Curtis - REGULAMENTO DE ACTIVIDADES DE CONCILIACIÓN: MADRUGADORES, LUDOTECA E CAMPAMENTOS PARA A CONCILIACIÓN FAMILIAR E LABORAL NO CONCELLO DE CURTIS

Artigo 1. Obxecto e ámbito de aplicación.

O presente regulamento ten por obxecto establecer as normas de organización e funcionamento dos seguintes servizos: ¿Concilia na escola¿ coas modalidades de ¿Madrugadores¿ e ¿Ludoteca¿, e ¿Campamentos para a conciliación familiar e laboral¿, que se desenvolvan polo Concello de Curtis.

Empregaranse prioritariamente os centros de conciliación para o desenvolvemento das actividades, con prioridade absoluta con respecto a outros recursos que poidan precisar ditas instalacións, salvo causas puntuais, debidamente motivadas.

No caso de que as actividades teñan que ser desenvoltas nos espazos cedidos polo centro educativo, o Concello deberá solicitar previamente estes espazos ao Centro escolar e o seu uso terá que ser autorizado.

Artigo 2. Finalidade

A Rede Municipal de Servizos de Conciliación é un conxunto de servizos públicos que buscan promover a conciliación da vida laboral e familiar. Trátanse de iniciativas de conciliación promovidas polo Concello de Curtis ao abeiro da normativa local vixente e cooperación na realización de actividades e servizos complementarios.

O obxectivo é que as familias dispoñan dunha serie de opción que faciliten a conciliación, así como no caso dos menores asistentes, mentres se benefician do servizo, poidan aprender hábitos alimentarios saudables, así como as normas básicas de hixiene, respecto, tolerancia, convivencia e educación en igualdade.

Mais concretamente, os obxectivos do proxecto son:

· Educación para a saúde:

· Poñer en práctica hábitos de hixiene persoal.

· Fomentar hábitos de vida saudables mediante o fomento da inxestión de alimentos variados e sans e dunha actividade física regular.

· Educación para a convivencia:

· Fomentar o compañeirismo e as actitudes de igualdade, respecto e tolerancia de cara aos compañeiros/as e de cara a todos os membros da comunidade escolar.

· Adquirir hábitos de cooperación e implicación, segundo as posibilidades, nas tarefas do servizo.

· Coidar e respectar os locais, mobiliarios e utensilios de uso comunitario.

· Educación para o ocio:

· Planificar e desenvolver actividades de ocio e tempo libre que contribúan ao desenvolvemento harmónico da personalidade, e ao fomento de hábitos sociais e culturais.

Artigo 3. Beneficiarios do servizo

· O servizo de madrugadores e de ludoteca está dirixido ao alumnado de entre 3 e 12 anos escolarizado nos centros educativos públicos do Concello de Curtis.

· O servizo de Campamentos para a conciliación familiar, que se desenvolverán con carácter xeral nos períodos vacacionais de Nadal, Antroido, Semana Santa e verán, está dirixido aos nenos e nenas de entre 3 e 12 anos. Salvo casos excepcionais previo informe técnico da área competente poderán acudir menores de ata 16 anos.

Artigo 4. Contido dos servizos:

O servizo de Madrugadores na Escola Madrugadores:

· Servizo de almorzo en madrugadores. O almorzo elaborarano os propios monitores e monitoras nas instalacións do centro seguindo as directrices municipais. Salvo casos moi xustificados e con informe médico, non se permitirá levar ao servizo ningún tipo de alimento.

· Os/as usuarios/as con almorzo deberán chegar como mínimo con media hora de antelación ao horario de inicio das clases.

· Servizo de monitoraxe en madrugadores para o coidado e atención dos nenos e das nenas, e para realizar actividades de lecer despois do almorzo, segundo o proxecto educativo que se deseñe.

O servizo de Ludoteca comprende:

· Servizo de atención á infancia con actividades lúdico educativas.

· Servizo de monitoraxe en ludoteca, para o coidado e atención dos nenos e das nenas e para realizar actividades de lecer.

O servizo de Campamentos de conciliación en períodos vacacionais comprende:

· Servizo de monitoraxe para o coidado e atención dos nenos e das nenas, e para realizar actividades de lecer.

· Servizo de atención á infancia con actividades lúdico educativas.

Artigo 5. Dereitos dos/as usuarios/as

Son dereitos dos/as usuarios/as e de quen posúe a súa patria potestade:

· O acceso aos programas e á información sen discriminación de ningún tipo.

