podendo o presidente proceder, en casos extremos, á expulsión do asistente que por calquera causa impida o normal desenvolvemento da sesión. Sen prexuízo disto, unha vez levantada a sesión, a Alcaldía-Presidencia pode establecer unha rolda de consultas polo público asistente sobre temas concretos de interese municipal.

Artigo 103

Os membros da Corporación tomarán asento no salón de sesións unidos ao seu grupo. A orde de colocación dos grupos determinarase pola Alcaldía, oídos os/as voceiros/as, tendo preferencia o grupo formado polos membros da lista que obtivese maior número de votos. En calquera caso, a colocación dos membros corporativos tenderá a facilitar a emisión e reconto dos votos.

Artigo 104

1 - Para a válida constitución do pleno requírese a asistencia dun terzo do número legal dos membros da Corporación. Este quórum deberase manter durante toda a sesión.

En todo caso requírese a asistencia do alcalde ou alcaldesa e do secretario/a da Corporación, ou de quen legalmente os substitúa.

2 - A ausencia dun ou de varios/as concelleiros/as, unha vez iniciada a deliberación do asunto, equivale á abstención na votación, salvo que se incorpore a tempo de emitir o seu voto. Entenderase iniciada a deliberación:

- De se producir debate con intervencións dun/dunha ou varios/as concelleiros/as.

- Se ninguén pedise a palabra nin fixese uso dela a Alcaldía, cando rematase a lectura da proposta do acordo do asunto correspondente á orde do día.

3 - Se en primeira convocatoria non existise o quórum necesario segundo o disposto na alínea 1ª, entenderase convocada automaticamente a sesión á mesma hora, dous días despois. Se tampouco entón acadase o quórum necesario, a Alcaldía deixará sen efecto a convocatoria, pospoñendo o estudo dos asuntos incluídos na orde do día para a primeira sesión que se realice con posterioridade, sexa ordinaria ou extraordinaria.

Artigo 105

1 - O disposto anteriormente enténdese sen prexuízo de que, cando os asuntos incluídos nunha sesión, ou algún deles, esixan un número especial de concelleiros/as para os efectos do quórum de votación, se reiterarán as convocatorias do pleno tantas veces como fose necesario ata acadar o devandito quórum.

Sección 2ª - Dos debates

Artigo 106

1 - A orde na que se deben tratar os asuntos é a seguinte:

1. Aprobación, se procede, da acta da sesión ou sesións anteriores.

2. Parte resolutiva.

2.1. Asuntos incluídos na orde do día, obxecto de ditame polas comisións informativas.

2.2. Mocións urxentes en asuntos de competencia de pleno segundo o artigo 22 da Lei 7/1985, que non figuren na orde do día.

3. Parte declarativa.

3.1. Declaracións institucionais.

3.2. Mocións dos grupos municipais.

4. Parte de información, control e fiscalización.

4.1. Informes do equipo de goberno.

4.2. Rogos.

4.3 Preguntas.

2 - Así pois, as sesións comezarán preguntando a presidencia se algún membro da Corporación ten que formular algunha observación á acta da sesión anterior que se distribuíse coa convocatoria. Se non houbese observacións, considerarase aprobada.

Se as houber, debateranse e decidiranse as rectificacións que fosen procedentes.

En ningún caso se poderá modificar o fondo dos acordos adoptados e só caberá emendar os simples erros materiais ou de feito.

Ao recoller, en cada acta, a lectura e aprobación da anterior, consignaranse as observacións e rectificacións practicadas.

3 - Todos os asuntos debateranse e votaranse pola orde na que estivesen relacionados na orde do día.

4 - En todo caso a Alcaldía respectará a orde do día do pleno sen realizar modificación ningunha, a menos que a súa petición neste sentido veña apoiada pola metade máis un, como mínimo, dos concelleiros e das concelleiras presentes no pleno. A Alcaldía poderá retirar un asunto da orde do día cando a súa aprobación esixise unha maioría especial e esta non existise no momento de se constituír o pleno.

5 - Nas sesións ordinarias, concluso o exame dos asuntos incluídos na orde do día e antes de pasar á parte declarativa, a Presidencia preguntará se algún grupo político ou membro da Corporación, se é o caso, desexa someter á consideración do Pleno por razóns de urxencia, algún asunto non comprendido na orde do día que se achegaba á convocatoria, relativo a algunha das atribucións que ten conferidas como propias segundo o artigo 22 da Lei 7/1985, e que non teña cabida no punto de rogos e preguntas.

Se así fose, o/a voceiro/a do grupo ou membro da Corporación propoñente xustificará a urxencia da moción e o pleno votará, acto seguido, sobre a procedencia do seu debate. Se o resultado da votación fose positivo, por maioría absoluta do número legal dos membros da Corporación, seguirase o procedemento previsto no artigo 109 e seguintes deste regulamento.

O disposto nesta alínea non será de aplicación, en ningún caso, ás mocións de censura, das que a súa tramitación, debate e votación se rexerán polo disposto no artigo 127 deste regulamento.

Artigo 107

1 - Calquera concelleiro/a poderá pedir, durante o debate, a retirada dalgún expediente incluído na orde do día, para o efecto de que se lle incorporen documentos ou informes, e tamén que o expediente quede encol da mesa, aprazándose a súa discusión para a seguinte sesión. En ambos os dous casos, a petición será votada, logo de rematar o debate e antes de proceder á votación sobre o fondo do asunto. Se a maioría simple votase a prol do pedimento, non haberá lugar a votar a proposta do acordo.

2 - No suposto de que se trate de asuntos non incluídos na orde do día que requiran informe preceptivo da Secretaría ou da Intervención, se non o puidesen emitir no mesmo acto, deberán solicitar da presidencia que se adíe o seu estudo, e quedará encol da mesa ata a próxima sesión.

Cando o devandito pedimento non fose atendido, o secretario/a farao constar expresamente na acta.

