Abegondo - REGULAMENTO ORGÁNICO MUNICIPAL DO CONCELLO DE ABEGONDO

Artigo 1. O Concello de Abegondo, exercendo a potestade regulamentaria e de autoorganización que outorgan os artigos 4 e 20.3 da Lei 7/1985, de 2 de abril, reguladora das bases de réxime local, o artigo 24.b) do Real decreto 781/1986, de 18 de abril, polo que se aproba o texto refundido das disposicións legais vixentes en materia de réxime local, e o artigo 4 do Real decreto 2568/1986, de 28 de novembro, polo que se aproba o Regulamento de organización, funcionamento e réxime xurídico das entidades locais, regula a organización e o réxime de funcionamento do Concello, Lei 5/1997, de 22 de xullo, de administración local de Galicia (LALGA).

Artigo 2. O presente Regulamento ten por obxecto regular a organización e o réxime de funcionamento dos órganos de goberno e administración deste municipio.

Artigo 3. Os preceptos deste regulamento aplicaranse preferentemente sempre que non vaian en contra de disposicións de rango legal que sexan de obrigado cumprimento, tendo en conta que a Lei 7/1985, de 2 de abril, reguladora das bases do réxime local, ten carácter básico, e, igualmente, os artigos 1, 2, 3.2, 12, 13, 14, 15, 16, 18, 22, inciso primeiro, 25, 26, 34, 48, 49, 50, 52, 54, 56, 57, 58, 59, 69 e 71 do Real decreto lexislativo 781/1986, de 18 de abril, polo que se aproba o texto refundido das disposicións legais vixentes en materia de réxime local.

A Lei 5/1997, de 22 de xullo, de administración local de Galicia (LALGA) establecerá a organización municipal complementaria á prevista na lexislación estatal.

Artigo 4. O Concello ten a potestade de goberno e administración municipal, sendo órganos necesarios do Concello:

◊ O alcalde/A alcaldesa

◊ As e os tenentes de Alcaldía

◊ O Pleno

◊ A Xunta de Goberno Local

◊ A Comisión Especial de Contas

Son órganos complementarios do Concello:

As concelleiras e concelleiros delegados

As Comisións Informativas

A Comisión de Coordinación Municipal

Artigo 5. A adquisición da condición de membro da Corporación, a determinación do número de persoas que a comporán, o procedemento de elección, a duración do mandato e os supostos de inelexibilidade e incompatibilidade son os regulados na lexislación estatal, en concreto na Lei orgánica 5/1985, de 19 de xuño, do réxime electoral xeral, na Lei 7/1985, de 2 de abril, reguladora das bases de réxime local, e no Real decreto 2568/1986, 28 novembro, polo que se aproba o Regulamento de organización, funcionamento e réxime xurídico das entidades locais.

Artigo 6. As candidaturas que se presenten para as eleccións municipais deberán ter nos termos do artigo 44 bis da Lei orgánica 5/1985, de 19 de xuño, do réxime electoral xeral, unha composición equilibrada de mulleres e homes, de forma que no conxunto da lista as persoas candidatas de cada un dos sexos supoñan como mínimo o corenta por cento. Cando o número de postos a cubrir sexa inferior a cinco, a proporción de mulleres e homes será o máis próxima posible ao equilibrio numérico.

Artigo 7. As concelleiras e concelleiros electos deberán presentar a credencial ante a Secretaría Xeral e realizar a declaración sobre causas de posible incompatibilidade e sobre calquera actividade que lles proporcione ou poida proporcionar ingresos económicos. Formularán, así mesmo, declaración dos seus bens patrimoniais, que se realizará antes da toma de posesión do cargo.

Artigo 8. O concelleiro ou concelleira perderá a súa condición de tal:

¿ Por decisión xudicial firme, que anule a elección ou proclamación.

¿ Por falecemento ou incapacitación, declarada por decisión xudicial firme.

¿ Por extinción do mandato ao expirar o prazo deste, sen prexuízo de que continúe nas súas funcións soamente para a administración ordinaria até a toma de posesión das concelleiras e dos concelleiros sucesores.

¿ Por renuncia, que deberá facerse efectiva ante o Pleno da Corporación.

¿ Por incompatibilidade, nos supostos e condicións establecidos na lexislación electoral.

¿ Por perda da nacionalidade española.

Artigo 9. As persoas membros da Corporación local gozan, unha vez que tomen posesión do cargo, das honras, prerrogativas e distincións propios deste que se establezan nas leis estatais e nas que as desenvolvan, e están obrigados ao cumprimento estrito dos seus deberes e obrigacións inherentes naquel.

As concelleiras e os concelleiros electos obterán do Concello de Abegondo o certificado de sinatura electrónica avanzada para as súas relacións coa Corporación, e se elixe a notificación por medios electrónicos como preferente, facilitará o enderezo de correo electrónico ao que se enviarán todas as notificacións que lles afecten.

Artigo 10. As persoas membros das Corporacións locais teñen o dereito e o deber de asistir, con voz e voto, ás sesións do Pleno e ás daqueloutros órganos colexiados dos que formen parte, salvo xusta causa que llo impida, que deberán comunicar coa antelación necesaria ao presidente da Corporación.

As ausencias de cada membro da Corporación do termo municipal que sexan superiores a oito días deberán comunicarse ao alcalde ou alcaldesa, facéndoo por escrito, ben persoalmente ou por medio do voceiro do grupo político, concretando a duración previsible da ausencia.

Artigo 11. As persoas membros das Corporacións Locais teñen dereito a recibir retribucións polo exercicio dos seus cargos cando os desempeñen con dedicación parcial ou exclusiva.

Se a dedicación é exclusiva, serán dados de alta na Seguridade Social, asumindo a Corporación o pagamento das cotas empresariais que corresponda. O recoñecemento da dedicación exclusiva dunha persoa membro da Corporación esixirá a dedicación preferente ás tarefas propias do seu cargo. En todo caso, o resto de dedicacións serán marxinais e en caso de ser remuneradas deberá obter por parte do Pleno dunha declaración formal de compatibilidade.

Artigo 12. Todos os concelleiros e concelleiras teñen dereito a obter os datos, informes e documentos que teñan no seu poder ou dos que dispoñan os órganos e servizos da Corporación e que sexan necesarios para o cumprimento das súas funcións e, especificamente, para a función de control e fiscalización dos órganos de goberno ou da administración municipal. Cada membro da Corporación será responsable do uso que realice da información á que acceda por razón do seu cargo.

O acceso dos concelleiros e das concelleiras ás informacións será solicitado a través dun escrito dirixido á Alcaldía e nel serán especificados os documentos ou expedientes que son obxecto de demanda.

A documentación será entregada aos/ás solicitantes no prazo de cinco días naturais desde que fose presentado o escrito de solicitude.

Artigo 13. Sen necesidade de que cada membro da Corporación estea autorizado/a, os servizos administrativos municipais estarán obrigados a facilitar a información solicitada, nos seguintes casos:

¿ Cando se trate do acceso das persoas membros da Corporación que ostenten delegacións ou responsabilidades de xestión á información propia destas.

¿ Cando se trate do acceso de calquera persoa membro da Corporación á información e documentación correspondente aos asuntos que haxan de ser tratados polos órganos colexiados de que formen parte, así como ás resolucións ou acordos adoptados por calquera órgano municipal.

¿ Cando se trate do acceso de membros da Corporación á información ou documentación da entidade local que sexa de libre acceso para a cidadanía.

Artigo 14. A consulta e o exame concreto dos expedientes, libros e documentación estará rexido polas seguintes normas:

¿ A consulta xeral de calquera expediente ou antecedentes documentais poderá realizarse, ben no arquivo xeral ou na dependencia onde se atope, ben mediante entrega destes ou de copia a cada membro da Corporación interesado/a para que poida examinalos no despacho ou salas reservadas ás persoas membros da Corporación.

¿ En ningún caso os expedientes, libros ou documentación poderán saír da Casa do Concello, ou das correspondentes dependencias e oficinas locais.

¿ A consulta dos Libros de Actas e os Libros de Resolucións do Presidente deberá efectuarse no arquivo ou na Secretaría Xeral.

¿ O exame de expedientes sometidos a sesión poderá facerse unicamente no lugar en que se atopen de manifesto a partir da convocatoria.

As persoas membros da Corporación teñen o deber de gardar reserva en relación as informacións que lles faciliten para facer posible o desenvolvemento da súa función.

Artigo 15. As concelleiras e os concelleiros non poderán invocar ou facer uso da súa condición para o exercicio de calquera actividade mercantil, industrial ou profesional.

Artigo 16. Todos os concelleiros e concelleiras da Corporación disporán na Casa do Concello dunha caixa de correo e unha conta de correo electrónico para a correspondencia oficial interior e a de procedencia externa para os usos relacionados coa súa xestión municipal e para recibir convocatorias e acceder á información de forma telemática, en canto sexa habilitada.

Artigo 17. As persoas membros da Corporación local deben constituírse en grupos para poder actuar na vida desta. Cada grupo terá un mínimo de non inferior a dous compoñentes. Ningún concelleiro nin concelleira poderá pertencer a máis dun grupo municipal. En ningún caso poden constituírse en grupo municipal separado as concelleiras e os concelleiros que pertenzan á mesma lista electoral.

Artigo 18. Os grupos políticos constituiranse mediante escrito que se dirixirá ao/á presidente/a e subscrito por todos as persoas que o integren, que se presentará na Secretaría Xeral da Corporación dentro dos cinco días hábiles seguintes á constitución da Corporación.

No mesmo escrito de constitución farase constar a designación de voceiro/a do grupo, podendo designarse tamén suplentes.

Artigo 19.

19.1.- Da constitución dos grupos políticos e das persoas que os integran e voceiros/as, o/a presidente/a dará conta ao Pleno na primeira sesión que se celebre tras cumprirse o prazo previsto no apartado anterior.

19.2.- As persoas membros das corporacións locais que non se integren no grupo político que constitúan a formación electoral pola que foron elixidos/as ou que abandonen o seu grupo de orixe, terán a consideración de membros non adscritos.

