Esta ordenanza ten por obxecto regular a constitución e funcionamento da ¿Bolsa de Emprego do Concello de Vimianzo". Está ideada para prestar un servizo de intermediación laboral a todas as persoas empadroadas no municipio, que sexan poboación activa, e proporcionar información a través dos medios de comunicación dispoñibles, das ofertas de emprego e outros asuntos en materia de recursos humanos e promoción económica que se reciben no Servizo de Emprego e Desenvolvemento Local, para iso, todos os departamentos do Concello de Vimianzo canalizarán por esa vía as ofertas de emprego que xeneren ou das que teñan coñecemento.

Artigo 2. Ámbito de aplicación.

Poderán ser beneficiarias dos servizos da Bolsa de Emprego do Concello de Vimianzo:

a) Como demandantes de emprego: as persoas empadroadas en Vimianzo que se atopen sen emprego, que desexen mellorar a súa situación laboral ou que pertenzan a colectivos, especialmente estudiantes, que se están preparando para introducirse no mercado de traballo.

b) Como ofertantes de emprego: particulares, empresas e institucións que abran procesos de recrutamento de persoal.

Artigo 3. Definición.

A Bolsa de Emprego do Concello de Vimianzo existe co fin de constituír unha base de datos das persoas desempregadas e das que desexen mellorar a súa situación laboral, de xestionar ofertas de emprego que se reciban no Servizo de Emprego e Desenvolvemento Local e de divulgar información de interese entre as persoas inscritas en materia de recursos humanos e promoción económica.

Artigo 4. Requisitos das persoas aspirantes.

Son requisitos para formar parte da Bolsa de Emprego do Concello de Vimianzo:

a) Ser maior de dezaseis anos. No caso de que a persoa demandante de emprego non teña a maioría de idade a solicitude deberá ir asinada polo representante legal ou titor/-a da persoa solicitante.

b) Estar empadroado en Vimianzo

c) No caso de persoas estranxeiras, deberán estar en posesión do correspondente permiso de residencia e traballo.

Artigo 5. Inscricións.

A inscrición realízase en modelo normalizado que figura como anexo I desta ordenanza, que ao efecto se lle entregará ao interesado, ou ben pode descargarse na páxina web do Concello de Vimianzo (impreso de inscrición).

Unha vez cumprimentada e acompañada da documentación esixida, presentarase no Rexistro do Concello de Vimianzo, dirixida ao Servizo de Emprego e Desenvolvemento Local, e desde ese departamento asinaráselle un número de rexistro de usuario.

Este trámite poderá realizarse a través de administración electrónica cando estea habilitado na web www.vimianzo.es.

No caso de persoas menores de idade ou con discapacidade psíquica, a inscrición debe estar asinada polo representante legal.

Artigo 6. Documentación esixida.

Xunto coa solicitude de inscrición orixinal presentarase a seguinte documentación, en orixinais ou fotocopias compulsadas, se é o caso:

- Documento de identidade

- Tarxeta de demandante de emprego

- Curriculum Vitae (CV)

- Permiso de residencia e traballo, no caso de persoas estranxeiras que o necesiten

- Documentos que acrediten a formación regrada e non regrada

- Documentos que acrediten a experiencia laboral, incluíndo en todo caso o informe de vida laboral e contratos de traballo ou última nómina.

- Carnés profesionais e permisos de conducir

- Outra á que faga referencia o CV.

Artigo 7. Funcionamento da Bolsa de Emprego do Concello de Vimianzo.

A atención ao público da Bolsa de Emprego realizarase de luns a venres, dentro dos horarios das oficinas municipais.

Calquera variación dos datos achegados á Bolsa de Emprego deberá comunicarse presentando a través do Rexistro o impreso de modificación, recollido no anexo II desta ordenanza, acompañado da documentación oportuna.

A persoa inscrita ten a obriga de comunicar ao Servizo de Emprego e Desenvolvemento Local a modificación das súas circunstancias laborais, e de aqueles datos que integren o seu expediente persoal.

Artigo 8. Expediente persoal.

Estará formado polo impreso de solicitude, a documentación achegada inicialmente e as posteriores modificacións. Ademais, incorporaranse os datos referidos ás xestiosn que se realicen sobre o expediente desde a Bolsa de Emprego.

Artigo 9. Actualizacións das solicitudes.