Artigo 108

1 - A consideración de cada punto incluído na orde do día comezará mediante a exposición do asunto pola alcaldía-presidencia, quen o poderá delegar no/a voceiro/a do grupo municipal gobernante, ou no/a concelleiro/a-delegado/a, segundo o tema de que se trate, ou solicitarlle ao secretario/a que proceda, sen máis, a ler a proposta de acordo e o ditame formulado pola comisión informativa correspondente. Por pedimento de calquera grupo, deberase dar lectura integra a aquelas partes do expediente ou do ditame que se considere conveniente para a súa mellor comprensión.

No suposto de propostas ou mocións presentadas polos grupos políticos, a exposición farase polo/a voceiro/a do grupo propoñente, ou polo/a concelleiro/a en quen delegue, segundo o previsto no artigo 9.2 do presente regulamento, ou por delegación efectuada no propio acto.

2 - Se ninguén solicitase a palabra tras a lectura, o asunto someterase directamente a votación.

Artigo 109

1 - De se promover debate, as intervencións serán ordenadas pola Alcaldía-Presidencia, consonte as seguintes regras:

a) Só se fai uso da palabra logo da autorización da Alcaldía ou da Presidencia.

b) O goberno municipal poderá facer uso dunha primeira rolda de explicación dos ditames ou propostas antes de se iniciar o debate dos asuntos cando así o estime oportuno.

c) No debate, os diversos grupos consumirán unha primeira rolda. No suposto de que por un grupo político, ademais de intervir o/a voceiro/a, interveñan tamén outros/as concelleiros/as, deberanse repartir o tempo, de xeito que non se poidan exceder do máximo sinalado.

d) Quen se considere aludido por unha intervención, poderá solicitar da Alcaldía-Presidencia que se conceda unha rolda por alusións, que será breve e concisa.

e) Se o solicitase algún grupo, procederase a unha segunda rolda.

Consumida esta, a Alcaldía-Presidencia pode dar por rematada a discusión, que se pechará cunha intervención do propoñente, na que brevemente ratificará ou modificará a súa proposta.

f) Non se admitirán outras intervencións que as da Alcaldía-Presidencia para chamar á orde ou á cuestión debatida.

A Alcaldía-Presidencia velará para que todas as intervencións teñan unha duración igual.

2 - Os membros da Corporación poderán en calquera momento do debate pedir a palabra para formular unha cuestión de orde, invocando para o efecto a norma da que reclama a súa aplicación. A presidencia resolverá o que sexa procedente sen que por este motivo se principie debate ningún.

3 - O/a secretario/a e mais o/a interventor/a poderán intervir cando fosen requiridos pola Presidencia por razóns de asesoramento técnico ou aclaración de conceptos. Cando os/as devanditos/as funcionarios/as entendan que no debate se formulou algunha cuestión sobre a que se poida dubidar sobre a súa legalidade ou puidese ter implicacións económicas, poderán solicitarlle á Presidencia o uso da palabra para asesorar á Corporación.

Artigo 110

1 - Nas deliberacións poderá intervir cada grupo municipal mediante o/a voceiro/a ou mediante outros membros, consumindo rolda no primeiro lugar o grupo maioritario, despois os minoritarios e en derradeiro termo o grupo mixto.

No suposto de que dous ou máis grupos tivesen o mesmo número de concelleiros/as, intervirá primeiro o/a voceiro/a ou concelleiro/a do grupo que obtivese nas eleccións un maior número de votos, e así sucesivamente.

2 - A intervención normal de cada grupo non excederá de cinco minutos. Non obstante, naqueles temas que pola súa importancia ou complexidade así o requiran, e por pedimento de calquera voceiro/a, a Presidencia notificaralle ao pleno a duración das intervencións antes de comezaren estas.

3 - No suposto de que se concedese unha segunda rolda, terá unha duración máxima de tres minutos por cada grupo.

4 - A duración máxima da rolda por alusións será de dous minutos.

5 - O tempo que lle corresponda ao grupo mixto poderase repartir por igual entre os representantes das listas que o integren.

6 - A Presidencia poderá acordar, durante o transcurso da sesión, que se interrompa esta para permitir as deliberacións dos grupos sobre a cuestión debatida ou para descanso dos debates. Estas interrupcións non terán duración superior a dez minutos.

Artigo 111

1 - A Alcaldía poderá chamar á orde a calquera membro da Corporación que:

a) Profira palabras ou verta conceptos ofensivos á dignidade da Corporación ou dos seus membros, das institucións públicas ou de calquera outra persoa ou entidade.

b) Produza interrupcións ou de calquera outro xeito altere a orde das sesións.

c) Pretenda facer uso da palabra sen que lle fose concedida ou unha vez que lle fose retirada.

2 - Logo de tres chamadas á orde na mesma sesión (ou dúas chamadas á orde no debate dun mesmo asunto), coa advertencia na segunda, das consecuencias dunha terceira chamada, a Presidencia poderá ordenarlle a un concelleiro ou a unha concelleira que abandone o local no que se estea a realizar a reunión, adoptando as medidas que considere oportunas para facer efectiva a expulsión, auxiliándose, se é o caso, da Policía municipal.

3 - No caso de que o/a concelleiro/a se negase a abandonar o pleno, e co fin de evitar liortas, a Alcaldía-Presidencia poderá ordenar que continúe a sesión, considerando expulsado o/a concelleiro/a afectado, sen que se recollan na acta as posibles intervencións que efectúe desde o momento no que se considerou expulsado este, sen que, por outra banda, poida votar.

Artigo 112

Nos supostos nos que, de conformidade co establecido no artigo 76 da Lei 7/1985, algún membro da Corporación se deba abster de participar na deliberación e votación, deberá abandonar o salón mentres se discuta e vote o asunto, agás que se trate de debater a súa actuación como corporativo, en que terá dereito a permanecer e defenderse.