Cando a maioría de concelleiros/as dun grupo político municipal abandone a formación política que presentou a candidatura pola que concorreron ás eleccións ou sexan expulsados desta, serán os/as concelleiros/as que permanezan na citada formación política os lexítimos integrantes do devandito grupo político para todos os efectos. En calquera caso, o/a secretario/a poderá dirixirse ao representante legal da formación política que presentou a correspondente candidatura para os efectos de que notifique a acreditación das circunstancias sinaladas.

A contía dos dereitos económicos dos membros non adscritos será establecida polo Pleno quen en todo caso deberá respectarlles os emolumentos que estean establecidos pola asistencia a sesións.

O alcance dos dereitos políticos dos membros non adscritos será o que fixe o Pleno que en todo caso deberá respectar os seus dereitos de participación e intervención nos Plenos así como a súa participación en, polo menos, unha das comisións do Concello.

Estas previsións non serán de aplicación no caso de candidaturas presentadas como coalición electoral, cando algún dos partidos políticos que a integren decida abandonala.

Artigo 20. Os grupos políticos poderán facer uso de locais da Corporación para celebrar reunións ou sesións de traballo con asociacións para a defensa dos intereses colectivos, xerais ou sectoriais da poboación.

Artigo 21. En cumprimento do artigo 75.7 da Lei 7/1985, de 2 de abril, reguladora das bases de réxime local, constitúese un rexistro de intereses das persoas membros da Corporación, debendo formular os membros da Corporación local declaración sobre causas de posible incompatibilidade e sobre calquera actividade que lles proporcione ou poida proporcionar ingresos económicos. Formularán, así mesmo, declaración dos seus bens patrimoniais. Tales declaracións serán inscritos en senllos Rexistros de Intereses.

Cada membro da Corporación Local deberá realizar as declaracións antes enumeradas nas seguintes circunstancias:

¿ Antes de tomar posesión do seu cargo.

¿ Cando se produzan variacións ao longo do mandato. Neste caso, o termo para comunicar as variacións será dun mes a contar desde o día en que se produciron.

Artigo 22. A custodia e dirección do Rexistro de Intereses é competencia da Secretaría do Concello.

Artigo 23. A declaración de intereses deberá presentarse no Rexistro de Intereses, en documento formalizado aprobado por este concello e deberá ser asinado polo/a interesado/a e o/a secretario/a, para dar fe.

Artigo 24. Para acceder aos datos contidos neste rexistro de intereses deberá terse a condición de interesada/o.

Artigo 25. O alcalde ou a alcaldesa do Concello de Abegondo recibirá o tratamento de Señoría.

SECCIÓN PRIMEIRA. DO ALCALDE/DA ALCALDESA

Artigo 26. A elección do alcalde ou alcaldesa, o nomeamento, a toma de posesión e a destitución réxense segundo a lexislación electoral.

Unha vez que se procedeu á elección do/a alcalde/esa, este deberá tomar posesión do cargo, para iso utilizará a forma legalmente establecida e xurará ou prometerá o cargo ante o Pleno do Concello.

Se non se achase presente na sesión de constitución, será requirido para tomar posesión no prazo de 48 horas, igualmente ante o Pleno da Corporación, coa advertencia de que, caso de non facelo sen causa xustificada, estarase ao disposto na lexislación electoral para o caso de vacante na Alcaldía.

O/A alcalde/esa poderá renunciar ao cargo sen perder por iso a súa condición de concelleiro/a. A renuncia deberá facerse efectiva por escrito ante o Pleno da Corporación, que deberá adoptar acordo de coñecemento dentro dos 10 días seguintes. Esta vacante sería cuberta segundo o procedemento establecido na lexislación electoral.

Unha vez vacante a Alcaldía por renuncia da persoa titular, falecemento ou sentenza firme, a sesión extraordinaria para a elección dunha nova alcaldesa ou alcalde celebrarase, cos requisitos establecidos na lexislación electoral, dentro dos 10 días seguintes á aceptación da renuncia polo Pleno, ao momento da adopción do falecemento ou a notificación da sentenza, segundo os casos.

Artigo 27. O alcalde ou alcaldesa preside a Corporación e ostenta as seguintes atribucións:

1. Dirixir o goberno e a administración municipal.

2. Representar o Concello.

3. Convocar e presidir as sesións do Pleno, salvo os supostos previstos na Lei 7/1985, e na lexislación electoral xeneral, da Xunta de Goberno Local, e de cales queira outros órganos municipais cando así se estableza en disposición legal ou regulamentaria, e decidir os empates con voto de calidade.

4. Dirixir, inspeccionar e impulsar os servizos e obras municipais.

5. Ditar bandos.

6. O desenvolvemento da xestión económica de acordo co orzamento aprobado, dispor gastos dentro dos límites da súa competencia, concertar operacións de crédito, con exclusión das contempladas no artigo 177.5 do Real decreto lexislativo 2/2004, de 5 de marzo, polo que se aproba o texto refundido da Lei reguladora das facendas locais, sempre que aquelas estean previstas no orzamento e o seu importe acumulado dentro de cada exercicio económico non supere o 10% dos seus recursos ordinarios, salvo as de Tesouraría que lle corresponderán cando o importe acumulado das operacións vivas en cada momento non supere o 15% dos ingresos correntes liquidados no exercicio anterior, ordenar pagamentos e render contas; todo iso de conformidade co disposto en Real decreto lexislativo 2/2004, de 5 de marzo, polo que se aproba o texto refundido da Lei reguladora das facendas locais.

7. Aprobar a oferta de emprego público de acordo co orzamento e o persoal aprobados polo Pleno, aprobar as bases das probas para a selección do persoal e para os concursos de provisión de postos de traballo e distribuír as retribucións complementarias que non sexan fixas e periódicas.

8. Desempeñar a xefatura superior de todo o persoal, e acordar o seu nomeamento e sancións, incluída a separación do servizo do funcionariado da Corporación e o despedimento do persoal laboral, dando conta ao Pleno, nestes dous últimos casos, na primeira sesión que celebre. Esta atribución entenderase sen prexuízo do disposto no punto 5 da Disposición adicional segunda da Lei 7/2007, de 12 de abril, do estatuto básico do empregado público.

9. Exercer a xefatura da Policía Municipal.

10. As aprobacións dos instrumentos de plan de desenvolvemento do plan xeral non expresamente atribuídas ao Pleno, así como a dos instrumentos de xestión urbanística e dos proxectos de urbanización.

11. O exercicio das accións xudiciais e administrativas e a defensa do Concello nas materias da súa competencia, mesmo cando as delegue noutro órgano, e, en caso de urxencia, en materias da competencia do Pleno, neste suposto dando conta ao mesmo na primeira sesión que celebre para a súa ratificación.

12. A iniciativa para propor ao Pleno a declaración de lesividade en materias da competencia da Alcaldía.

13. Adoptar persoalmente, e baixo a súa responsabilidade, en caso de catástrofe ou de infortunios públicos ou grave risco destes, as medidas necesarias e adecuadas dando conta inmediata ao Pleno.

14. Sancionar as faltas de desobediencia á súa autoridade ou por infracción das ordenanzas municipais, salvo nos casos en que tal facultade estea atribuída a outros órganos.

15. As contratacións e concesións de toda clase cando o seu importe non supere o 10% dos recursos ordinarios do orzamento nin, en calquera caso, os 6 millóns de euros; incluídas as de carácter plurianual cando a súa duración non sexa superior a catro anos, sempre que o importe acumulado de todas as súas anualidades non supere nin a porcentaxe indicada, referido aos recursos ordinarios do orzamento do primeiro exercicio, nin a contía sinalada.

16. A aprobación dos proxectos de obras e de servizos cando sexa competente para a súa contratación ou concesión e estean previstos no orzamento.

17. A adquisición de bens e dereitos cando o seu valor non supere o 10% dos recursos ordinarios do orzamento nin o tres millóns de euros, así como o alleamento do patrimonio que non supere a porcentaxe nin a contía indicados nos seguintes supostos:

a) A de bens inmobles, sempre que estea prevista no orzamento.

b) A de bens mobles, salvo os declarados de valor histórico ou artístico cuxo alleamento non se atope previsto no Orzamento.

18. O outorgamento das licenzas, salvo que as leis sectoriais o atribúan expresamente ao Pleno ou á Xunta de Goberno Local.

19. Ordenar a publicación, execución e facer cumprir os acordos do Concello.

20. As demais que expresamente lle atribúan as leis e aquelas que a lexislación do Estado ou das comunidades autónomas asignen ao municipio e non atribúan a outros órganos municipais.

Artigo 28. O/A alcalde/esa poderá delegar o exercicio das atribucións referidas no artigo anterior, salvo as de convocar e presidir as sesións do Pleno e da Xunta de Goberno Local, decidir os empates co voto de calidade, a concertación de operacións de crédito, a xefatura superior de todo o persoal, a separación do servizo do funcionariado e o despedimento do persoal laboral, e as enunciadas nos números 1, 5, 10, 11, 12 e 13 do artigo anterior. Non obstante, poderá delegar na Xunta de Goberno Local o exercicio das atribucións contempladas no apartado 10 do artigo anterior.

Artigo 29. En cumprimento do artigo 22.a) da Lei 7/1985, de 2 de abril, reguladora das bases de réxime local, o/a alcalde/esa dará conta ao Pleno da Corporación, sucintamente, das resolucións que tomase desde a sesión plenaria anterior, para que as concelleiras e os concelleiros coñezan o desenvolvemento da administración municipal para os efectos do control e fiscalización dos órganos de goberno.

SECCIÓN SEGUNDA. DOS/DAS TENENTES DA ALCALDÍA

Artigo 30. As/Os tenentes da Alcaldía serán libremente nomeadas/os e cesadas/os polo alcalde ou alcaldesa de entre as persoas membros da Xunta de Goberno Local.

O número de tenentes da Alcaldía non poderá ser superior ao número de membros que compoñen a Xunta de Goberno Local. A Xunta de Goberno Local está integrada polo/a alcalde/esa e un número de concelleiros e concelleiras non superior ao terzo do número legal destes, nomeados/as e separados/as libremente por aquel, dando conta ao Pleno.