· A consideración debida á dignidade da persoa, tanto por parte dos/as monitores/as e persoal do servizo, como dos/as demais usuarios/as.

· O sixilo profesional sobre os datos do seu historial persoal, sanitario, socioeconómico e familiar, ao abeiro do disposto na Lei orgánica 3/2018, de 5 de decembro, de protección de datos persoais e garantía dos dereitos dixitais.

· A intimidade persoal tendo en conta as condicións de funcionamento dos servizos.

· A asistencia individualizada acorde coas súas necesidades específicas.

· Deixar de utilizar os servizos por vontade propia.

· Seren informados/as de xeito comprensible das medidas adoptadas respecto deles e de canto afecte á súa propia educación.

· Seren educados/as na tolerancia, na convivencia democrática e en valores de igualdade.

· Seren educados/as en hábitos alimentarios saudables e nas normas básicas de hixiene e comportamento.

Artigo 6. Deberes dos/as usuarios/as.

Son deberes dos/as usuarios/as dos servizos e de quen ostenta a súa patria potestade:

· Cumprir o presente regulamento e as demais disposicións legais vixentes que sexan de aplicación.

· Manter unha conduta inspirada na tolerancia, na colaboración e no mutuo respecto aos outros/as usuarios/as, aos monitores/as e ao persoal do servizo.

· Informarse e cumprir os trámites, prazos e requisitos precisos para a utilización do servizo.

· Estar ao día no pagamento dos distintos servizos de conciliación ofertados polo Concello de Curtis.

Artigo 7. Tipos de usuarios/as.

Os/as usuarios/as dos servizos poden ser fixos/as ou esporádicos.

Artigo 8. Usuario/a fixo/a.

É usuario/a fixo/a aquel alumno/a que dispoña de praza e formalice a matrícula en prazo, independentemente de que utilice o servizo todos os días de luns a venres ou días da semana concretos previamente sinalados.

Os/as usuarios/as fixos/as poderán acudir dende un día ata cinco semanais, indicando na solicitude que días se fará uso do servizo.

Os/as usuarios/as fixos/as poderán variar a frecuencia de utilización do servizo, sempre que a organización do servizo o permita e o soliciten mediante escrito motivado presentado con antelación de 10 días naturais, coa excepción do mes de setembro, que por organización do servizo, non se admiten cambios.

O Concello poderá denegar as solicitudes no caso de que os cambios na utilización do servizo supoñan problemas organizativos ou orixinen problemas de compatibilidade no uso do servizo por parte dos/as outros/as usuarios/as.

No caso de urxencia inaprazable e que se deberá acreditar documentalmente xunto coa solicitude, poderase autorizar o cambio de frecuencia sen necesidade de que concorran os 10 días naturais. O Concello poderá, no caso de que a frecuencia solicitada supoña problemas para a organización do servizo, denegar a solicitude.

Artigo 9. Usuario/a esporádico/a.

O/a usuario/a esporádico é aquel/a que non está matriculado con carácter fixo, e sempre e cando haxa prazas de libres/esporádicas, utilice o servizo en días soltos de forma ocasional como máximo tres veces no mes por cada servizo. Este tipo de usuario permítese so en madrugadores e ludoteca.

O incumprimento destes requisitos, ou un deles, significa a non aceptación do/a neno/a no servizo ocasional solicitado.

No mes de setembro, por motivos de organización poderán non admitirse usuarios/as ocasionais.

Nos casos de situacións de emerxencia, como poden ser as derivadas dun traslado de centro educativo e residencial motivado por unha violencia de xénero, haberá sempre prazas reservadas para dar cobertura, sempre e cando se acredite dita circunstancia.

En canto ao pagamento nesta modalidade farase en réxime de autoliquidación e aplicaranse as mesmas normas que as establecidas para usuarios/as ocasionais tanto neste Regulamento como na ordenanza fiscal correspondente.

Artigo 10. Recollida de usuarios

Ao rematar o servizo de Ludoteca o alumnado deberán ser recollido polo responsable legal, agás autorización expresa deste, para

- ser recollido por outra persoa maior de idade

- ser recollido por un irmán ou irmá menor de idade sempre que, como mínimo, curse 5º e 6º de primaria

Poderáse optar porque o usuario abandone só o servizo, coa autorización expresa do responsable legal, sempre que curse a partir de 5º de primaria.

No caso de ruptura da unidade familiar ou situación de violencia de xénero, autorización expresa reflectida na propia sentenza para que o/a proxenitor/a suxeito a un réxime de visitas poida recoller ao neno/a no servizo de comedor en determinados días concretos.