Artigo 113

1 - Para os efectos do desenvolvemento das sesións e para definir o carácter das intervencións dos membros da Corporación, utilizarase a seguinte terminoloxía:

a) Ditame: é a proposta sometida ao Pleno tras o estudo do expediente pola comisión informativa. Contén unha parte expositiva e un acordo que se deba adoptar.

b) Proposición: é a proposta que se somete ao Pleno relativa a un asunto incluído na orde do día do pleno extraordinario urxente, que se achega á convocatoria, respecto do que non se esixe o ditame previo da comisión informativa correspondente.

Conterá unha parte expositiva ou xustificación e un acordo ou acordos que se deban adoptar.

Non procederá entrar a debater nin votar unha proposición sen que previamente o Pleno, por maioría simple, ratificase a súa inclusión na orde do día.

c) Moción: Son mocións de urxencia as propostas que por iniciativa dos órganos de goberno municipal, de calquera dos grupos municipais, ou dun membro da Corporación, sométense directamente ao coñecemento, consideración e votación do Pleno nun asunto da súa competencia, segundo as atribucións que ten conferidas como propias en virtude do establecido no artigo 22 da Lei 7/1985.

As mocións carecerán da eficacia precisa para a adopción inmediata de acordos que esixan informes técnicos, económicos ou xurídicos, necesarios para garantir a oportunidade, posibilidade ou legalidade do acordo a adoptar.

Teñen tamén a consideración de mocións urxentes, aquelas propostas que teñan por obxecto o pronunciamento do Pleno sobre a necesidade de iniciar determinadas actuacións en asuntos da súa competencia. Neste suposto a moción, unha vez aprobada, servirá de resolución de incoación de oficio dun expediente que, tras a súa instrución, se someterá á comisión informativa competente para que eleve o seu ditame á Corporación.

Para ser tratados requírese que o/a voceiro/a ou membro da Corporación propoñente xustifique a urxencia e que o Pleno, por maioría absoluta, ratifique a declaración de urxencia e, polo tanto, a procedencia do seu debate.

As mocións formularanse mediante escrito dirixido á Alcaldía, e conterán unha parte expositiva ou xustificación, e unha proposta de acordo ou acordos que se deban adoptar.

Deberanse presentar no Rexistro de Entrada cunha antelación de dous días á sesión do Pleno onde se vaian tratar, e entregaránselles, o máis axiña posible, aos/ás voceiros/as dos grupos municipais e aos/ás concelleiros/as non adscritos, se é o caso, por medios electrónicos.

Malia o anterior, e cando a propia urxencia do asunto que hai que tratar non permita formular a moción por escrito e coa antelación establecida, poderase formular oralmente ante a Corporación.

As mocións poden ser individuais, as que presente un só grupo municipal ou un membro da Corporación, ou conxuntas, cando sexan asinadas por dous ou máis grupos ou concelleiros/as. Cada grupo ou concelleiro/a poderá presentar ata un máximo de tres mocións individuais por pleno. As mocións conxuntas non estarán suxeitas a límite.

De seren varias as mocións presentadas, e por distintos grupos políticos, trataranse en primeiro lugar as do grupo máis representativo en relación coa composición da Corporación e así sucesivamente ata concluír co grupo mixto e concelleiros/as non adscritos. Se varios grupos tivesen o mesmo número de concelleiros/as, darase preferencia á lista máis votada, e o mesmo no suposto dos/as concelleiros/as non adscritos.

d) Voto particular: é a proposta de modificación dun ditame formulada por un membro que forma parte da comisión informativa. Deberá achegarse ao ditame desde o día seguinte á súa aprobación pola comisión, e presentarase a través do Rexistro de Entrada.

Unha vez debatido o asunto, someterase primeiro a votación a proposta de modificación do ditame e de seguido a proposta obxecto de ditame pola comisión informativa.

e) Emenda: é a proposta de modificación dun ditame ou proposición presentada por calquera membro, e poderá facerse por escrito a través do Rexistro de Entrada da Corporación ou formularse verbalmente durante o transcurso do debate da sesión.

As emendas poden ser á totalidade ou a algún punto concreto do ditame.

Son á totalidade as que versen sobre a oportunidade, os principios ou o espírito do ditame e propoñan a devolución dela á comisión correspondente ou propoñan un texto completo alternativo. A aprobación da emenda levará consigo a devolución do ditame á comisión para que ditamine sobre o novo texto.

As emendas a algún punto concreto poderán ser de supresión, modificación ou adición. Nos dous últimos supostos, a emenda deberá conter o texto concreto que se propoña e non será necesaria a devolución do ditame á comisión.

O mesmo que no voto particular, votarase primeiro a emenda e de seguido a proposta obxecto de ditame pola comisión.

f) Rogo: é a formulación dunha proposta de actuación dirixida á Alcaldía ou algún dos membros da Xunta de Goberno Local, e poderán ser debatidos, pero en ningún caso sometidos a votación.

Poden formular rogos todos os membros da Corporación ou os grupos municipais a través dos seus voceiros ou das súas voceiras.

Os rogos serán tratados na mesma sesión na que se formulen, sempre e cando se presenten por escrito no Rexistro de Entrada con dous días de antelación ao da realización da sesión ordinaria. Tamén poderán formularse rogos verbais.

Cada grupo poderá presentar un máximo de cinco rogos escritos e dous verbais nun mesmo pleno ordinario, aínda que a Xunta de Portavoces poderá ampliar este número, tendo en conta que cada rogo formulado só poderá instar unha única proposta de actuación, non podendo acumularse nun mesmo rogo varias peticións. O así formulado entenderase como non presentado.

g) Pregunta: é calquera cuestión formulada aos órganos de goberno no seo do pleno.

Poden formular preguntas todos os membros da Corporación, ou os grupos municipais a través dos seus voceiros e das súas voceiras.