Artigo 31. Os nomeamentos e os cesamentos faranse mediante Resolución da Alcaldía da que se dará conta ao Pleno na primeira sesión que celebre, notificándose, ademais, persoalmente ás persoas designadas, e serán publicados no Boletín Oficial da Provincia (BOP), sen prexuízo da súa efectividade desde o día seguinte da sinatura da Resolución polo/a alcalde/esa, se nela non se dispuxese outra cousa.

Artigo 32. A condición de tenente de Alcaldía pérdese, ademais de polo cesamento, por renuncia expresa manifestada por escrito e por perda da condición de membro da Xunta de Goberno Local.

Artigo 33. Correspóndelles aos/ás tenentes de Alcaldía, en canto tales, substituír na totalidade das súas funcións e pola orde do seu nomeamento, ao/a alcalde/esa, nos casos de ausencia, enfermidade ou impedimento que imposibilite a este para o exercicio das súas atribucións, así como desempeñar as funcións do alcalde ou alcaldesa nos supostos de vacante na Alcaldía ata que tome posesión o novo alcalde ou alcaldesa.

Artigo 34. Nos casos de ausencia, enfermidade ou impedimento, as funcións do/a alcalde/esa non poderán ser asumidas polo/a tenente da Alcaldía a quen corresponda sen expresa delegación. A delegación debe conter os seguintes requisitos:

¿ As delegacións serán realizadas mediante Decreto da Alcaldía que conterá o ámbito dos asuntos a que se refire a delegación, as facultades que se deleguen, así como as condicións específicas de exercicio destas.

¿ A delegación de atribucións da Alcaldía fornecerá efecto desde o día seguinte ao da data do Decreto, salvo que nela se dispoña outra cousa, sen prexuízo da súa preceptiva publicación no Boletín Oficial da Provincia.

Artigo 35. Nos supostos en que o/a alcalde/esa se ausente do termo municipal por máis de 24 horas, sen conferir a delegación ou cando por causas imprevistas lle resulte imposible outorgala, substituirao/a na totalidade das súas funcións o/a tenente de Alcaldía a quen corresponda, dando conta ao resto da Corporación.

Artigo 36. A perda da condición de tenente da Alcaldía prodúcese por:

¿ Decreto de Alcaldía decidindo o cesamento.

¿ Renuncia expresa por escrito.

¿ Perda da condición de persoa membro da Corporación.

SECCIÓN TERCEIRA. DAS CONCELLEIRAS E CONCELLEIROS DELEGADOS

Artigo 37. As concelleiras e concelleiros delegados son as/os concelleiras/os que ostentan algunhas das delegacións de atribucións realizada pola alcaldesa ou alcalde, sempre que sexa nunha das materias delegables reguladas na Lei reguladora de bases de réxime local.

Artigo 38. A delegación de competencias deberá realizarse mediante Decreto da Alcaldía, no que se especifique cales son as competencias delegadas e as condicións do exercicio da facultade delegada.

Se a resolución de delegación se refire xenericamente a unha materia ou sector de actividade sen especificación de potestades, entenderase que comprende todas aquelas facultades, dereitos e deberes referidos á materia delegada que corresponden ao órgano que ten asignadas orixinariamente as atribucións coa soa excepción das que segundo a Lei reguladora de bases de réxime local son materias non delegables.

Artigo 39. A delegación de atribucións requirirá, para ser eficaz, a súa aceptación por parte do/a delegado/a. A delegación entenderase aceptada tacitamente se no prazo de tres días hábiles contados desde a notificación do acordo o membro ou órgano destinatario da delegación non fai manifestación expresa ante o órgano delegante de que non acepta a delegación.

Artigo 40. Se no Decreto de delegación non se dispón outra cousa, o/a alcalde/esa conservará as seguintes facultades en relación coa competencia delegada:

¿ A de recibir información detallada da xestión da competencia delegada e dos actos ou disposicións emanadas en virtude da delegación.

¿ A de ser informado/a previamente á adopción de decisións de transcendencia.

¿ Os actos ditados polo órgano delegado no exercicio das atribucións delegadas enténdense ditados polo órgano delegante, correspondendo, en consecuencia, a resolución dos recursos de reposición que poidan interporse, salvo que no Decreto de delegación expresamente sexa conferida a resolución dos recursos de reposición contra os actos ditados polo órgano delegado.

Artigo 41. No suposto de revogación de competencias delegadas, o/a alcalde/esa poderá revisar as resolucións adoptadas pola concelleira ou concelleiro delegado nos mesmos casos, e condicións establecidas para a revisión de oficio dos actos administrativos.

Artigo 42. A revogación ou modificación das delegacións haberá de adoptarse coas mesmas formalidades que as esixidas para o seu outorgamento.

Artigo 43. Pérdese a condición de concelleiro/a delegado/a:

¿ Por renuncia expresa, que haberá de ser formalizada por escrito ante a Alcaldía.

¿ Por revogación da delegación, adoptada pola Alcaldía coas mesmas formalidades previstas para outorgala.

¿ Por perda da condición de persoa membro da Corporación Municipal.

SECCIÓN PRIMEIRA. DO PLENO

Artigo 44. O Pleno está integrado por todos os concelleiros e concelleiras e é presidido polo alcalde ou alcaldesa.

Artigo 45. Corresponden, en todo caso, ao Pleno, as seguintes atribucións:

1. O control e a fiscalización dos órganos de goberno.

2. Os acordos relativos á participación en organizacións supramunicipais; alteración do termo municipal; creación ou supresión de municipios e das entidades de ámbito inferior ao municipio; creación de órganos desconcentrados; alteración da capitalidade do municipio e o cambio de nome deste ou daquelas entidades e a adopción ou modificación da súa bandeira, insignia ou escudo.

3. A aprobación inicial do plan xeral e a aprobación que poña fin á tramitación municipal dos plans e demais instrumentos de ordenación previstos na lexislación urbanística.

4. A aprobación do regulamento orgánico e das ordenanzas.

5. A determinación dos recursos propios de carácter tributario; a aprobación e modificación dos orzamentos; a disposición de gastos en materia da súa competencia e a aprobación das contas; todo iso de acordo co disposto no texto refundido da Lei de facendas locais.

6. A aprobación das formas de xestión dos servizos e dos expedientes de municipalización.

7. A aceptación da delegación de competencias feita por outras administracións públicas.

8. A formulación de conflitos de competencias a outras entidades locais e demais administracións públicas.

9. A aprobación do cadro de persoal e da relación de postos de traballo, a fixación da contía das retribucións complementarias fixas e periódicas do funcionariado e o número e réxime do persoal eventual.

10. O exercicio de accións xudiciais e administrativas e a defensa da Corporación en materias de competencia plenaria.

11. A declaración de lesividade dos actos do Concello.

12. A alteración da cualificación xurídica dos bens de dominio público.

13. A concertación das operacións de crédito cuxa contía acumulada, dentro de cada exercicio económico, exceda do 10% dos recursos ordinarios do orzamento, salvo as de Tesouraría, que lle corresponderán cando o importe acumulado das operacións vivas en cada momento supere o 15% dos ingresos correntes liquidados no exercicio anterior, todo iso de conformidade co disposto no texto refundido da Lei de facendas locais.

14. As contratacións e concesións de toda clase cando o seu importe supere o 10% dos recursos ordinarios do orzamento e, en calquera caso, os seis millóns de euros, así como os contratos e concesións plurianuais cando a súa duración sexa superior a catro anos e os plurianuais de menor duración cando o importe acumulado de todas as súas anualidades supere a porcentaxe indicada, referido aos recursos ordinarios do orzamento do primeiro exercicio e, en todo caso, cando sexa superior á contía sinalada nesta letra.

15. A aprobación dos proxectos de obras e servizos cando sexa competente para a súa contratación ou concesión, e cando aínda non estean previstos nos orzamentos.

16. A adquisición de bens e dereitos cando o seu valor supere o 10% dos recursos ordinarios do orzamento e, en todo caso, cando sexa superior a tres millóns de euros, así como os alleamentos patrimoniais nos seguintes supostos:

a) Cando se trate de bens inmobles ou de bens mobles que estean declarados de valor histórico ou artístico, e non estean previstas no orzamento.

b) Cando estando previstas no orzamento, superen as mesmas porcentaxes e contías indicadas para as adquisicións de bens.

17. Aqueloutras que deban corresponder ao Pleno por esixir a súa aprobación unha maioría especial.

18. As demais que expresamente lles sexan conferidos polas leis.

Artigo 46. O Pleno poderá delegar o exercicio das atribucións referidas no artigo anterior, salvo as enunciadas no número 1, 2, 3, 4, 5, 6, 7, 8, 11, 16 e 17, no alcalde ou alcaldesa e na Xunta de Goberno Local.

Artigo 47. A delegación de competencias realizarase a través dun acordo, que se adoptará por maioría simple, e fornecerá efectos desde o día seguinte ao da súa adopción, sen prexuízo da súa publicación no Boletín Oficial da Provincia. Estas regras serán de aplicación ás modificacións posteriores do devandito acordo.

Artigo 48. O acordo de delegación conterá o ámbito dos asuntos a que esta se refira e as facultades concretas que se delegan, así como as condicións específicas de exercicio destas.

Artigo 49. As delegacións do Pleno en materia de xestión financeira poderán, así mesmo, conferirse a través das bases de execución do orzamento.

SECCIÓN SEGUNDA. DA XUNTA DE GOBERNO LOCAL

Artigo 50. A Xunta de Goberno Local está integrada polo alcalde ou alcaldesa, que a preside, e concelleiras e concelleiros nomeados libremente pola Alcaldía como membros desta, e cuxo número mínimo será de tres concelleiras/os. Non son públicas as sesións da Xunta de Goberno Local.

O número de concelleiras/os aos que o/a alcalde/esa por Decreto pode nomear como persoas membros da Xunta de Goberno Local non poderá ser superior ao terzo do número legal de membros da Corporación. Para os efectos do cómputo non se terán en conta os decimais que resulten de dividir por tres o número total de concelleiros/as.