No suposto de traslado a outras activides extraescolares referido no art. 27

Artigo 11. Monitorado

Enténdese por persoal do servizo das actividades de concilia, o conxunto de traballadores/as directamente contratados/as polo Concello de Curtis para estes servizos, ou que o presten o mesmo a través dun contrato conforme ao establecido na LCSP.

Deberán contar coas seguintes titulacións:

· titulación en animación sociocultural o monitor de ocio e tempo libre, ou titulacións similares do ámbito socioeducativo, integración social, animación de actividades físicas e deportivas, ocio e tempo libre, educación infantil ou titulación de grado universitario en carreiras vencelladas ás ciencias sociais (educación social, maxisterio, pedagoxía, ciencias da actividade física e do deporte, psicopedagoxía, etc.)

· formación en igualdade (mínimo de 30 horas) e en primeiros auxilios (mínimo 40 horas)

O número exacto de monitores/as necesarios fixarase atendendo ás idades dos nenos/as e ás problemáticas específicas como enfermidades, discapacidades, problemas de conduta, alimentación, integración, etc. e será decidido polo Concello cada curso, unha unha vez coñecidos/as os/as usuarios/as fixos/as e usuarios/as por quenda matriculados/as no servizo. O censo de usuarios/as actualizarase cunha periodicidade mensual, e pode variar cada mes o número de monitores/as, segundo as variacións no censo. De xeito orientador, e sen carácter vinculante, establecese unha ratio aproximada de 1persoa monitora/15 usuarios/as, pero esta poderá ser modificada á alza ou á baixa en función das variables indicadas anteriormente e das necesidades do servizo.

Artigo 12. Requisitos do persoal monitor

O persoal que preste os servizos de conciliación deberán cumprir os seguintes requisitos:

· Maioría de idade.

· Coñecemento de galego suficiente, oral e escrito, para desenvolver todas as actividades propias do seu traballo en lingua galega.

· Certificado médico co que demostre non padecer ningunha enfermidade física ou psíquica que entrañe perigo ou risco para os nenos/as e para as demais persoas.

· Certificación negativa actualizada do Rexistro Central de delincuentes sexuais.

· Garantir que os/as monitores/as que oferte estarán provistos do carné de manipulador de alimentos no momento que empecen a traballar.

· Garantir que os/as monitores/as realizarán un curso de primeiros auxilios no momento que empecen a traballar.

· Uso do uniforme de traballo adecuado e velar pola súa limpeza e bo estado.

· Manter unha actitude paciente co trato cos menores, responsabilidade, saber traballar en equipo, tolerancia, respecto cara os/as usuarios/as e compañeiros/as e formación en igualdade.

Artigo 13. Dereitos do persoal monitor

Ao persoal seralle de aplicación o presente regulamento e a normativa vixente en cada momento.

O persoal ten como dereitos básicos e inalienables:

· A ocupación efectiva.

· Non seren discriminados/as por razóns de sexo, estado civil, idade, raza, relixión, opinión e afiliación política ou sindical, ou calquera outra condición ou circunstancia persoal ou social. Tampouco poderán ser discriminados/as por razóns de discapacidade física, psíquica ou sensorial. No caso de discapacidade deberán atoparse en condicións de aptitude para desempeñar as obrigas e responsabilidades concretas do seu posto de traballo en condicións de seguridade.

· O respecto da súa intimidade, a consideración debida á súa dignidade e a protección fronte ao acoso e as ofensas verbais ou físicas, de calquera índole.

· A súa integridade física cunha adecuada política de seguridade e hixiene, e de prevención de riscos laborais.

· A percepción puntual da remuneración pactada ou legalmente establecida.

Artigo 14. Deberes do persoal monitor

O persoal ten como deberes básicos:

· Cumprir e facer cumprir, de acordo coas súas funcións, o presente regulamento, así como as demais disposicións legais vixentes que lles sexan de aplicación.

· Cumprir coas obrigas e responsabilidades concretas do seu posto de traballo, conforme os criterios de boa fe e eficiencia.

· Observar as medidas de seguridade e hixiene que se adopten. Non incorrer en competencia co servizo nos termos fixados na lei. Contribuír á mellora do funcionamento e da eficacia do servizo.

· Velar polo respecto dos dereitos dos/as usuarios/as do servizo e demais persoas, recollidos no presente regulamento e aqueloutros recoñecidos na lexislación vixente.