As preguntas serán contestadas na mesma sesión na que se formulen, sempre e cando se presenten por escrito no Rexistro de Entrada con dous días de antelación ao da realización da sesión ordinaria. Non obstante, a Alcaldía-Presidencia poderá deixalas para a sesión seguinte, se non dispuxese da información necesaria para o efecto. Os grupos municipais poderán, non obstante, solicitar contestación por escrito ás preguntas formuladas no pleno ordinario. O equipo de goberno poderá aceptar o devandito pedimento ou ben contestalas oralmente no seguinte pleno ordinario. Tamén poderán formularse preguntas verbais.

Cada grupo poderá presentar un máximo de cinco preguntas escritas e dúas verbais nun mesmo pleno ordinario. A Xunta de Portavoces poderá ampliar este número tendo en conta que cada pregunta só poderá conter unha única cuestión, non podendo acumularse nunha mesma pregunta varias cuestións. A así formulada entenderase como non presentada.

Os rogos e mais as preguntas trataranse e contestaranse grupo por grupo, ata concluír todas as presentadas por cada grupo, comezando polo grupo máis representativo en relación á composición da Corporación.

Tanto os rogos como as preguntas formularanse polo/a voceiro/a de cada grupo ou polo/a concelleiro/a en quen delegue, e serán contestadas pola Alcaldía-Presidencia ou por delegación, polo/a voceiro/a do grupo de goberno ou polo/a concelleiro/a delegado/a correspondente.

No suposto de que os rogos e preguntas se efectúen oralmente, serán tratados e contestados na sesión ordinaria seguinte, salvo que a Alcaldía-Presidencia decida que o sexan na mesma sesión.

2 - En caso de dúbida corresponde ao Pleno resolver sobre a cualificación das iniciativas presentadas polos grupos políticos.

Sección 3ª - Das votacións

Artigo 114

1 - Logo de rematar o debate dun asunto, procederase á súa votación.

2 - Antes de comezar a votación a Alcaldía-Presidencia formulará clara e concisamente os termos dela e mais a forma de emitir o voto.

3 - Unha vez iniciada a votación non se pode interromper por ningún motivo. Durante o desenvolvemento da votación, a Alcaldía-Presidencia non outorgará o uso da palabra e ningún membro corporativo poderá entrar no salón ou abandonalo.

4 - Ao rematar a votación ordinaria, a Alcaldía-Presidencia declarará o acordado.

5 - Inmediatamente despois de concluír a votación nominal, o secretario/a computará os sufraxios emitidos e anunciará en voz alta o seu resultado, á vista do cal a Alcaldía-Presidencia proclamará o acordo adoptado.

Artigo 115

1 - O Pleno adopta os seus acordos, como regra xeral, por maioría simple dos membros presentes. Existe maioría simple cando os votos afirmativos son máis que os negativos.

2 - Entenderase por maioría absoluta cando os votos afirmativos son máis da metade do número legal dos membros da Corporación.

3 - O voto dos/as concelleiros/as é persoal e indelegable.

Artigo 116

O voto pódese emitir en sentido afirmativo ou negativo, podendo os membros da Corporación absterse de votar.

Para os efectos da votación correspondente, considerarase que se absteñen os membros da Corporación que se ausentasen do salón de sesións unha vez iniciada a deliberación dun asunto e non estivesen presentes no momento da votación. No suposto de que se reintegrasen ao salón de sesións antes da votación poderán, dende logo, tomar parte nela.

No caso de votacións con resultado de empate, efectuarase unha nova votación, e se persistise o empate, decidirá o voto de calidade da/o presidenta/e.

Artigo 117

As votacións poden ser ordinarias, nominais e secretas.

Son ordinarias as que se manifestan por signos convencionais de asentimento, disentimento ou abstención.

Son nominais aquelas votacións que se realizan mediante chamamento por orde alfabética de apelidos e sempre en derradeiro lugar a presidencia, e na que cada membro da Corporación, ao ser chamado, resposta en voz alta ¿si", ¿non" ou ¿abstéñome".

Son secretas as que se realizan por papeleta que cada membro da Corporación vaia depositando nunha urna ou bolsa.

Artigo 118

1 - O sistema normal de votación será a votación ordinaria.

2 - A votación nominal requirirá a solicitude dun grupo municipal aprobada polo Pleno por unha maioría simple en votación ordinaria.

Cada concelleiro/a poderá solicitarlle ao/á secretario/a que faga constar expresamente na acta o sentido en que emitiu o seu voto, para os efectos da súa lexitimación para a impugnación dos acordos que votase en contra.

3 - A votación secreta só se poderá utilizar para elección ou destitución de persoas, para a elección de alcalde ou alcaldesa na sesión constitutiva da Corporación á que fai referencia o artigo 41 do presente regulamento, así como no suposto previsto no artigo 70.1 da Lei 7/1985.

Artigo 119

Logo de proclamarse o acordo, os grupos que non interviñesen no debate ou que logo deste cambiasen o sentido do seu voto, poderán solicitar da presidencia unha rolda de explicación do voto.

Sección 4ª - Do control e fiscalización polo Pleno da actuación dos demais órganos de goberno

Artigo 120

1 - De conformidade co establecido no artigo 22.2 a) da Lei 7/1985, do 2 de abril, reguladora das bases do réxime local, correspóndelle ao Pleno, como atribución non delegable, o control e mais a fiscalización dos órganos de goberno.

O devandito control e fiscalización exercerase a través dos seguintes medios:

a) Coñecemento das resolucións ditadas pola Alcaldía, ou en virtude de delegación, polas concellerías delegadas, desde a última sesión plenaria ordinaria.

b) Formulación de rogos e preguntas.

c) Formulación de mocións.

d) Requirimento de presenza para información e formulación de preguntas de membros corporativos que ostenten delegación.

e) Debate sobre a actuación da Xunta de Goberno Local.

f) Moción de censura ao alcalde ou á alcaldesa.

Artigo 121

Respecto do medio de control recollido na alínea a) do artigo anterior, estarase ao previsto no artigo 47 do presente regulamento.

Artigo 122

Respecto da formulación de rogos e preguntas, estarase ao previsto no artigo 114, alíneas f) e g) do presente regulamento.