Artigo 51. O/A alcalde/esa pode cesar libremente, en todo momento, a calquera membro da Xunta de Goberno Local. Os nomeamentos e cesamentos serán adoptados por medio de Resolución da Alcaldía da que se dará conta ao Pleno na primeira sesión que se celebre, notificándose, ademais, persoalmente ás persoas designadas, e serán publicadas no Boletín Oficial da Provincia, sen prexuízo da súa efectividade desde o día seguinte da sinatura de Resolución da Alcaldía, se nela non se dispuxese outra cousa.

Artigo 52. É atribución propia e indelegable da Xunta de Goberno Local a asistencia permanente ao/á alcalde/esa no exercicio das súas atribucións. A Xunta de Goberno Local será informada de todas as decisións da alcaldesa ou alcalde. Esta información terá carácter previo á adopción da decisión sempre que a importancia do asunto así o requira. Así mesmo, terá aquelas funcións que sexan delegadas pola Alcaldía ou outro órgano municipal, ou outorgada por atribución da lei.

SECCIÓN TERCEIRA. DAS COMISIÓNS INFORMATIVAS

Artigo 53. As Comisións Informativas son órganos de carácter complementario do Concello.

Artigo 54. As Comisións Informativas, que se integran exclusivamente por membros da Corporación, son órganos sen atribucións resolutorias que teñen por función o estudo, informe ou consulta dos asuntos que haxan de ser sometidos á decisión do Pleno e da Xunta de Goberno Local cando esta actúe con competencias delegadas polo Pleno.

Informarán daqueles asuntos da competencia propia da Xunta de Goberno Local, e da Alcaldía, que lles sexan sometidos ao seu coñecemento por expresa decisión daqueles.

Artigo 55. As Comisións Informativas poden ser permanentes e especiais.

Artigo 56. Son Comisións Informativas permanentes as que se constitúen con carácter xeral, distribuíndo entre elas as materias que han de someterse ao Pleno. O seu número e denominación iniciais, así como calquera variación destas durante o mandato corporativo, decidirase mediante acordo adoptado polo Pleno a proposta da Alcaldía, procurando, no posible, o seu correspondente co número e denominación das grandes áreas en que se estruturan os servizos corporativos.

Artigo 57. Son Comisións Informativas especiais as que o Pleno acorde constituír para un asunto concreto, en consideración ás súas características especiais de calquera tipo.

Estas comisións extínguense automaticamente unha vez que ditaminen ou informen sobre o asunto que constitúe o seu obxecto, salvo que o acordo plenario que as creou dispuxese outra cousa.

Artigo 58. No acordo de creación das Comisións Informativas determinarase a composición concreta destas, tendo en conta as seguintes regras:

¿ A alcaldesa ou o alcalde é a/o presidenta/e nata/o de todas elas; con todo, a Presidencia efectiva poderá delegala a calquera concelleira/o. A dita delegación realizarase mediante decreto, dándose conta ao Pleno e publicidade no taboleiro de anuncios. En todo caso, a/o presidenta/e efectiva/o conservará o voto de calidade para a resolución de empates.

¿ Cada comisión estará integrada de forma que a súa composición acomódese á proporcionalidade existente entre os distintos grupos políticos representados na Corporación.

¿ A adscrición concreta a cada Comisión das persoas membros da Corporación que deban formar parte desta en representación de cada grupo realizarase mediante escrito da persoa voceira deste dirixido á Alcaldía, e do que se dará conta ao Pleno. Poderá designarse, de igual forma, un suplente por cada titular.

Artigo 59. Os Ditames das Comisións Informativas teñen carácter preceptivo e non vinculante.

En supostos de urxencia, o Pleno ou a Xunta de Goberno Local, poderá adoptar acordos sobre asuntos non ditaminados pola correspondente Comisión Informativa, pero, nestes casos, do acordo adoptado deberá darse conta á Comisión Informativa na primeira sesión que se celebre. A proposta de calquera dos membros da Comisión Informativa, o asunto deberá ser incluído na orde do día do seguinte Pleno con obxecto de que este delibere sobre a urxencia acordada, en exercicio das súas atribucións de control e fiscalización.

SECCIÓN CUARTA. DA COMISIÓN ESPECIAL DE CONTAS

Artigo 60. A Comisión Especial de Contas da entidade local estará constituída por membros dos distintos grupos políticos integrantes da Corporación, de forma que a súa composición se acomode á proporcionalidade existente entre os distintos grupos políticos representados na Corporación.

Artigo 61. A Comisión Especial de Contas é de existencia preceptiva, e a súa constitución, composición e integración e funcionamento axústase ao establecido para as demais Comisións Informativas.

Correspóndelle o exame, estudo e informe de todas as contas, orzamentarias e extraorzamentarias, que deba aprobar o Pleno da Corporación, de acordo co establecido na lexislación reguladora da contabilidade das entidades locais.

A Comisión Especial de Contas actuará como Comisión Informativa permanente para os asuntos relativos á economía e facenda deste concello.

SECCIÓN QUINTA. DAS XUNTAS DE VOCEIROS/AS

Artigo 62. Os voceiros e voceiras dos grupos políticos, presididos polo/a alcalde/esa presidente/a, integrarán a Xunta de Voceiros/as, que terá as seguintes funcións:

a) Acceder ás informacións que a Presidencia lles proporcione para difundila entre as persoas membros de cada grupo. Para estes efectos, transcorridas 24 horas desde a comunicación, calquera información fornecida á Xunta de Voceiros/as presumirase coñecida por todas as concelleiras e os concelleiros adscritos aos distintos grupos.

b) Canalizar as peticións dos grupos en relación co seu funcionamento e coa súa participación nos debates corporativos.

c) Acordar o réxime dos debates en sesións determinadas.

d) Solicitar información doutras administracións públicas sobre materias de interese para o Concello de Abegondo, a proposta dalgún grupo político e previo acordo.

e) As demais funcións que lle atribúa o Regulamento Orgánico.

As concelleiras e concelleiros non adscritos poderán ter tamén un voceiro ou voceira, sen prexuízo do seu dereito de información recoñecido con carácter xeral.

A Xunta de Voceiros/as terá sempre carácter deliberante e nas súas sesións non se adoptarán acordos nin resolucións con forza de obrigar a terceiros, non levantándose acta, nin tendo devandito carácter calquera documento que con fins operativos poida redactarse polos propios membros da Xunta de Voceiros/as ou funcionariado que a asistan.

O/A presidente/a convocará a Xunta de Voceiros/as, polo menos con 24 horas de antelación, por iniciativa propia ou sempre que o soliciten dous grupos políticos municipais ou a quinta parte dos/as concelleiros/as para tratar asuntos atribuídos pola lei ou por este regulamento á Xunta de Voceiros/as. En todo caso a Xunta de Voceiros/as reunirase con carácter previo á celebración de calquera sesión do Pleno da Corporación. No suposto de sesións convocadas a solicitude de dous grupos políticos municipais ou a quinta parte dos/as concelleiros/as, a celebración da Xunta de Voceiros/as non poderá demorarse por máis de dous días hábiles desde que fose solicitada.

SECCIÓN SEXTA. DA COMISIÓN DE COORDINACIÓN MUNICIPAL

Artigo 63. A Comisión de Coordinación Municipal, presidida pola presidenta ou presidente da Corporación será integrada polos/as concelleiros/as que ostenten en cada momento responsabilidades de goberno municipal e terá como obxectivo a coordinación do goberno municipal.

A periodicidade das súas reunións será quincenal ou cando as circunstancias o requiran.

SECCIÓN SÉTIMA. DOS CONSELLOS SECTORIAIS

Artigo 64. O Pleno do Concello poderá acordar o establecemento de Consellos Sectoriais. A finalidade destes órganos é a de canalizar a participación da cidadanía e das súas asociacións nos asuntos municipais. Desenvolverán exclusivamente funcións de informe e, no seu caso, proposta, en relación coas iniciativas municipais relativas ao sector de actividade ao que corresponda cada concelleiro/concelleira.

A creación dos Consellos Sectoriais de Participación realizarase por Acordo do Pleno, acordando neste a súa composición, organización e ámbito de actuación.

Cada Consello estará presidido por un membro da Corporación, nomeado e separado libremente polo alcalde ou alcaldesa, que actuará como ligazón entre a Corporación e o Consello.

SECCIÓN OCTAVA. DOS ÓRGANOS DESCONCENTRADOS E DESCENTRALIZADOS PARA A XESTIÓN DOS SERVIZOS

Artigo 65. O Pleno poderá establecer órganos desconcentrados e de entes descentralizados con personalidade xurídica propia, cando así o aconsellen a necesidade dunha maior eficacia na xestión, a complexidade desta, a axilización dos procedementos, a expectativa de aumentar ou mellorar o financiamento ou a conveniencia de obter un maior grao de participación cidadá na actividade de prestación de servizos.

O establecemento dos órganos e entes aos que se refire o artigo anterior réxese, no seu caso, polo disposto na lexislación de réxime local relativa ás formas de xestión de servizos, inspirándose no principio de economía organizativa, de maneira que o seu número sexa o menor posible en atención á correcta prestación destes.

SECCIÓN PRIMEIRA. SESIÓNS DO PLENO

Artigo 66. As sesións do Pleno do Concello poden ser de tres tipos:

¿ Ordinarias

¿ Extraordinarias

¿ Extraordinarias con carácter urxente

Artigo 67. Son sesións ordinarias aquelas cuxa periodicidade está preestablecida. Será fixada por acordo do Pleno celebrado en sesión extraordinaria convocada pola Alcaldía dentro dos 30 días seguintes á sesión constitutiva, a periodicidade das sesións ordinarias, que en ningún caso poderá exceder o límite fixado na Lei reguladora de bases de réxime local.

Artigo 68. Son sesións extraordinarias aquelas que convoque a Alcaldía con tal carácter, por iniciativa propia ou a solicitude da cuarta parte, polo menos, do número legal de persoas membros da Corporación.

A solicitude debe ser presentada por escrito, razoando os motivos que a motiven, asinada persoalmente por todos os que a subscriben.