· Gardar estrita confidencialidade sobre os datos dos/as usuarios/as aos que teñan acceso en razón das súas funcións, ao abeiro do disposto na Lei orgánica 3/2018, de 5 de decembro, de protección de datos persoais e garantía dos dereitos dixitais. O persoal debe actuar con discreción en todas as cuestións sensibles relativas aos usuarios/as, incluíndo aspectos relacionados con datos persoais.

· Coidar da súa hixiene persoal.

· Levar o pelo recollido durante a preparación e inxesta dos almorzos.

· Depositar as súas pertenzas nos lugares destinados a este fin.

· Non poderán usar o teléfono movil nin outros dispositivos dixitais persoais durante o desenvolvemento do servizo.

· Usar o uniforme que se proporcionará para a prestación do servizo, cuxa limpeza e bo estado será responsabilidade do usuario

· Lavar as mans ao comezo do servizo e sempre que volvan ao posto de traballo despois de ir ao aseo, de soarse, de tusir ou esbirrar, despois de manexar lixo, etc.

· Protexer as súas feridas cunha cuberta impermeable.

· Absterse de comer durante o servizo.

· Evitar tocar os alimentos directamente coas mans, para isto serviranse de pinzas, culleres, garfos, luvas desbotables, etc.

· Garantir os hábitos de hixiene e facer un seguimento especial aos/ás nenos/as de menor idade e con dificultades.

· Usar a lingua galega, tanto oralmente como por escrito, nos propios servizo e en todas as actividades.

Artigo 15. Funcións do persoal monitor

Os/as monitores/as dos servizos terán as seguintes funcións:

· Atender e custodiar ao alumnado durante a duración do servizo.

· Resolver as incidencias cotiás de carácter menor que puideran presentarse durante ese tempo e en caso de dúbidas acerca da entidade do conflito solicitar as instrucións pertinentes ao/á coordinador/a de monitores/as.

· Vixiar que os/as nenos/as deixen as súas pertenzas de forma correcta nos lugares destinados a este fin.

· Controlar as asistencias e ausencias dos/as nenos/as diariamente, así como os bonos dos usuarios/as ocasionais.

· Vixilancia activa nos espazos de uso.

· Atender a adecuada hixiene dos/as nenos/as antes e despois das comidas, almorzos e/ou merendas.

· Acompañar os/as nenos/as do seu grupo ao sitio que lles corresponda na mesa e instruílos/as para que o recollan e limpen cando terminen de almorzar ou merendar segundo as súas capacidades e idade, sempre que sexa posible.

· Aprender e axudar a comer aos nenos e ás nenas, con especial atención para o ciclo de infantil no que se refire aos utensilios e ao depósito destes no seu lugar habilitado.

· Inculcarlles aos/ás nenos/as a necesidade de respectar o horario, as normas de convivencia establecidas e as instalacións, o mobiliario e o material.

· Orientar e corrixir os malos hábitos posturais.

· No caso de ter que mudar a un menor, que por causa de forza maior sexa imposible que os responsables legais acudan a facelo, poderase facer dito cambio dende o servizo.

· Atender aos/ás nenos/as no caso de accidentes.

· Trasladar aos/ás nenos/as aos diferentes espazos destinados ao desenvolvemento das actividades municipais sempre que sexan dentro do centro, e vixiar a súa conduta durante eses traslados.

· Deixar recollidas as instalacións e limpo o mobiliario e os utensilios usados, así como os espazos para a realización das actividades.

· Realizar actividades de lecer en lingua galega que poderán consistir nas seguintes: actividades de biblioteca/videoteca; xogos cooperativos, xogos de mesa, actividades plásticas e outras actividades deportivas e de lecer.

· Dirección e participación nas actividades programadas.

· Contribuír á educación dos/as nenos/as nos valores mencionados neste regulamento.

· Atender/informar aos pais, nais ou titores/as, por teléfono ou persoalmente, de cuestións estritamente técnicas, comportamentos, actitudes e das incidencias alimentarias relacionadas coa atención diaria dos nenos e nenas. En todos os demais casos, deberán informar en todo momento ao responsable municipal do servizo, así como antes de realizar calquera tipo de xuntanza con calquera familia. Tamén deberán informar ao Concello sobre as inquedanzas e suxestións dos pais, nais e titores/as.

· Custodiar a documentación persoal dos usuarios/as do servizo ao abeiro do disposto na Lei orgánica 3/2018, de 5 de decembro, de protección de datos persoais e garantía dos dereitos dixitais.