Artigo 123.

1 - De conformidade co establecido no artigo 46.2 letra e) da Lei 7/1985, segundo a nova redacción dada pola Lei 11/1999, nos plenos ordinarios, dentro da parte dedicada ao control dos demais órganos da Corporación, garantirase de xeito efectivo a formulación de rogos, preguntas e mocións.

2 - Enténdese por moción non resolutiva, a proposta presentada por un ou varios grupos políticos, ou por un concelleiro ou unha concelleira, se é o caso, para que o Pleno formule unha declaración ou manifeste a súa posición política en relación cun tema de interese municipal ou xeral, relativo ou non ás materias enumeradas nos artigos 25, 26 e 28 da Lei 7/1985, reguladora das bases do réxime local.

Cando a moción sexa subscrita por todos os grupos municipais e concelleiros/as que compoñen a Corporación, a moción non resolutiva será cualificada como declaración institucional.

3 - A moción formulada co devandito carácter de control e fiscalización deberase presentar no Rexistro de Entrada cunha antelación de oito días hábiles anteriores á realización da sesión plenaria ordinaria co fin de se poder recoller na orde do día da convocatoria.

4 - O Pleno deberá tratar se admite debater a moción e en caso afirmativo poderá optar por formular a declaración ou manifestar a súa posición en relación co tema solicitado na mesma sesión e dentro do mesmo punto da orde do día.

No suposto de que sexa admitida, concederáselle a palabra ao autor ou á autora da proposta para explicar as razóns e mais o significado dela.

De seguido intervirá o alcalde ou a alcaldesa, o/a voceiro/a ou o/a concelleiro/a en quen delegue, co fin de que se concreten e aclaren extremos da proposta, se isto for necesario.

Poderán intervir, a seguir, durante cinco minutos cada persoa, todos/a os/as voceiros/as dos grupos políticos integrantes da Corporación, co fin de expoñer os seus puntos de vista con relación á proposta.

Unha vez que se conclúe o debate, a Alcaldía-Presidencia someterá a votación a moción presentada.

Artigo 124

1 - Todo membro da Corporación que por delegación da Alcaldía ostente a responsabilidade dunha área de xestión, estará obrigado a comparecer perante o Pleno, cando este así o acorde, co obxecto de responder ás preguntas que se lles formulen sobre a súa actuación.

2 - Para tal efecto, os membros da Corporación ou grupos municipais a través dos/as seus/súas voceiros/as, poderán formular por escrito requirimento de presenza e comparecencia dos membros corporativos que exerzan delegación. O escrito presentarase polo Rexistro xeral cunha antelación de oito días hábiles anteriores á realización da sesión plenaria ordinaria, co fin de poderse recoller na orde do día da convocatoria. O devandito escrito deberá conter as preguntas concretas das que se require información, e mais o nome do/a concelleiro/a do que se solicita a comparecencia.

3 - Despois de votar favorablemente a comparecencia, a/o concelleira/o afectado poderá dar contestación na mesma sesión e dentro da mesma orde do día, ás preguntas formuladas no escrito.

Neste caso, tras a exposición oral da/o concelleira/o, poderán intervir a/os voceira/os dos grupos municipais da Corporación por un tempo máximo de cinco minutos cada unha/un, co obxecto de aclarar as contestacións dadas polo/a concelleiro/a, fixar posicións ou facer observacións, ás que contestará o/a concelleiro/a, dando por conclusa a comparecencia.

A Presidencia, en casos excepcionais, poderá, por pedimento da Xunta de Portavoces, abrir unha rolda para que as/os concelleiras/os poidan formular preguntas ou pedir aclaracións sobre a información facilitada. A presidencia, para o efecto, fixará un número ou tempo máximo de intervencións.

4 - En caso contrario, a Alcaldía-Presidencia incluirá o asunto na orde do día da primeira sesión ordinaria ou extraordinaria que se realice.

Artigo 125

1 - O Pleno, por proposta da Alcaldía ou mediante solicitude da cuarta parte, cando menos, do número legal dos membros corporativos, poderá acordar a realización de sesión extraordinaria da que o seu obxecto sexa someter a debate a xestión da Xunta de Goberno Local.

2 - O desenvolvemento da sesión á que fai referencia a alínea anterior suxeitarase ao establecido con carácter xeral, intervindo en primeiro lugar a persoa autora da proposta para explicar o significado dela. Contestará un membro da Xunta de Goberno Local designado por esta e, despois de sendas roldas de réplica, poderán intervir os demais grupos políticos da Corporación para formularlles preguntas aos demais membros da Xunta de Goberno Local, que serán contestadas por un ou varios membros da comisión, designados por esta tendo en conta os asuntos sobre os que se formulen as preguntas.

A intervención de cada grupo político para a formulación de preguntas, non excederá os cinco minutos cada un.

As preguntas que se desexen formular deberanse presentar por escrito antes das 15 horas do día anterior ao da realización da sesión para o seu traslado á Xunta de Goberno Local.

O desenvolvemento da sesión axustarase ao establecido no artigo 125 respecto da comparecencia dos/as concelleiros/as-delegados/as.

3 - Como consecuencia do debate poderase presentar unha moción co obxecto de que o Pleno manifeste a súa posición sobre a xestión da Xunta de Goberno Local. Se o Pleno admite debater a moción, esta incluirase na orde do día na seguinte sesión plenaria, ordinaria ou extraordinaria.

4 - Logo de debater a moción no pleno correspondente, o resultado da votación limitarase a manifestar a posición dos grupos políticos da Corporación, sen que con isto se poida pretender facer efectivas responsabilidades civís, penais ou administrativas, das que a súa esixencia ten outras canles procesuais.