Artigo 69. A convocatoria da sesión extraordinaria a instancia de membros da Corporación deberá efectuarse dentro do catro días seguintes á petición e non poderá demorarse a súa celebración por máis de 15 días desde que o escrito tivese entrada no Rexistro Xeral, non podendo incorporarse o asunto ou asuntos motivo da solicitude á orde do día dun Pleno ordinario ou doutro extraordinario con máis asuntos, nin incorporarse outros distintos, salvo que o autoricen expresamente as persoas solicitantes da convocatoria.

Artigo 70. Contra a denegación expresa ou presunta da solicitude a que se refire o artigo anterior, poderán interporse polas persoas interesadas os correspondentes recursos, sen prexuízo de que a Administración do Estado ou da Comunidade Autónoma respectiva poida facer uso das facultades de requirimento cando considere que no ámbito das súas respectivas competencias, que un acto ou acordo dalgunha entidade local infrinxe o ordenamento xurídico, poderá requirila, invocando expresamente o artigo 65 da Lei 7/1985, de 2 de abril, reguladora das bases do réxime local.

Artigo 71. Son sesións extraordinarias urxentes as convocadas pola Alcaldía cando a urxencia do asunto ou asuntos a tratar non permite convocar a sesión extraordinaria coa antelación mínima de dous días.

Neste caso, debe incluírse como primeiro punto da orde do día o pronunciamento do Pleno sobre a urxencia. Se esta non resulta apreciada polo Pleno, levantarase acto seguido a sesión.

Artigo 72. Correspóndelle á Alcaldía convocar todas as sesións do Pleno. Á convocatoria das sesións acompañarase a orde do día compresivo dos asuntos a tratar co suficiente detalle, e os borradores de actas de sesións anteriores que deban ser aprobados na sesión.

A convocatoria das sesións extraordinarias deberá ser motivada.

A convocatoria, orde do día e borradores de actas deberán ser notificados ás concelleiras e aos concelleiros, mediante a comunicación por correo electrónico, se é que manifestaron tal medio como a canle elixida para tal notificación e co cumprimento dos requisitos legalmente esixidos.

Entre a convocatoria e a celebración da sesión non poderán transcorrer menos de dous días hábiles, salvo no caso das sesións extraordinarias urxentes.

As sesións celebraranse no salón de plenos do Concello, salvo os supostos de forza maior.

Artigo 73. A convocatoria para unha sesión, ordinaria ou extraordinaria, dará lugar á apertura do correspondente expediente, no que deberá constar:

¿ A relación de expedientes conclusos que a Secretaría prepare e poña a disposición da Alcaldía.

¿ A fixación da orde do día polo alcalde ou pola alcaldesa.

¿ As copias das notificacións cursadas a cada membro da Corporación.

¿ Copia do anuncio no taboleiro de editos do Concello e, no seu caso, na prensa local.

¿ Minuta da acta.

¿ Copias dos oficios de remisión dos acordos adoptados ás administracións do Estado e Comunidade autónoma.

¿ Publicación dos acordos no taboleiro de editos.

Artigo 74. Xunto á convocatoria para a sesión será preceptiva a notificación aos membros da Corporación local da orde do día, e deberá quedar acreditado o cumprimento deste requisito na Secretaría Xeral.

Artigo 75. A orde do día das sesións será fixado pola Alcaldía asistida da Secretaría. Así mesmo, poderá solicitar a asistencia dos membros da Xunta de Goberno Local, e consultar, se o estima oportuno, aos voceiras e voceiros dos grupos existentes na Corporación.

Na orde do día só poden incluírse os asuntos que fosen previamente ditaminados, informados ou sometidos a consulta da Comisión Informativa que corresponda.

O/A alcalde/esa, por razóns de urxencia debidamente motivada, poderá incluír na orde do día, a iniciativa propia ou a proposta dalgún dos/as voceiros/as, asuntos que non fosen previamente informados pola respectiva Comisión Informativa, pero neste suposto non poderá adoptarse acordo algún sobre estes asuntos sen que o Pleno ratifique a súa inclusión na orde do día.

Na orde do día das sesións ordinarias incluirase sempre o punto de rogos e preguntas.

Artigo 76. Serán nulos os acordos adoptados en sesións extraordinarias sobre asuntos non comprendidos na súa convocatoria, así como os que se adopten en sesións ordinarias sobre materias non incluídas na respectiva orde do día, salvo especial e previa declaración de urxencia feita polo órgano correspondente, co voto favorable da maioría absoluta do Pleno.

Artigo 77. A documentación dos asuntos incluídos na orde do día que debe servir de bases ao debate e, no seu caso, votación, deberá estar a disposición das persoas membros da Corporación desde o mesmo día da convocatoria na Secretaría da Corporación.

Calquera persoa membro da Corporación poderá examinar esta documentación e mesmo obter copias de documentos concretos que a integren, non os orixinais, que non poderán saír do lugar no que se atopen postos de manifesto.

Artigo 78. O Pleno celebrará as súas sesións na Casa do Concello, salvo nos supostos de forza maior nos que, a través da convocatoria ou por Decreto de Alcaldía ditada previamente e notificada a todos os membros da Corporación, poderá habilitarse outro edificio ou local para ese efecto. En calquera caso, esta circunstancia farase constar na acta.

Artigo 79. Toda sesión, sexa ordinaria ou extraordinaria, haberá de respectar o principio de unidade de actos e procurarase que termine no mesmo día do seu comezo. Se esta termina sen que se debatesen todos os asuntos incluídos na orde do día, a/o presidenta/e poderá levantar a sesión. Neste caso os asuntos non debatidos deberán incluírse na orde do día da seguinte sesión.

Artigo 80. As sesións do Pleno serán públicas. O debate e a votación poderán ser secretos cando afecten ao dereito á honra, a intimidade persoal e familiar e á propia imaxe (artigo 18.1 da Constitución), ou sexa acordado por maioría absoluta.

Artigo 81. O público que asista ás sesións plenarias non pode participar nelas, nin manifestar agrado ou desagrado, podendo o/a presidente/a proceder, en casos, extremos á expulsión do/a asistente que por calquera causa impida o normal desenvolvemento da sesión. Unha vez levantada a sesión, a Corporación pode establecer unha quenda de consultas polo público asistente sobre temas concretos de interese municipal.

Artigo 82. Cada membro da Corporación tomarán asento no Salón de Sesións unidos ao seu grupo. A orde de colocación dos grupos será determinada polo/a presidente/a, oídos os voceiros/as, tendo preferencia o grupo formado por membros da lista que obtivese maior número de votos. En calquera caso, a colocación dos membros corporativos tenderá a facilitar a emisión e reconto dos votos.

Artigo 83. Para a constitución válida do Pleno, requírese a asistencia dun terzo do número legal de membros da Corporación, que nunca poderá ser inferior a tres. Este quórum deberá manterse durante toda a sesión.

Sempre deberán asistir o/a presidente/a e o/a secretario/a da Corporación, ou quen legalmente lles substitúan.

Artigo 84. Se realizada a primeira convocatoria non existise o quórum necesario, entenderase automaticamente convocada á mesma hora, dous días despois.

Se na segunda convocatoria tampouco se alcanzase o quórum necesario, os asuntos previstos a tratar posporanse para o estudo na primeira sesión que se celebre con posterioridade, sexa ordinaria ou extraordinaria.

SECCIÓN SEGUNDA. DOS DEBATES

Artigo 85. As sesións comezarán preguntando a/o presidenta/e se algún membro da Corporación ten que formular observación á Acta da sesión anterior que se distribuíu coa convocatoria.

Se non houbese observacións considerarase aprobada e se as houbese debateranse e decidirán as rectificacións que procedan.

O fondo dos acordos non poderá ser modificado en ningún caso, e soamente se poderán emendar erros materiais ou de feito.

Os asuntos debateranse e votaranse pola orde en que estivesen relacionados na orde do día.

O alcalde ou alcaldesa poderá alterar a orde dos temas, retirar un asunto cando a súa aprobación esixise unha maioría especial e esta non puidese obterse no momento previsto inicialmente na orde do día.

Nas sesións ordinarias, unha vez que concluíu a orde do día, o/a alcalde/esa preguntará se algún grupo político desexa someter á consideración do Pleno por razóns de urxencia algún asunto non incluído na orde do día, se así fose, a/o voceira/o dese grupo político proporá o punto que se quere tratar e a urxencia deste, votándose sobre a procedencia ou non do debate.

As mocións de censura seguirán o procedemento establecido na Sección Cuarta do presente Capítulo.

Artigo 86. Durante o debate, calquera concelleiro/a poderá pedir que se produza a retirada dalgún expediente para que se incorporen ao mesmo documento ou informes, e tamén se poderá solicitar que o expediente quede sobre a mesa, aprazándose a súa discusión para a seguinte sesión.

En ambos os dous supostos, a petición deberá ser votada, e tras terminar o debate e antes de proceder a votar sobre o fondo do asunto, se a maioría simple votase a favor da petición, non haberá lugar a votar a proposta do Acordo.

Artigo 87. Cando sexan asuntos que non se incluíron na orde do día e que requiran informe preceptivo da Secretaría ou da Intervención deste concello, se estes informes non se puidesen emitir no acto, deberase solicitar da/o presidenta/e que se aprace o seu estudo quedando sobre a mesa até a próxima sesión.

Se a petición non fose atendida, a/o secretaria/o farao constar expresamente na Acta.

Artigo 88. A consideración de cada punto incluído na orde do día comezará coa lectura íntegra ou en extracto, por parte do/a secretario/a, do Ditame formulado pola Comisión Informativa ou, se se trata dun asunto urxente, non ditaminado pola mesma, da proposición que se somete ao Pleno. A solicitude de calquera grupo deberá darse lectura íntegra a aquelas partes do expediente ou do informe ou Ditame da Comisión que se considere conveniente para mellor comprensión.

Se ninguén solicita a palabra tras a lectura, o asunto someterase directamente a votación.