· Realizar as demais funcións que se lles atribúa desde o Concello para o correcto funcionamento do servizo.

Funcións específicas do servizo de Madrugadores:

· Pór as mesas e os utensilios para cando cheguen os/as nenos/as ao almorzo. Informar ás familias das incidencias que se produzan durante o servizo.

· Elaborar os almorzos segundo os criterios establecidos desde o Concello.

· Realizar o reparto de alimentos atendendo a que os/as nenos/as adquiran hábitos alimentarios correctos e segundo as instrucións do Concello para o adecuado funcionamento xeral do servizo.

· Trasladar o/a neno/a ao seu grupo de aula segundo as indicacións do centro educativo.

Funcións específicas do servizo de Ludoteca:

· Trasladar aos nenos/as as actividades extraescolares, sempre que o funcionamento do servizo o permito e sempre que sexan no propio recinto no que se desenvolve o servizo de conciliación ou edificio anexo municipal.

Artigo 16. Responsable municipal do servizo

O concello contará cunha persoa responsable que realizará as seguintes funcións:

· Coordinar o grupo de monitores/as e garantir o correcto funcionamento da atención aos/ás nenos/as, ou coa empresa adxudicataria do servizo se fora no caso

· Mediar na resolución dos conflitos que poidan xurdir.

· Atender aos pais, nais ou titores por teléfono ou persoalmente, para cuestións estritamente técnicas, comportamentos, actitudes e das incidencias alimentarias relacionadas coa atención diaria dos nenos e nenas.

· As funcións que fosen necesarias para o correcto funcionamento do servizo.

Artigo 17. POSTA EN MARCHA DO SERVIZO

Realizarase mediante resolución de Alcaldía que será obxecto de publicación no Taboleiro de Edictos e na páxina web do Concello, na que se especificará o número de prazas dispoñibles para cada modalidade e o período de presentación de solicitudes.

Os programas de conciliación só se poñerán en marcha cando haxa unha demanda mínima de 8 usuarios fixos. Porén o concello estudará a posibilidade de que se execute o servizo, aínda de non contar con ese mínimo sempre que sexa financeiramente sostible.

Artigo 18. SOLICITUDES DE PRAZAS DE MADRUGADORES E LUDOTECA

A apertura do prazo ordinario para presentar solicitudes para madrugadores e ludoteca, farase coma mínimo cunha antelación de 7 días naturais antes do fin do curso escolar anterior mediante resolución de Alcaldía.

Poderanse abrir procesos distintos de presentación de solicitudes para novos usuarios sempre que existan prazas dispoñibles.

As solicitudes formalizaranse por escrito a través de modelos que se aproben coa oportuna convocatoria e que estarán dipoñibles nas oficinas municipais, na páxina web e sede electrónica, xuntando a documentación sinalada neste mesmo artigo e no artigo 19 de ser o caso, e presentadas no Rexistro Xeral do concello, sen perxuicio de poder utilizar calquera dos medios sinalados no artigo 16.4 da lei 39/2015.

Para a solicitude do servizo con carácter exporádico, deberán realizar os trámites seguintes:

· Presentar solicitude por rexistro de entrada ou sede electrónica incluso en situación de emerxencia, a posteriori.

· Poñer en coñecemento das monitoras do servizo a asistencia.

· Entrega do xustificante do ingreso

Artigo 19. Documentación de solicitude

Ademais da presentación da solicitude propiamente dita conforme ao último parágrafo do artigo anterior, deberán presentar, se fora o caso:

· Certificado actualizado de empresa no que se especifique o horario laboral.

· No caso dos campamentos de conciliación e de madrugadores e ludoteca esporádicos, deberán achegar o xustificante de pago.

· Documentación acreditativa da situación de familia numerosa.

· No caso de ruptura da unidade familiar, documentación onde se recollan as medidas de garda, custodia e alimentos.

· Certificado de número de conta dun dos responsables legais, para o cobro dos padróns de madrugadores e ludoteca.

· A condición de familia monoparental acreditarase mediante o certificado de monoparental vixente expedido pola Administración Pública competente.

· Tamén poderán facer uso desta modalidade aqueles proxenitores que a consecuencia da ruptura da unidade familiar teñan unha custodia compartida e, só para esta casuística. A separación, divorcio ou ruptura do vínculo non matrimonial acreditarase mediante sentenza xudicial ou, en defecto desta, mediante convenio regulador onde conste que a custodia do menor é compartida por ambos os dous proxenitores.