Artigo 126

1 - O alcalde ou a alcaldesa pode ser destituído mediante moción de censura, da que a súa presentación, tramitación e votación rexerase polas seguintes normas:

a) A moción de censura deberá ser proposta, polo menos, pola maioría absoluta do número legal dos membros da Corporación, e deberá incluír un candidato á Alcaldía, podendo selo calquera concelleira/o do que a súa aceptación expresa conste no escrito de proposición da moción.

b) O escrito no que se propoña a moción de censura deberá incluír as sinaturas debidamente autenticadas por notario ou polo secretario/a xeral da Corporación e deberase presentar perante este por calquera dos seus asinantes. O secretario/a xeral comprobará que a moción de censura reúne os requisitos esixidos neste artigo e estenderá no mesmo acto a correspondente dilixencia acreditativa.

c) O documento así dilixenciado presentarase no Rexistro xeral da Corporación por calquera dos asinantes da moción, quedando o pleno automaticamente convocado para as doce horas do décimo día hábil seguinte ao do seu rexistro. O secretario/a da Corporación deberá remitirlles notificación indicativa de tal circunstancia a todos os membros dela no prazo máximo dun día, contado dende a presentación do documento no Rexistro, para os efectos da súa asistencia á sesión, especificando a data e hora dela.

d) O Pleno será presidido por unha Mesa de Idade integrada polos/as concelleiros/as de maior e menor idade dos presentes, excluídos o alcalde ou a alcaldesa e mais o candidato á Alcaldía, actuando como secretario/a o que o sexa da Corporación, quen acreditará tal circunstancia.

e) A Mesa limitarase a dar lectura á moción de censura, conceder a palabra durante un tempo breve, se estivesen presentes, ao candidato á Alcaldía, ao alcalde ou alcaldesa e aos/ás voceiros/as dos grupos municipais, e a someter a votación a moción de censura. O tempo de intervención para cada grupo non será superior aos dez minutos.

f) A/O candidata/o incluída na moción de censura quedará proclamado alcalde ou alcaldesa se esta prosperase co voto favorable da maioría absoluta do número legal de concelleiros/as que legalmente compoñan a Corporación.

2 - Ningún concelleiro nin ningunha concelleira pode asinar durante o seu mandato máis dunha moción de censura. Para os devanditos efectos non se tomarán en consideración aquelas mocións que non se tramitasen por non reuniren os requisitos previstos na letra b) da alínea 1 deste artigo.

3 - A dimisión sobrevida do alcalde ou da alcaldesa non suspenderá a tramitación e votación da moción de censura.

4 - O alcalde ou a alcaldesa, no exercicio das súas competencias, está obrigado a impedir calquera acto que perturbe, obstaculice ou impida o dereito dos membros da Corporación a asistir á sesión plenaria na que se vote a moción de censura e a exercer o seu dereito ao voto nela. En especial, non son de aplicación á moción de censura as causas de abstención e recusación previstas na lexislación do procedemento administrativo.

Artigo 127

En relación coa cuestión de confianza que pode formular a Alcaldía ao Pleno, estarase ao previsto no artigo 197 bis da Lei Orgánica 8/1999, do 21 de abril, de modificación da Lei Orgánica 5/1985, do 19 de xuño, do réxime electoral xeral.

Sección 5ª - Das actas

Artigo 128

1 - De cada sesión a/o secretaria/o estenderá acta na que deberá constar:

a) Lugar da reunión, con expresión do nome do municipio e local no que ten lugar.

b) Día, mes e ano.

c) Hora na que comeza.

d) Nome e apelidos da presidencia, dos membros da Corporación presentes, dos ausentes que se escusasen e dos que faltan sen escusa.

e) Carácter ordinario ou extraordinario da sesión, e se ten lugar en primeira ou segunda convocatoria.

f) Asistencia da/o secretaria/0, ou de quen legalmente o substitúa, e presenza do funcionario/a responsable da Intervención, cando concorra.

g) Asuntos que examinen, opinións sintetizadas dos grupos ou membros da Corporación que interviñesen nas deliberacións e incidencias destas.

Cando un membro da Corporación desexe que a súa intervención conste na acta coa extensión ou precisión que considere de interese, manifestarao no momento de iniciar a exposición, e, concluída a sesión, entregaralle á/ao secretaria/o unha copia dela para que sexa recollida na acta.

No caso contrario, o secretario/a non ten a obriga de recoller literalmente as manifestacións efectuadas no transcurso da sesión, senón, como se fixo constar anteriormente, dunha forma sintetizada.

h) Votacións que se verifiquen e no caso das nominais o sentido no que cada membro emita o seu voto. Nas votacións ordinarias farase constar o número dos votos afirmativos, dos negativos e das abstencións. Farase constar nominalmente o sentido do voto cando así o pedisen as persoas interesadas.

i) Parte dispositiva dos acordos que se adopten.

l) Cantos incidentes se produzan durante o acto e fosen dignos de se recoller a xuízo do/a secretario/a.

m) Hora na que a presidencia levante a sesión.

2 - De non se realizar a sesión por falta de asistentes, ou por outro motivo, o/a secretario/a suplirá a acta cunha dilixencia autorizada coa súa sinatura, na que consigne a causa e mais os nomes dos concorrentes e dos que escusasen a súa asistencia.

3 - As sesións dos plenos serán gravadas en cintas e permanecerán na Secretaría ata que sexa aprobada a acta da sesión correspondente. Durante este tempo poderán ser escoitadas por calquera membro da Corporación, logo da solicitude ao/á secretario/a. A responsabilidade da custodia das cintas rematará unha vez aprobadas as actas das sesións gravadas.

Artigo 129

1 - As actas redactaranse en galego.

2 - A acta, unha vez aprobada polo Pleno, transcribirase no libro de actas autorizándoa coas sinaturas do alcalde ou da alcaldesa e do/a secretario/a.

Estas normas aplicaranse para o libro de actas do Pleno, Xunta de Goberno Local e Resolucións da Alcaldía.

Artigo 130

1 - A Xunta de Goberno Local realizará sesión constitutiva, por convocatoria da Alcaldía, dentro dos dez días seguintes a aquel no que este designase os membros que a integran.