Artigo 89. Se se promove o debate, as intervencións serán ordenadas polo alcalde ou alcaldesa, conforme ás seguintes regras:

Convocada unha sesión do Pleno, a Alcaldía Presidencia poderá citar a Xunta de Voceiros/as para tratar da ordenación dos debates.

Os/As voceiros/as deberán anunciar as intervencións dos/as concelleiros/as do seu respectivo grupo que haxan de ter necesariamente unha duración superior á ordinaria, de cinco minutos ampliables a dez. Sen este anuncio non se admitirán intervencións de duración superior á ordinaria. Os/As voceiros/as poderán establecer, mediante consenso, a orde dos debates, a duración das intervencións e demais extremos de carácter formal das sesións.

Só poderá facerse uso da palabra previa autorización do alcalde ou alcaldesa.

Sen o amentado consenso, a orde de intervención dos grupos no debate comezará polo Grupo Mixto, se o houber, calquera que sexa o número dos seus membros, e continuará coa dos restantes grupos políticos, segundo o número de membros que o integren, de menor a maior. No caso de igualdade no número de compoñentes do grupo político decidirá a súa orde de intervención o alcalde/esa presidente/a. O debate será pechado polo/a alcalde/esa presidente/a ou concelleiro/a delegado/a con competencia na materia debatida.

O debate iniciarase cunha exposición e xustificación da proposta, a cargo dalgún membro da Comisión Informativa que a ditaminou ou, nos demais casos, dalgún dos membros da Corporación que subscriban a proposición ou moción, en nome propio ou do colectivo e órgano municipal propoñente desta.

Ás intervencións que se produzan conforme a este artigo concederáselles un espazo de tempo de cinco minutos, ampliable até dez se a complexidade do tema o esixise, a xuízo da Alcaldía Presidencia. A todos os grupos se lles concederá o mesmo espazo de tempo. No Grupo mixto se houbesen de facer uso da palabra máis de dous dos seus concelleiros ou concelleiras, o tempo será distribuído proporcionalmente ao número de persoas que interveñan deste grupo. As intervencións da concelleiras e concelleiros non adscritos, no seu conxunto, non poderán superar a metade do tempo concedido a un grupo político.

Quen se considere aludido por unha intervención poderá solicitar do/a alcalde/esa que se conceda unha quenda por alusións, que será breve e conciso.

Se o solicitase algún grupo, procederase a unha segunda quenda. Consumido este, o/a alcalde/esa presidente/a pode dar por terminada a discusión que se pechará cunha intervención do relator na que brevemente ratificará ou modificará a súa proposta.

Non se admitirán outras interrupcións que as da/o presidente/a para chamar á orde ou á cuestión debatida.

As persoas membros da Corporación poderán en calquera momento do debate pedir a palabra para expor unha cuestión de orde, invocando para o efecto a norma cuxa aplicación reclama. O/A presidente/a resolverá o que proceda, sen que por este motivo se estableza debate ningún.

O funcionariado responsable da Secretaría e da Intervención poderán intervir cando fosen requiridos polo/a presidente/a por razóns de asesoramento técnico ou aclaración de conceptos. Cando o devandito funcionariado entendan que no debate se expuxo algunha cuestión sobre a que poida dubidarse sobre a legalidade ou repercusións orzamentarias do punto debatido poderán solicitarlle ao/á presidente/a o uso da palabra para asesorar a Corporación.

Artigo 90. O/A alcalde/esa poderá chamar á orde a calquera membro da Corporación que:

¿ Profira palabras ou verta conceptos ofensivos ao decoro da Corporación ou dos seus membros, das Institucións Públicas ou de calquera outra persoa ou entidade.

¿ Produza interrupcións ou, de calquera outra forma, altere a orde das sesións.

¿ Pretenda facer uso da palabra sen que lle foi concedida ou unha vez que lle foi retirada.

Tras tres chamadas á orde na mesma sesión, con advertencia na segunda das consecuencias da terceira chamada, o/a presidente/a poderá ordenarlle que abandone o local en que se estea celebrando a reunión, adoptando as medidas que considere oportunas para facer efectiva a expulsión.

Artigo 91. Cando de conformidade co artigo 76 da Lei reguladora de bases de réxime local algunha persoa membro da Corporación deba absterse de participar na deliberación e votación, deberá abandonar o salón mentres se discute e vota o asunto, salvo cando se trate de debater a súa actuación como corporativo, en que terá dereito a permanecer e defenderse.

Artigo 92. A terminoloxía que para os efectos do desenvolvemento das sesións e para definir o carácter das intervencións dos membros da Corporación utilizarase será a seguinte:

¿ Ditame: é a proposta sometida ao Pleno tras o estudo do expediente pola Comisión Informativa. Contén unha parte expositiva e un Acordo a adoptar.

Na orde do día só poderán incluírse os asuntos que fosen previamente ditaminados pola Comisión plenaria que corresponda, salvo as proposicións da/o presidenta/e e as mocións.

¿ Proposición: é a proposta que somete ao Pleno relativa a un asunto incluído na orde do día, que acompaña á convocatoria. Conterá unha parte expositiva ou xustificación e un acordo, así mesmo, a adoptar. Non procederá entrar a debater nin votar unha proposición sen que previamente se ratifique, de acordo co disposto no artigo 74, parágrafo terceiro, deste regulamento.

As proposicións que precisen de informes preceptivos, unicamente servirán de resolución inicial de oficio dun expediente que, tras a súa instrución, someterase ao órgano insular competente.

¿ Moción: é a proposta que se somete directamente a coñecemento do Pleno ao abeiro do previsto neste regulamento. Os grupos ou un mínimo de catro concelleiros/as poderán, sempre que a presentación se formalice cunha antelación mínima de cinco días hábiles respecto da sesión correspondente, formular ao Pleno tres propostas de resolución para debate e votación, que recibirán a denominación de mocións. As mocións formalizadas na forma prevista no apartado anterior haberán de incluírse na orde do día.

**Os grupos ou un mínimo de tres concelleiras/os poderán someter á consideración do Pleno unha soa moción por razóns de urxencia, que se formulará por escrito e poderase presentar até as 10:00 horas do día anterior ao da celebración da sesión plenaria, para o seu coñecemento, salvo no suposto excepcional de que posteriormente se produzan acontecementos relevantes e imprevisibles, nese caso poderase presentar durante a sesión plenaria. A Secretaría Xeral dará traslado das mocións á Alcaldía Presidencia e aos/ás voceiros/as dos grupos políticos. O autor da moción xustificará a urxencia da moción e o Pleno votará, acto seguido, sobre a procedencia do seu debate. Só se o resultado da votación fose positivo, por maioría absoluta, procederase ao debate e votación do proxecto de acordo de que se trate.

As mocións carecerán da eficacia precisa para a adopción inmediata de acordos que esixan informes técnicos, económicos ou xurídicos, necesarios para garantir a oportunidade, posibilidade ou legalidade dos pronunciamentos do acordo a adoptar.

As mocións terán ordinariamente por obxecto o pronunciamento do Pleno sobre a necesidade de iniciar actuacións cunha ou máis finalidades determinadas. A moción, coa súa dilixencia de aprobación polo Pleno, servirá de resolución inicial de oficio dun expediente, que, tras a súa instrución, someterase ao órgano competente.

Excepcionalmente, as mocións utilizaranse para que o Pleno, en representación do Concello, formule unha declaración de ideas ou de sentimentos, de contido meramente político, respecto dun problema que considere que lle afecta. Neste caso, o acordo que tome o Pleno porá fin á tramitación da moción. Na mesma forma, a moción poderá utilizarse para exercitar o dereito de petición.

¿ Voto particular: é a proposta de modificación dun ditame formulada por un membro que forma parte da Comisión Informativa. Pódese formular oralmente no transcurso da sesión da comisión informativa ou mediante escrito que se presentase o día seguinte da sesión da comisión.

¿ Emenda: é a proposta de modificación dun ditame ou proposición presentada por calquera membro, mediante escrito presentado ao/á presidente/a ante de iniciarse a deliberación do asunto.

¿ Rogo: é a formulación dunha proposta de actuación dirixida a algúns dos Órganos de Goberno municipal. Os rogos formulados no seo do Pleno poderán ser debatidos, pero en ningún caso sometidos a votación. Pode expor rogos todas as persoas membros da Corporación, ou os Grupos Municipais a través dos seus voceiros ou voceiras. Os rogos poderán ser efectuados oralmente ou por escrito e serán debatidos xeralmente na sesión seguinte, sen prexuízo de que o poidan ser na mesma sesión que se formulen se o alcalde ou alcaldesa o estima conveniente.

¿ Pregunta: é calquera cuestión exposta cuestión exposta aos Órganos de Goberno no seo do Pleno. Poden expor preguntas todas as persoas membros da Corporación, ou os Grupos Municipais a través dos seus voceiros ou voceiras. As preguntas expostas oralmente no transcurso dunha sesión serán xeralmente contestadas ao seu destinatario na sesión seguinte, sen prexuízo de que o preguntado queira darlle resposta inmediata. As preguntas formuladas por escrito serán contestadas o seu destinatario na sesión seguinte, sen prexuízo de que a persoas preguntada queira darlle resposta inmediata. As preguntas formuladas por escrito con 24 horas de antelación, serán contestadas ordinariamente na sesión ou, por causas debidamente motivadas, na seguinte.

SECCIÓN TERCEIRA. DAS VOTACIÓNS

Artigo 93. Unha vez debatidos os asuntos da orde do día procederase á súa votación. Antes de comezar a votación, o/a alcalde/esa exporá clara e concisamente os termos da mesma e a forma de emitir o voto. Iniciada a votación, esta non poderá interromperse por ningún motivo. Durante o desenvolvemento da votación o/a presidente/a non concederá o uso da palabra e ningún membro corporativo poderá entrar no Salón ou abandonalo.

Terminada a votación ordinaria, o/a alcalde/esa declarará o acordado. Concluída a votación, o/a secretario/a computará os sufraxios emitidos e anunciará en voz alta o seu resultado, en vista do cal o/a alcalde/esa proclamará o Acordo adoptado.

