Val do Dubra - Regulamento núm. 15, da selección de personal funcionario interino e laboral temporal

O obxecto do presente regulamento é a regulación da cobertura temporal de prazas vacantes tanto de persoal funcionario, como de persoal laboral do Concello de Val do Dubra, con funcionarios interinos e con persoal laboral temporal, nos casos previstos legalmente, así como a contratación de persoal laboral temporal nos demais supostos permitidos pola normativa vixente. En particular a recollida nos artigos 10 e 11 do Estatuto básico do empregado público, Lei 7/2007 do 12 de abril. Non será de aplicación nos casos en que, para a tal cobertura temporal, polo órgano competente do Concello se acorde a celebración de probas selectivas específicas.

Para facer efectivo o sistema de cobertura, nos tres meses seguintes á finalización dos procesos selectivos correspondentes á última oferta pública de emprego, de acceso ós corpos, escalas, subescalas e/ou categorías, incluídos na dita oferta, por resolución da presidencia do Concello aprobarase a convocatoria para a elaboración de listas de aspirantes para cada unha das prazas e/ou contratacións laborais temporais que se conte que poidan producirse, que se publicará no Boletín Oficial da Provincia, a fin de que, no prazo de vinte días naturais, a partir do seguinte ó da tal publicación, os interesados presenten as súas instancias, acompañadas da documentación que acredite a titulación e os demais requisitos esixidos para desempeñar a praza ou prazas ás que opten e os méritos que, de conformidade co baremo que se fixa no presente regulamento, desexen que se lles teñan en conta. A convocatoria establecerá a denominación e características e requisitos das prazas e a titulación esixible para o acceso a elas.

As solicitudes presentaranse, dentro do prazo sinalado para tal efecto, no rexistro xeral do Concello ou na forma prevista no art. 38.4 da Lei 30/1992, do 26 de novembro, do Réxime Xurídico das Administracións Públicas e do Procedemento Administrativo Común, no modelo oficial establecido para tal efecto, que se facilitará nas oficinas municipais, acompañando acreditación documental dos méritos que se aleguen e que teñan relación coa praza ou prazas convocadas.

 Rematado o prazo de presentación de solicitudes, cos aspirantes que cumpran os requisitos que para cada caso se establezan, formaranse as correspondentes listas unitarias para cada praza de categoría igual e/ou asimilada, con independencia do carácter funcionarial ou laboral da mesma, podendo fixarse un número máximo de compoñentes de cada lista, en función do número de instancias presentadas e do de prazas que se prevea que poidan chegar a producirse.

Para a elaboración das listas nomearase por resolución da Presidencia unha comisión permanente de selección, que terá a seguinte composición:

Unha vez elaboradas as listas pola comisión permanente de selección, elevaranse á Presidencia do Concello, que as aprobará por resolución e, unha vez aprobadas, expoñeranse no taboleiro de anuncios da Corporación. Contra a resolución aprobatoria das listas, que esgotará a vía administrativa, poderá interpoñerse recurso contencioso-administrativo, segundo o disposto na normativa vixente.

O nomeamento e cesamento do persoal funcionario interino e do contratado laboral temporal, realizaranse de conformidade coa lexislación vixente aplicable en cada caso.

As listas renovaranse despois de que se resolvan as convocatorias de acceso ós corpos, escalas, subescalas e/ou categorías, incluídos na oferta pública de emprego correspondente, a que se refiran as tales convocatorias, perdendo validez as que ata entón estiveran vixentes, pero sen que iso afecte ó persoal nomeado en virtude das mesmas e durante a súa vixencia.

 O baremo aplicable para a valoración dos méritos será o seguinte:

Para a selección do persoal funcionario interino e laboral temporal de carácter docente acudirase, como única forma de provisión das prazas correspondentes, á relación baremada que a Consellería de Educación e Ordenación Universitaria ten para tal fin, sendo chamados os aspirantes por rigorosa orde de puntuación e segundo as normas que rexen na dita Consellería.

No suposto de que non fose posible identificar ó persoal que tivera que ser destituido, con motivo da provisión definitiva da praza ou pola amortización da mesma, terá preferencia para permanece-lo aspirante que tivera mellor orde de prelación na lista correspondente; e se non puidera facerse efectiva esta regra, por procede-lo persoal de que se trate de distintas listas, terán preferencia para permanecer os das listas máis antigas no tempo.

Á entrada en vigor do presente regulamento, quedarán sen efecto tódalas listas de aspirantes para o seu nomeamento como funcionarios interinos ou como contratados laborais temporais, que en tal momento se encontrasen vixentes.

O presente regulamento entrará en vigor ó día seguinte do prazo establecido no artigo 70.2, en relación ó 65.2, da Lei 7/85 de Bases do Réxime Local.