2 - A Comisión, para exercer as súas competencias resolutorias, realizará sesións ordinarias coa periodicidade determinada polo Pleno da Corporación, tal e como se establece no artigo 42.a) o presente regulamento, e, como mínimo, cada 15 días.

Correspóndelle á Alcaldía fixar, mediante a correspondente convocatoria, o día e hora no que se debe realizar a sesión ordinaria.

3 - As sesións extraordinarias e mais as urxentes terán lugar cando, con tal carácter, sexan convocadas pola Alcaldía.

4 - A Alcaldía poderá en calquera intre reunir á Xunta de Goberno Local cando considere necesario coñecer o seu parecer ou pedir a súa asistencia con anterioridade a ditar resolucións no exercicio das atribucións que lle corresponden.

5 - Malia o anterior, as sesións da Xunta de Goberno Local poderán ter carácter mixto, é dicir, poderán ser resolutivas e deliberantes ou de asistencia.

Para tal efecto, a Alcaldía poderá introducir como derradeiro punto da orde do día, nas sesións ordinarias, o de ¿ditames da Xunta de Goberno Local.

6 - As sesións celebraranse no salón de sesións da Casa do Concello, agás nos supostos de forza maior.

Artigo 131

1 - As sesións da Xunta de Goberno Local axustaranse ao establecido para o Pleno nos artigos anteriores, coas modificacións seguintes:

a) Entre a convocatoria e a realización da sesión non poderán transcorrer menos de vinte e catro horas, agás no caso das sesións extraordinarias e urxentes nas que, antes de entrar a coñecer os asuntos incluídos na orde do día, deberá ser declarada a urxencia por acordo favorable da maioría dos membros.

b) As sesións da Xunta de Goberno Local non son públicas, sen prexuízo da publicidade e comunicación ás administracións estatal e autonómica dos acordos adoptados. Ademais, no prazo de dez días deberase enviar a todos os membros da Corporación copia da acta.

c) Para a válida constitución da Xunta de Goberno Local requírese a asistencia da maioría absoluta dos seus compoñentes. Se non existise quórum, constituirase en segunda convocatoria, unha hora despois da sinalada para a primeira, sendo suficiente a asistencia da terceira parte dos seus membros e, en todo caso, un número non inferior a tres.

d) A Alcaldía ou Presidencia dirixe e ordena ao seu prudente arbitrio os debates no seo da Comisión.

e) Nos casos nos que a Xunta de Goberno Local exerza competencias delegadas polo Pleno, será preceptivo o ditame previo da Comisión Informativa correspondente, ademais de darlle conta ao Pleno tamén na primeira sesión que se realice, tal e como se establece no artigo 67 do presente regulamento.

f) As actas das sesións da Xunta de Goberno Local transcribiranse en libro distinto do das sesións do Pleno.

2 - A Xunta de Goberno Local, nas súas reunións deliberantes, non poderá adoptar ningún acordo, formalizándose o resultado das deliberacións se é o caso, en forma de ditames nos termos do artigo 114 a) do presente regulamento.

3 - Tanto nas sesións como nas reunións da Xunta de Goberno Local, a Alcaldía ou Presidencia poderá requirir a presenza de membros da Corporación non pertencentes á Xunta de Goberno Local, ou de persoal ao servizo da entidade, co obxecto de emitir informe no relativo ao ámbito das súas actividades.

4 - Cando a Xunta de Goberno Local exerza competencias delegadas polo Pleno ou que lle fosen asignadas polas leis, adoptará os seus acordos mediante votación formal, segundo as normas establecidas no presente regulamento.

Artigo 132

1 - As Comisións Informativas Permanentes e de seguimento e control realizarán sesións ordinarias coa periodicidade que acorde o Pleno no momento de constituílas tal e como se establece nos artigos 42 b) e 80 do presente regulamento, nos días e horas que estableza a Alcaldía, ou a súa respectiva presidencia, as que poderán así mesmo, convocar sesións extraordinarias ou urxentes delas.

Teñen carácter de sesións ordinarias das Comisións Informativas Permanentes, as que se convoquen para ditaminar os asuntos que deban incluírse na sesión ordinaria do Pleno correspondente.

As Comisións Informativas ordinarias reuniranse cunha antelación de 48 horas, como mínimo, á correspondente sesión ordinaria do Pleno.

A Alcaldía ou a Presidencia da comisión estará obrigada a convocar sesión extraordinaria cando o solicite a cuarta parte, cando menos, dos membros da Comisión. Neste caso, o mesmo que no suposto das sesións ordinarias ou extraordinarias urxentes, polo que respecta á orde do día, aplicarase o disposto no artigo 100 do presente regulamento.

De non efectuarse a convocatoria da sesión extraordinaria solicitada, estarase ao previsto para o pleno no artigo 96 do presente regulamento.

2 - As sesións realizaranse normalmente no salón de sesións da Casa do Concello, ou ben na dependencia dela que se sinale na convocatoria.

3 - As convocatorias correspóndenlle á Alcaldía, agás no suposto de delegación da presidencia, de conformidade co artigo 81 a) do presente regulamento, e deberanlles ser notificadas aos membros da Comisión cunha antelación de 48 días horas, salvo as urxentes. En todo caso, acompañarase a orde do día e mais os ficheiros electrónicos dos asuntos que se van tratar, sempre que sexa posible.

4 - Élles de aplicación ás Comisións Informativas Especiais o establecido nos parágrafos anteriores.

Artigo 133

Respecto da comisión informativa de seguimento da xestión da Alcaldía, Xunta de Goberno Local e concellerías que exerzan delegacións, e tendo en conta a devandita función de seguimento que lles foi atribuída polo artigo 20.1 c) da Lei 11/1999, do 21 de abril, na orde do día das sesións ordinarias, logo dos asuntos respecto dos que se deban emitir os correspondentes ditames, incluirase o punto de rogos e preguntas. A presidencia poderá limitar ata un máximo de seis os rogos e preguntas que presente un grupo municipal para cada comisión informativa.