Artigo 20. RESOLUCIÓN PROVISIONAL E DEFINITIVA

Unha vez finalizado o prazo de presentación de solicitudes procederase á aprobación por resolución de Alcaldía da relación provisional de admitidos e excluídos no proceso de baremación na que se enumerarán os admitidos e no seu caso excluídos por non aportara documentación prevista no artigo 18 e 19 ou non cumprir algún requisito.

A publicación da relación provisional implicará o requirimento ós afectados para que corrixan as deficiencias observadas e presenten os documentos necesarios no prazo máximo de dez (10) días hábiles, podendo presentar igualmente as alegacións que estimen oportunas.

No caso de non ser necesaria a subsanamento de defectos, procederase sen máis á aprobación da relación definitiva nos termos do artigo seguinte.

As notificacións aos interesados derivadas dos procedementos descritos no presente capítulo practicaranse exclusivamente a traveso de publicación de edictos no taboleiro de anuncios do concello.

Examinadas as reclamacións e documentación aportadas polos interesados e proporá ó Alcalde-Presidente a aprobación da relación definitiva de admitidos e non admitidos, coa puntuación obtida por aplicación do baremo en cada caso polos solicitantes admitidos con praza, de maior a menor.

A citada relación conterá tamén unha listaxe dos solicitantes aos que se considera desistidos da súa solicitude, por non aporta-la documentación requirida, por non corrixir os erros da solicitude, ou por non cumprir algún requisito.

Artigo 21. Listaxe de agarda.

No caso de non haber prazas dispoñibles suficientes para satisfacer a demanda do servizo, xunto coa listaxe definitiva de admitidos, confeccionarase unha lista de agarda por servizo, coa orde que resulte do mesmo baremo empregado para a selección das persoas admitidas.

As solicitudes cursadas fóra do prazo establecido integraranse dentro da anterior listaxe de agarda, segundo a puntuación que resulte do mesmo baremo empregado para a selección das persoas admitidas pero, e aínda que a súa puntuación sexa maior, ocuparan os postos seguintes aos solicitantes excluídos/as que si solicitaron a praza dentro do período establecido.

Os/as nenos/as en lista de agarda irán entrando no programa seguindo estritamente a orde na que figuren na lista correspondente e das non formalizacións de matrícula, das baixas que se produzan no respectivo recurso, e da propia organización do servizo.

Artigo 22. Data de inicio no servizo.

As persoas admitidas na listaxe definitiva publicada poderán comezar no servizo ao inicio do curso escolar.

Os nenos e nenas de Educación Infantil poderán incorporarse ao servizo unha vez rematado o período de adaptación en cada centro escolar ou o primeiro día lectivo de outubro.

Artigo 23. SELECCIÓN DOS USUARIOS

A selección e admisión de usuarios do servizo cando haxan más solicitudes que prazas dispoñibles farase respectando a seguinte orde de preferencia e coas seguintes puntuacións:

A persoa responsable do contrato elaborará un informe que conteña os resultados da baremación por cada solicitante.

Artigo 24. Baixa do usuario

Causarase baixa no servizo por algunha das causas seguintes:

· Baixa automática por finalización do período do servizo ofertado.

· Baixa voluntaria: por solicitude dos representantes legais presentada por Rexistro de Entrada.

· Baixa por ausencia inxustificada durante o prazo de 15 días continuados ou 30 días alternos en madrugadores e ludoteca, e unha semana no servizo de campamentos.

Dende o Departamento responsable comunicará a información anterior para que no prazo de 10 días presenten por escrito a xustificación da ausencia. De non presentaren a xustificación, producirase a baixa de forma automática.

· Baixa por falta de pagamento, total ou parcial, no servizo de madrugadores e ludoteca. No caso de devolución de recibos ditarase resolución coa baixa do usuario a partir do mes seguinte. Neste suposto o usuario que solicite de novo o acceso ao servizo pasará ao final da listaxe de garda para o período en curso.

As prazas que queden vacantes ofreceránselles aos usuarios/as que se atopen na lista de agarda do centro na quenda na que se produzan estas baixas.

· A comprobación da inexactitude ou falsidade de declaracións ou datos relevantes en relación coa solicitude de ingreso ou establecemento do prezo público pola prestación do servizo, que provoque que outros solicitantes teñan maior puntuación no baremo ou paguen contías distintas das debidas.

· Baixa por conduta inadecuada conforme ao artigo seguinte.

Artigo 25. Procedemento ante condutas inadecuadas.