A inscrición na Bolsa de Emprego ten vixencia de 24 meses, pasados os cales se deberá renovar, empregando o impreso que figura no anexo II desta ordenanza.

Artigo 10. Baixas na Bolsa de Emprego.

Se a persoa inscrita, por calquera motivo, quere darse de baixa na Bolsa de Emprego, deberá solicitala polos mesmos medios establecidos para a inscrición, empregando o impreso do anexo II.

Artigo 11. Xestión das ofertas de emprego.

Os empregadores que soliciten candidatos á Bolsa de Emprego deberán encher o impreso de oferta de emprego, que figura no anexo III e que se publicará na web do Concello de Vimianzo, indicando o perfil solicitado dos aspirantes e remitila por correo electrónico, plataforma web, fax ou personándose no Servizo de Emprego e Desenvolvemento Local no horario estipulado no artigo 7 desta ordenanza.

A empresa indicará o modo en que desexa que se xestione a súa oferta: solicitude de listaxe de candidatos e/ou publicidade nos medios da Bolsa de Emprego.

Unha vez recibida a oferta de emprego, asignaráselle un número de rexistro de oferta para o seu control e arquivo.

a) Solicitude de candidatos. A elaboración da listaxe de candidatos realizarase tendo en conta o perfil solicitado polo ofertante. Á empresa remitiráselle o impreso de comunicación de candidatos (anexo IV desta ordenanza) acompañada da listaxe que incluirá nome e apelidos e datos de contacto.

O ofertante de emprego, unha vez recibidos os datos, deberá encargarse de realizar a selección poñéndose en contacto cos candidatos incluídos na lista.

b) Publicidade nos medios da Bolsa de Emprego. Cos datos recollidos no impreso do anexo III desde a Bolsa de Emprego elabórase un anuncio que se pode dar a coñecer na web municipal, nos boletíns informativos e no taboleiro. Outro medio son as mensaxes SMS, cuxo custe se repercutiría ao ofertante, no caso de que solicitase esta modalidade de divulgación.

O ofertante, independentemente da modalidade de xestión da súa oferta, deberá notificar á Bolsa de Emprego o resultado do proceso de selección, empregando o impreso do anexo IV.

O proceso de xestión da oferta, desde a súa recepción ata o envío da lista e/u publicitación non será superior a catro días hábiles, o que permitirá aos ofertantes dispoñer de candidatos de forma rápida e sinxela.

Artigo 12. Procesos selectivos do Concello de Vimianzo.

Comunicarase ás persoas inscritas na Bolsa de Emprego a apertura dos procesos selectivos do Concello de Vimianzo. A documentación que figure nesta Bolsa de Emprego poderá ser empregada nos procesos de selección de persoal laboral temporal do Concello de Vimianzo, complementándoa e actualizándoa en función das bases de cada proceso selectivo.

Artigo 13. Protección de datos.

Segundo a Lei Orgánica 15/1999, do 13 de decembro, de Protección de Datos de carácter Persoal, os datos que incorpore o usuario neste ficheiro serán destinados para a finalidade descrita anteriormente, sendo o responsable do ficheiro o Concello de Vimianzo, ante o que se deben exercer os dereitos de acceso, oposición, rectificación e cancelación dos datos de carácter persoal.

Os datos de carácter persoal serán tratados co grao de protección adecuado, segundo o real Decreto 944/1999, de 11 de xuño, tomándose as medidas de seguridade necesarias para evitar a alteración, perda, tratamento ou acceso non autorizado por parte de terceiros que o poidan empregar para finalidades distintas ás desexadas polo usuario. Non está permitida a cesión de outros datos e a outras entidades diferentes do ao que se contempla nesta ordenanza.

Disposición derrogatoria.

Queda derrogado o ¿Documento marco sobre o Servicio Municipal de Emprego. Creación dun censo de desempregados no concello de Vimianzo. Bolsa de emprego temporal no Concello de Vimianzo. Regras xerais de selección do persoal laboral temporal por este Concello de Vimianzo", publicado no Boletin Oficial da Provincia da Coruña nº 13 de 13/01/2002.

Disposición final

A presente Ordenanza entrará en vigor unha vez publicado o seu texto íntegro no Boletín Oficial da Provincia, trancorrido o plazo previsto no artigo 65.2 da Lei Reguladora das Bases do Réxime Local.