Tamén resulta de aplicación o establecido respecto da comparecencia das/os concelleiros/as delegados nas materias propias das Comisións Informativas Permanentes correspondentes.

Artigo 134

1 - A válida realización das sesións require a presenza da maioría absoluta dos compoñentes da comisión, xa sexan titulares ou suplentes, na primeira convocatoria e un mínimo de tres membros na segunda convocatoria unha hora máis tarde. Se a representación é igualitaria, a que represente a maioría absoluta.

Actuará como secretario/a das comisións o que o sexa da Corporación, coa posibilidade que que poida delegalo noutro/a funcionario/a. Da devandita delegación darase conta ao Pleno na primeira sesión que se realice.

2 - A presidencia dirixe e ordena, ao seu prudente arbitrio, respectando os principios xerais que rexen os debates plenarios, os debates da comisión.

3 - Os ditames aprobaranse sempre por maioría simple dos presentes, decidindo os empates a presidencia con voto de calidade.

Artigo 135

1 - Ningunha comisión poderá deliberar sobre asuntos da competencia doutra, a non ser que se trate de problemas comúns, e neste caso poderá convocarse pola Presidencia da Corporación, por proposta das respectivas comisións, unha sesión conxunta.

2 - O ditame da comisión poderá limitarse a mostrar a súa conformidade coa proposta que lle sexa sometida polos servizos administrativos competentes ou ben formular unha alternativa.

3 - Os membros da comisión que discorden do ditame aprobado por esta, poderán pedir que conste o seu voto en contra ou formular voto particular para a súa defensa ante o Pleno.

Artigo 136

Os ditames das comisións informativas teñen carácter preceptivo e non vinculante.

Esta norma non é de aplicación no suposto de plenos extraordinarios urxentes e mocións presentadas fóra da orde do día.

Non obstante, nestes casos, do acordo adoptado deberase dar conta á comisión informativa na primeira sesión que se realice. Por proposta de calquera dos membros da comisión informativa, o asunto deberá ser incluído na orde do día do seguinte pleno co obxecto de que este delibere sobre a urxencia acordada, no exercicio das súas atribucións de control e fiscalización.

Artigo 137

1 - A presidencia de cada comisión poderá requirir a presenza, nas súas sesións, do persoal ou membros da Corporación para efectos informativos.

Ás sesións da Comisión de Facenda asistirá, en todo caso, a persoa funcionaria responsable da Intervención.

2 - De cada sesión das comisións informativas levantarase acta na que consten os extremos aos que se refiren as alíneas a), b), c), d), e), f), g), h), e m), do artigo 132.1 do presente regulamento e á que se achegarán os ditames que fosen aprobados e mais os votos particulares que lles fosen formulados a aqueles.

3 - As sesións non son públicas, non obstante, a Alcaldía ou Presidencia da comisión poderá convocar, para os efectos de escoitar o seu parecer ou recibir o seu informe respecto dun tema concreto, ás persoas representantes das asociacións ou entidades ás que se refire o artigo 255 da Lei 5/1997.

Artigo 138

O previsto nos artigos anteriores resulta igualmente de aplicación ás comisións informativas especiais.

Artigo 139

1 -A Comisión Especial de Contas funcionará do mesmo xeito que as demais comisións informativas permanentes.

2 - De conformidade co establecido no artigo 212.3 da Lei 5/1997, a Comisión Especial de Contas terá que reunirse antes do día 1 de xuño de cada ano, para emitir o informe preceptivo sobre as contas anuais do concello.

As contas e mais a documentación complementaria estarán ao dispor dos membros da comisión para examinalas e consultalas, como mínimo, quince días antes da reunión.

Artigo 140

En todo o non previsto neste capítulo, serán de aplicación as disposicións sobre o funcionamento do Pleno.

Artigo 141

1 - O Pleno da Corporación poderá acordar a súa constitución, coas formalidades, integración e obxecto que figuran nos artigos 88 a 93 do presente regulamento.

2 - A Xunta de Portavoces configurase como órgano de consulta e de asistencia á Alcaldía.

Artigo 142

Respecto do seu funcionamento, estarase ao establecido para as comisións informativas, tendo en conta que, como órgano deliberante, nas súas reunións non se poderá adoptar acordo ningún, formalizándose o resultado das deliberacións, se é o caso, en forma de ditames con propostas de actuación, establecemento de directrices, pautas ou aclarando cuestións de interese municipal co fin de acadar unha liña de actuación común.

As reunións non son públicas.

No non previsto neste regulamento, estarase ao previsto na Lei 7/1985, do 2 de abril, reguladora das bases do réxime local, Lei 5/1997, do 22 de xullo, da Administración local de Galicia, e Regulamento de organización, funcionamento e réxime xurídico das entidades locais.

O regulamento non dispón a súa entrada en vigor, pero se debe ter en conta que o artigo 70.2 da Lei 7/1985, de 2 de abril , reguladora das Bases do Réxime Local establece que:

¿¿..Las ordenanzas, incluídos el articulado de las normas de los planes urbanísticos, así como los acuerdos correspondientes a éstos cuya aprobación definitiva sea competencia de los entes locales, se publicarán en el ¿Boletín Oficial" de la provincia y no entrarán en vigor hasta que se haya publicado completamente su texto y haya transcurrido el plazo previsto en el artículo 65.2 salvo los presupuestos y las ordenanzas fiscales que se publican y entran en vigor en los términos establecidos en la Ley 39/1988, de 28 de diciembre, Reguladora de las Haciendas Locales....." (desde el 10 de marzo de 2004 RDL 2/2004, de 5 de marzo).

Artigo 65.2: ¿El requerimiento deberá ser motivado y expresar la normativa que se estime vulnerada. Se formulará en el plazo de quince días hábiles a partir de la recepción de la comunicación del acuerdo."