O Concello terá o dereito de expulsión temporal ou definitiva (baixa) dos/as usuarios/as que se comporten de forma incorrecta ou inadecuada, ou que os representantes legais non respecten este regulamento e as normas básicas de convivencia recollidas no Decreto 8/2015, do 8 de xaneiro, polo que se desenvolve a Lei 4/2011 de 30 de xuño, de convivencia e participación da comunidade educativa en materia de convivencia escolar e no plan de convivencia de cada centro escolar.

Antes de tomar a decisión de expulsión escoitarase os pais, nais ou titores/as de menores.

Os nenos/as que acudan aos servizos deberán ter os hábitos de educación e coñecemento adecuados á súa idade (utilización de cubertos, respecto ao monitorado, coidado do material, hábitos hixiénicos, etc.) De non ser así, o esforzo do monitorado estará encamiñado neste senso e informarán aos pais, nais ou titores/as deste feito para realizaren o adecuado labor educativo en conxunto.

Se houbese algún caso de conduta contraria á convivencia entre o alumnado usuario dos servizos complementarios e/ou que afecte ou transcenda ao ámbito académico, a técnica que corresponda deberá informar por escrito á Dirección do centro para que se tomen as medidas necesarias.

Artigo 26. Horario de funcionamento.

No servizo de Concilia na Escola Madrugadores o horario de funcionamento do servizo no núcleo de Curtis e de Teixeiro abranguerá dende duas horas antes da apertura do centro escolar. O servizo de almorzo só funcionará ata 45 min. antes da entrada nos centros.

No servizo de Concilia na Escola Ludoteca, o horario de funcionamento adaptarase nos centros con xornada continua ao horario de saída do comedor escolar de cada centro educativo e rematará como máximo ás 18:00h. Salvo que por cuestións organizativas da entidade ou dos usuarios poderase adaptar un máximo de 30 minutos, có correspondente informe técnico xustificativo.

Artigo 27. Servizos complementarios.

Para o traslado dos nenos e nenas durante estes servizos de conciliación ás actividades extraescolares municipais, dentro do propio recinto escolar ou proximidades, realizarase previamente a solicitude dos representantes legais e sempre que o desenvolvemento do servizo o permita.

Artigo 28. Problemas de saúde dos/as usuarios/as.

O pai, nai ou titor/a das menores usuarias dos servizos deberán notificar calquera problema de saúde (alerxias, intolerancias a alimentos, enfermidades, etc.) que repercuta na elaboración dos almorzos e na atención ao/a neno/a.

Elaboraranse menús específicos para os nenos e nenas con necesidades alimentarias especiais e terase o coidado específico que requiran. Neste caso será imprescindible presentar o informe médico que avale as ditas necesidades e que proporcione as instrucións e medidas necesarias que se deberán adoptar. Este informe médico presentarase no momento de formalizar a matrícula. No caso de que a necesidade apareza con posterioridade, presentarase o informe médico no momento que solicite o tratamento especial. Os nenos e nenas que tivesen o tratamento especial nos cursos anteriores, deberán presentar informes médicos actualizados cada dous anos ou cando se lles requiran por parte do Concello.

No caso dun problema vírico ocasional, no que o/a usuario/a necesite unha dieta adstrinxente ou branda, comunicaráselle á persoa coordinadora do monitorado, de forma presencial ou telefónica, coa seguinte antelación:

Para o servizo Madrugadores antes das 18:00h do día anterior.

Se as menores teñen que medicarse durante o desenvolvemento dalgún dos servizos, deberán traer o medicamento e unha autorización asinada polo pai, nai ou titores/as, na que se especifique a dose e o momento no que haberá que administrala.

O monitorado, en ningún caso, administrará un medicamento aos usuarios/as sen a autorización por escrito asinada polo pai, nai ou polo seu titor/a.

Non poderán asistir os/as usuarios/as con febre (38º rectal, 37,5º bucal, 37,2º axilar), diarrea, vómitos, ou enfermi- dades contaxiosas, (rubéola, papeiras, sarampelo, lombrigas, gastroenterite vírica, gripe, varicela, etc.). Tampouco poderán asistir os usuarios ou usuarias que teñan piollos, ata que estes queden eliminados.

De apareceren síntomas de febre, dalgunha das enfermidades anteriores, ou da existencia de piollos, poñerase en coñecemento dos pais/nais/titor/a para que recollan ao/a neno/a o antes posible.

Artigo 29. Pagamento.

A estes servizos de conciliación seralles de aplicación o prezo público municipal regulado na corresponte ordenanza fiscal.