Artigo 94. O Pleno do Concello adopta os seus acordos, como regra xeral, por maioría simple dos membros presentes. Existe maioría simple cando os votos afirmativos son máis que os negativos.

Entenderase por maioría absoluta cando os votos afirmativos son máis da metade do número legal de membros da Corporación e será necesaria nos supostos enumerados no artigo 47.2 da Lei 7/1985, de 2 de abril, reguladora das bases de réxime local.

No caso de que seguindo a Lei orgánica do réxime electoral xeral non quedarán máis posibles persoas candidatas ou suplentes a nomear, o quórum de asistencia e votación previstos na lexislación vixente entenderanse automaticamente referidos ao número de feito de membros da Corporación subsistente.

O voto dos concelleiros e das concelleiras é persoal e indelegable.

Nos casos de baixa por maternidade ou paternidade, e só nos supostos en que o a lexislación esixa expresamente votación pública por chamamento, poderá non ser requisito indispensable que o concelleiro/a afectado/a estea presente no Pleno para que o seu voto sexa válido.

Artigo 95. O sentido do voto pode ser afirmativo ou negativo, podendo os/as membros da Corporación absterse de votar.

Para os efectos da votación correspondente, considerarase que se absteñen as persoas membros da Corporación que se ausentaron do Salón de Sesións unha vez iniciada a deliberación dun asunto e non estivesen presentes no momento da votación. No caso de que se tiveses reintegrado ao Salón de Sesións antes da votación poderán, desde logo, tomar parte desta.

No caso de votacións con resultado de empate, efectuarase unha nova votación, e se persistise o empate, decidirá o voto de calidade da/o presidente/a.

Artigo 96. As votacións poderán ser de tres tipos:

1. Ordinarias: aquelas que se manifestan por signos convencionais de asentimento, disentimento ou abstención.

2. Nominais: aquelas votacións que se realizan mediante chamamento por orde alfabética de apelidos e sempre en último lugar o/a presidente/a, na que cada membro da Corporación, ao ser chamado/a, responde en voz alta «si», «non» ou «abstéñome».

3. Secretas: votacións que se realizan por papeleta que cada membro da Corporación irá depositando nunha urna ou bolsa.

Artigo 97. O sistema normal será a votación ordinaria.

A votación nominal requirirá a solicitude dun Grupo Municipal aprobada polo Pleno por unha maioría simple en votación ordinaria.

A votación secreta só poderá utilizarse para a elección ou destitución de persoas ou naqueles casos en que así veña imposto por unha lei.

O réxime xeral das votacións para a Moción de Censura será o voto público por chamamento. Neste o/a secretario/a nomeará os concelleiros e concelleiras que responderán ¿si", ¿non" ou ¿abstención". O chamamento realizarase por orde alfabética de primeiro apelido, comezando coa concelleira ou concelleiro cuxo nome sexa sacado a sorte.

Artigo 98. Proclamado o Acordo, os grupos que non interviñesen no debate ou que tras este cambiasen o sentido do seu voto, poderán solicitar do/a presidente/a unha quenda de explicación de voto. A dita explicación de voto non caberá cando a votación fose secreta e cando todos os grupos políticos tivesen a oportunidade de intervir no debate precedente.

SECCIÓN CUARTA. DO CONTROL E FISCALIZACIÓN POLO PLENO DA ACTUACIÓN DOS DEMAIS ÓRGANOS DE GOBERNO

Artigo 99. O control e fiscalización polo Pleno da actuación dos demais órganos de Goberno será exercido a través dos seguintes medios:

¿ Requirimento de presenza e información de membros corporativos que ostenten delegación.

¿ Debate sobre a actuación da Xunta de Goberno Local.

¿ Moción de censura ao/á alcalde/esa.

¿ Mocións, rogos e preguntas, de conformidade co artigo 46.2 da Lei 7/1985, de 2 de abril, reguladora das bases de réxime local.

Artigo 100. Toda persoa membro do Concello que por delegación do/a alcalde/esa ostente a responsabilidade dunha área de xestión estará obrigada a comparecer ante o Pleno, cando este así o acorde, co obxecto de responder as preguntas que se lle formulen sobre a súa actuación.

Acordada a comparecencia polo Pleno, o alcalde ou alcaldesa incluirá o asunto na orde do día da próxima sesión ordinaria ou extraordinaria que celebre a Corporación, notificándolle ao/á interesado/a o Acordo adoptado e a data en que se celebrará a sesión en que deberá comparecer. Entre esta notificación e a celebración da sesión deberán transcorrer un mínimo de tres días.

No desenvolvemento das comparecencias seguirase a orde das intervencións establecidas no artigo 88 deste regulamento.

Artigo 101. O Pleno, a proposta da Alcaldía ou mediante solicitude da cuarta parte, polo menos, do número legal de membros corporativos, poderá acordar a celebración de sesión extraordinaria cuxo obxecto sexa someter a debate a xestión da Xunta de Goberno Local.

O desenvolvemento da sesión a que fai referencia o apartado anterior suxeitarase ao establecido con carácter xeral, intervindo en primeiro lugar o autor da proposta para explicar o significado desta. Contestará un membro da Xunta de Goberno Local designado por esta e, despois en senllas quendas de réplica, poderán intervir os demais grupos políticos da Corporación para formular preguntas á Xunta de Goberno Local, que serán contestadas por un/unha membro desta.

Artigo 102. A sesión extraordinaria para deliberar e votar a moción de censura ao/á alcalde/esa será convocada expresamente con este único asunto na orde do día.

A moción formalizarase a través dun escrito presentado no Rexistro Xeral do Concello.

Entre a presentación da moción de censura e a celebración da sesión extraordinaria deberán transcorrer polo menos sete días. A denegación da convocatoria deberá ser motivada e só poderá basearse en non reunir os requisitos seguintes:

1. A moción de censura deberá ser proposta, polo menos, pola maioría absoluta do número legal de membros da Corporación e haberá de incluír un/unha candidato/a á Alcaldía, podendo selo calquera concelleiro ou concelleira, cuxa aceptación expresa conste no escrito de proposición da moción.

2. O escrito no que se propoña a moción de censura deberá incluír as sinaturas debidamente autenticadas por notario/a ou polo/a secretario/a xeral do Concello e deberá presentarse ante este por calquera dos seus asinantes. O/A secretario/a xeral comprobará que a moción de censura reúne os requisitos esixidos neste artigo e estenderá no mesmo acto a correspondente dilixencia acreditativa.

3. O documento así dilixenciado será presentado no Rexistro Xeral da Corporación por calquera das persoas asinantes da moción, quedando o Pleno automaticamente convocado para as 12:00 horas do décimo día hábil seguinte ao do seu rexistro. O/A secretario/a da Corporación deberá remitir notificación indicativa de tal circunstancia a cada un dos membros desta no prazo máximo dun día, que conta desde a presentación do documento no Rexistro, para os efectos da súa asistencia á sesión, especificando a data e hora desta.

4. O Pleno será presidido por unha Mesa de Idade, integrada polas concelleiras ou concelleiros de maior e menor idade dos presentes, excluídos o/a alcalde/esa e o/a candidato/a á Alcaldía, actuando como secretario/a o/a do Concello, quen acreditará tal circunstancia.

5. A Mesa limitarase a dar lectura á moción de censura, a concederlles as palabras durante un tempo breve, se estivesen presentes, ao/á candidato/a á Alcaldía, ao/á alcalde/esa e aos/ás voceiros/as dos grupos municipais, e a someter a votación a moción de censura.

6. A persoa candidata incluída na moción de censura quedará proclamado/a alcalde/esa se esta prosperase co voto favorable da maioría absoluta do número de concelleiros e concelleiras que legalmente compoñen a Corporación.

7. Ningún concelleiro nin concelleira pode asinar durante o seu mandato máis dunha moción de censura. Para os devanditos efectos non se tomarán en consideración aquelas mocións que non fosen tramitadas por non reunir os requisitos previstos anteriormente.

A dimisión sobrevida do/a alcalde/esa non suspenderá a tramitación e votación da moción de censura.

SECCIÓN QUINTA. FE PÚBLICA

Artigo 103. De cada sesión plenaria a/o secretaria/o do Concello estenderá Acta na que fará constar:

a) Lugar da reunión, con expresión do nome do municipio e o local en que se celebra.

b) Día, mes e ano.

c) Hora en que comeza.

d) Nome e apelidos do/a presidente/a, de membros da Corporación presentes, de membros ausentes que se escusaron e dos que falten sen escusa.

e) Carácter ordinario ou extraordinario da sesión, e se se celebra en primeira ou segunda convocatoria.

f) Asistencia do/a secretario/a, ou de quen legalmente o/a substitúa, e presenza do persoal funcionario responsable da Intervención, cando concorra.

g) Asuntos que examinen, opinións sintetizadas dos grupos ou membros da Corporación que interviñesen nas deliberacións e incidencias destas.

h) Votacións que se verifiquen e no caso das nominais o sentido en que cada membro emita o seu voto. Nas votacións ordinarias farase constar o número de votos afirmativos, negativos e das abstencións. Farase constar nominalmente o sentido do voto cando así o pidan as/os interesadas/os.

i) Parte dispositiva dos acordos que se tomen.

j) Hora en que o/a presidente/a levanta a sesión.

Artigo 104. De non celebrarse o Pleno por falta de asistentes ou outro motivo, o/a secretario/a suplirá a Acta por unha dilixencia autorizada coa súa sinatura, na que consigne a causa e os nomes das persoas que non concorreron á sesión, e o nome dos/as asistentes.

Artigo 105. A Acta, unha vez que foi aprobada polo Pleno na sesión inmediatamente posterior á que se recolle na Acta, transcribirase ao Libro de Actas que será asinado polo/a alcalde/esa ou presidente/a e o/a secretario/a.

Artigo 106. O Libro de Actas, instrumento público solemne, ha de estar previamente foliado e encadernado, legalizada cada folla coa rúbrica do/a alcalde/esa e o selo da Corporación, e expresará na súa primeira páxina, mediante dilixencia de apertura asinada polo/a secretario/a, o número de folios e a data en que se inicia a transcrición dos acordos. Poderán habilitarse medios electrónicos en substitución do anterior.