Artigo 30. PRESCRICIÓNS XERAIS

O incumprimento das regras establecidas do presente Regulamento por parte dos usuarios do servicio, xa sexa por neglixencia ou dolo, que incorran en algunhas das condutas tipificadas coma faltas será castigada coas sancións previstas no mesmo.

Artigo 31. FALTAS

As faltas clasifícanse en leves, graves e moi graves.

1.- Serán faltas leves:

· A falta de consideración ao persoal ou os demais usuarios.

· Non traer ós menores aseados e limpos.

· Non respectar os horarios establecidos, tanto de entrada como de saída.

· Calquera incumprimento dos deberes dos usuarios non tipificado coma falta grave o moi grave.

2.- Serán faltas graves:

· A grave falta de consideración ó persoal ou os demais usuarios.

· A comisión da terceira falta leve durante o curso escolar.

· Non informar das enfermidades susceptibles de contaxio que padeza o neno.

3.- Serán faltas moi graves:

· Exercer violencia física con calquera persoa usuaria do servizo ou persoal do mesmo.

· Formular coaccións ou ameazas con calquera usuaria do servizo ou persoal do mesmo.

· Falsear ou ocultar datos en relación co goce de calquera prestación ou servizo, que provoquen que o usuario tivera vantaxe á hora de acceder a praza ou desfrutase de tarifas inferiores as que lle correspondese segundo este regulamento e a ordenanza reguladora do prezo público.

· A subtracción de bens ou calquera obxecto do Centro, do persoal ou de outros usuarios.

· A comisión dolosa de danos nas instalacións ou enxoval.

· A comisión da segunda falta grave durante o curso escolar.

Artigo 32. SANCIÓNS

As sancións aplicables polas infraccións deste Regulamento serán as seguintes:

1.- Sancións por falta leve:

· Amoestación individual por escrito.

2.- Sancións por falta grave:

· Suspensión dos dereitos de asistencia ao servizo de quince días a un ano de duración.

3.- Sancións por falta moi grave:

Perda da condición de beneficiario do servizo por unha duración mínima de un ano e máxima de tres anos.

Artigo 33. PROCEDEMENTO SANCIONADOR

O procedemento sancionador será o previsto na Lei 39/2015, de 1 de outubro, de procedemento administrativo común das administracións públicas.

Será competente para iniciar o procedemento e impoñer as sancións a Alcaldía-Presidencia ou concelleiro delegado no seu caso, previo informe dos servizos municipais competentes, e tramitación de expediente no que se lle dea audiencia ao usuario.

Con independencia das sancións que poidan impoñerse, o infractor estará obrigado a restitución e reposición dos bens ao seu estado anterior, coa indemnización dos danos irreparables e prexuízos causados, no prazo que se fixe na resolución correspondente. O importe destas indemnizacións fixarase executoriamente polo órgano competente para impoñer as sancións.

O concello poderá utilizar os medios de execución forzosa previstos na Lei 39/2015, de réxime xurídico de administracións publicas e do procedemento administrativo común ou norma vixente aplicable ao caso, podendo facerse efectivo a través do procedemento de prema ou constrinximento.

A efectos da imposición de sancións, o órgano competente resolverá atendendo as seguintes circunstancias:

· Intencionalidade.

· A perturbación que poida producir no funcionamento normal da Administración e o servizo.

· Os danos e prexuízos que poidan implicar para os cidadáns ou usuarios dos servizos.

· Reincidencia na comisión das faltas.

· En xeral, a transcendencia para a salubridade pública.

No caso de que os feitos imputados puidesen ser constitutivos de faltas graves ou moi graves, o Alcalde-Presidente ou concelleiro delegado no seu caso, a proposta do instrutor, poderá adoptar coma medida cautelar a suspensión de asistencia ao servizo mentres se tramita o correspondente expediente por un prazo máximo de seis meses, atendendo a gravidade das condutas presuntamente cometidas e a súa repercusión no bo funcionamento do servizo e os dereitos dos demais usuarios.

DISPOSICIÓN ADICIONAL PRIMEIRA.

O presente regulamento entrará en vigor tras a súa aprobación definitiva, unha vez publicado integramente no Boletín Oficial da Provincia e transcorrido o prazo a que se refire o artigo 65.2 da Lei 7/1985, do 2 de abril, reguladora das bases do réxime local, conforme ao disposto no art. 70.2 do mesmo texto normativo.

DISPOSICIÓN FINAL.

O presente regulamento permanecerá vixente en tanto non se acorde a súa modificación ou derrogación expresa.