Artigos 107. Se se utilizasen medios mecánicos para a transcribir as actas, terán que confeccionarse de acordo coas seguintes regras:

¿ Haberá de utilizarse, en todo caso, o papel timbrado do Estado ou o papel numerado da Comunidade Autónoma.

¿ O papel adquirido para cada Libro, que o será coa numeración correlativa, farase constar na dilixencia da apertura asinada polo responsable da Secretaría que expresará na primeiro páxina as series, números e a data de apertura en que se inicia a transcrición dos acordos. Ao mesmo tempo cada folla será rubricada polo/a alcalde/esa, selada co da Corporación e numerada correlativamente a partir do número uno, independentemente do número do timbre estatal ou da Comunidade.

¿ Unha vez aprobada a Acta, o/a secretario/a faraa transcribir monograficamente por impresora de computador ou o medio mecánico que se empregue, sen emendas nin riscaduras ou salvando ao final as que involuntariamente se producisen, ás follas correlativas seguindo rigorosamente a súa orde e facendo constar, ao final de cada Acta por dilixencia, o número, clase e numeración de todos e cada un dos folios do papel numerado en que quedou estendida.

¿ Como garantía e seguridade de todas e cada unha das follas soltas, até a encadernación, prohíbese alterar a orde numérica dos folios descritos na dilixencia de apertura, debendo anularse por dilixencia nos casos de erro na orde de transcrición ou no seu contido.

¿ Cando todos os folios reservados a un Libro se atopen xa escritos ou anulados os últimos por dilixencia ao non caber integramente a acta da sesión que corresponda pasar ao Libro, procederase á súa encadernación. En cada tomo estenderase dilixencia por parte do/a secretario/a, co «visto e prace» do/a presidente/a, expresiva do número de Actas que comprende, con iniciación da Acta que o inicie e da que o finalice.

A adopción do sistema de follas móbiles esixe o Acordo expreso do Pleno, a proposta da Alcaldía.

Artigo 108. A Xunta de Goberno Local celebrará sesión constitutiva, a convocatoria do/a alcalde/esa, dentro dos dez días seguintes a aquel en que este designase aos membros que a integran.

Celebrarase por parte da Xunta de Goberno Local sesión ordinaria cada 15 días como mínimo.

Correspóndelle ao/á alcalde/esa fixar, mediante Decreto, o día e hora en que deba celebrarse sesión ordinaria.

As sesións extraordinarias e as urxentes terán lugar cando, con tal carácter, sexan convocada polo/a alcalde/esa.

O alcalde ou alcaldesa poderá en calquera momento reunir á Xunta de Goberno Local cando estime necesario coñecer o seu parecer ou pedir a súa asistencia con anterioridade a ditar resolucións en exercicio das atribucións que lle correspondan.

As sesións celebraranse na Casa do Concello, salvo os supostos de forza maior.

Artigo 109. As regras especiais de funcionamento da Xunta de Goberno Local son as seguintes:

1. Entre a convocatoria e a celebración da sesión non poderán transcorrer menos de 24 horas, salvo no caso das sesións extraordinarias e urxentes nas que, antes de entrar a coñecer os asuntos incluídos na orde do día, deberá ser declarada a urxencia por Acordo favorable da maioría dos membros.

2. As sesións da Xunta non serán públicas, sen prexuízo da publicidade e comunicación á Administración Estatal e Autonómica dos Acordos adoptados. No prazo de dez días deberá enviarse, por correo electrónico, a cada membro da Corporación copia da Acta.

3. Para a válida constitución da Xunta de Goberno Local requírese a asistencia da maioría absoluta dos seus compoñentes. Se non existise quórum, constituirase en segunda convocatoria, unha hora despois da sinalada para a primeira, sendo suficiente a asistencia da terceira parte os seus membros e, en todo caso, un número non inferior a tres.

4. O/A alcalde/esa dirixe e ordena ao seu prudente arbitrio os debates no seo da Comisión.

5. Nos casos en que a Xunta de Goberno Local exerza competencias delegadas polo Pleno, será preceptivo o previo informe da Comisión Informativa correspondente.

6. As actas das sesións da Xunta de Goberno Local transcribiranse en Libro distinto do das sesións do Pleno.

A Xunta de Goberno Local nas súas reunións deliberantes non poderá adoptar ningún Acordo, formalizarase en forma de Ditames.

Artigo 110. Nas sesións e reunións da Xunta de Goberno Local, o/a alcalde/esa poderá requirir a presenza de membros da Corporación non pertencentes á Xunta de Goberno Local, ou de persoal ao servizo da entidade, co obxecto de informar no relativo ao ámbito das súas actividades.

Artigo 111. En todo o non previsto para a Xunta de Goberno Local, estarase ao previsto sobre o funcionamento do Pleno.

Artigo 112. As Comisións Informativas celebrarán sesións ordinarias coa periodicidade que sexa acordada polo Pleno no momento en que se constitúan, nos días e horas que estableza o/a alcalde/esa, ou o/a presidente/a da Comisión, quen poderán, así mesmo, convocar sesións extraordinarias ou urxentes destas. O/A alcalde/esa ou o/a presidente/a da Comisión estará obrigado a convocar sesión extraordinaria cando o solicite a cuarta parte, polo menos, dos/as membros da Comisión. Réxese neste suposto polas mesmas normas que para a celebración dunha sesión extraordinaria do Pleno.

As sesións celebraranse na Casa do Concello. A convocatoria e a orde do día deberán ser notificados aos/ás membros da Comisión, mediante comunicación por correo electrónico, se é que manifestaron tal medio como a canle elixida para tal notificación e co cumprimento dos requisitos legalmente esixidos.

Artigo 113. A válida celebración das sesións require a presenza da maioría absoluta das persoas compoñentes da Comisión, xa sexan titulares ou suplentes, en primeira convocatoria e un mínimo de tres membros en segunda convocatoria unha hora máis tarde.

O/A presidente/a dirixe e ordena, ao seu prudente arbitrio, respectando os principios xerais que rexen os debates plenarios, os debates da Comisión.

Os Ditames aprobaranse sempre por maioría simple dos presentes, decidindo os empates o/a presidente/a, pois conta con voto de calidade.

Artigo 114. Ningunha Comisión poderá deliberar sobre asuntos competencia doutra, a menos que se trate de problemas comúns, nese caso poderá convocarse unha sesión conxunta a proposta dos/as presidentes/as das respectivas Comisións, que será convocada polo/a presidente/a da Corporación.

Artigo 115. De cada sesión das Comisións Informativas levantarase Acta na que consten os extremos a que se refiren os apartados a), b), c), d), e), g), h), e j) do artigo 102 do presente Regulamento, e á que se acompañarán os Ditames que fosen aprobados e os votos particulares que fosen formulados a aqueles.

Artigo 116. En todo o non previsto para o funcionamento das Comisións Informativas serán de aplicación as disposicións sobre funcionamento do Pleno.

Artigo 117. O funcionamento dos Consellos Sectoriais rexerase polo disposto nos Acordos plenarios que os establezan.

O funcionamento dos órganos colexiados dos entes descentralizados de xestión rexerase polo que dispoña a lexislación en materia de formas de xestión de servizos, segundo a súa natureza específica.

Artigo 118. Son dereitos e deberes dos veciños e das veciñas :

1. Ser elector/a e elixible de acordo co disposto na lexislación electoral.

2. Participar na xestión municipal de acordo co disposto nas leis e, no seu caso, cando a colaboración con carácter voluntario da veciñanza sexa interesada polos órganos de Goberno e Administración municipal.

3. Utilizar, de acordo coa súa natureza, os servizos públicos municipais, e acceder aos aproveitamentos comunais, conforme ás normas aplicables.

4. Contribuír mediante as prestacións económicas e persoais legalmente previstas á realización das competencias municipais.

5. Ser informado previa petición razoada e dirixir solicitudes á Administración municipal en relación con todos os expedientes e documentación municipal, de acordo co previsto no artigo 105 da Constitución.

6. Pedir a consulta popular nos termos previstos na lei.

7. Esixir a prestación e, no seu caso, o establecemento do correspondente servizo público, no suposto de constituír unha competencia municipal propia de carácter obrigatorio.

8. Exercer a iniciativa popular nos termos previstos no artigo 70.bis da Lei 7/1985, de 2 de abril reguladora das bases de réxime local.

9. Aqueloutros dereitos e deberes establecidos nas leis.

Artigo 119. As sesións do Pleno son públicas; con todo, poderán ser secretos o debate e a votación daqueles asuntos que poidan afectar ao dereito fundamental á honra, a intimidade persoal e familiar e á propia imaxe, ao que se refire o artigo 18 da Constitución, cando así se acorde por maioría absoluta.

Non son públicas as sesións da Xunta de Goberno Local, nin as das Comisións Informativas.

Quedan derrogadas cantas normas municipais, acordos ou disposicións, contradigan o establecido no presente Regulamento.

En todo o non previsto no presente Regulamento, aplicarase o disposto en Real decreto 2568/1986, de 28 de novembro, polo que se aproba o Regulamento de organización, funcionamento e réxime xurídico das entidades locais.

O texto do articulado do presente Regulamento Orgánico Municipal interpretarase da forma que segue:

A expresión alcalde interpretarase como alcalde/alcaldesa, o/os tenente/s de alcalde como o/a/os/as tenente/s de alcalde/alcaldesa, o/os concelleiro/s como o/a/os/as concelleiros/concelleiras, o/os concelleiros delegados como o/a/os/os concelleiros/concelleiras delegados/delegadas, o/os delegado/s como o/a/os/as delegados/delegadas, o/os presidente/s como o/a/os/os presidentes/presidentas, o/os membro/s como o/a/os/o membro/s, o/os funcionario/s como o/a/os/os funcionarios/funcionarias, vicepresidente/s como o/a/os/os vicepresidentes/vicepresidentas, secretario/s como o/a/os/os secretarios/secretarias.

O presente Regulamento entrará en vigor ao día seguinte da súa íntegra publicación no Boletín Oficial da Provincia de A Coruña.