Val do Dubra - Regulamento núm. 5, do procedemento de adxudicación de prazas na escola infantil municipal do concello de Val do Dubra

Regula-lo procedemento de adxudicación de prazas na escola infantil municipal de Val do Dubra.

- Os pais ou representantes legais, e mailo menor para o que se solicita a praza, deberán figurar de alta no padrón municipal de habitantes de Val do Dubra na data da solicitude.

- O rapaz para o que se solicita a praza deberá ter como mínimo tres meses de idade no momento de ingreso no centro, e non ter cumpridos os tres anos o 31 de decembro do ano no que se solicita a praza.

A integración de nenos/as con discapacidade estará supeditada para cada curso á existencia de persoal axeitado e en número suficiente. En ningún caso haberá máis dun neno/a de integración por aula, e a efectos de ratio, estas prazas contabilizaranse como dúas.

As reservas de praza dos nenos/as xa matriculados/as, levarase a cabo do 1 ó 30 de xuño de cada ano, e as novas solicitudes dende o mes de setembro ata o mes de abril.

Non poderá renovar praza o solicitante que no momento da reserva teña pendente o pagamento dalgunha mensualidade.

As solicitudes presentaranse no Rexistro Xeral do Concello, segundo modelo establecido, sen prexuízo do disposto no artigo 38.4 da Lei 30/92, do 26 de novembro, de réxime xurídico das administracións públicas e procedemento administrativo común, achegando con ela os seguintes documentos:

1. Fotocopia do libro de familia completa.

2. Xustificación de ingresos: última nómina e declaración do IRPF de cada membro da unidade familiar computable para efectos económicos: pais e fillos, e no caso de familias monoparentais, só pai ou nai e fillos.

No caso de non ter obriga de presentar declaración:

Os solicitantes de devolución rápida (Mod. 104), achegarán copia da comunicación que lles envía a Axencia Estatal Tributaria en aplicación do artigo 81 da Lei 40/1998, do 9 de decembro, do imposto sobre a renda das persoas físicas.

As persoas non obrigadas a declarar e que non solicitan devolución rápida (Mod. 104) achegarán certificación dos datos existentes na Administración, expedida pola Axencia Estatal de Administración Tributaria, en aplicación do artigo 16 da Lei 1/1998, do 26 de febreiro, de dereitos e garantías dos contribuíntes. Certificación positiva ou negativa de percepción da prestación económica do Inem, xustificantes doutros ingresos.

3. Certificado de residencia no Concello de Val do Dubra e informe de convivencia da unidade familiar. Para estes efectos, enténdese por unidade de convivencia ás persoas unidas por vínculos de matrimonio ou ás unidades de convivencia que constitúan núcleos estables de vida en común, e mailos seus fillos.

4. Certificados de minusvalía (de se-lo caso).

5. Título de familia numerosa (de se-lo caso).

De carecer dalgún dos documentos sinalados nos apartados 1), 2) e 3) será necesario presentar calquera outro documento que acredite oficialmente a situación familiar, económica ou social, segundo proceda.

Así mesmo, e de carecer de acreditación documental dalgunha das incidencias alegadas, poderase presentar informe dos servicios sociais do Concello.

No caso de que a solicitude non reúna os requisitos esixidos, o Concello, consonte o artigo 71 da Lei 30/92, do 26 de novembro, de réxime xurídico das administracións públicas e procedemento administrativo común, requirirá ó interesado para que, nun prazo de 10 días, corrixa os erros detectados ou engada os documentos necesarios, con indicación de que, se así non se fixese, se terá por desistido da súa petición, logo de resolución en tal sentido.

Os interesados terán que presentar dentro dos 15 días seguintes á notificación da admisión a seguinte documentación complementaria:

* Certificado médico do neno/a.

* Carta actualizada de vacinación.

* 2 fotografías tamaño carné do neno/a.

Se non presentase a devandita documentación no prazo sinalado, terase por decaída a solicitude de praza logo de resolución para este efecto.

A selección das solicitudes efectuarase en función da puntuación acadada segundo o baremo establecido no anexo I, mediante o que se avaliarán os factores socioeconómicos familiares e laborais da unidade familiar. En caso de obter igual puntuación, daráselle prioridade á renda per cápita máis baixa.

A tódalas solicitudes recibidas aplicarase un procedemento de estimación. Para tal fin constituirase unha comisión coa seguinte composición:

Presidente: o alcalde.

Vocal: o/a director/a da gardería e a asistente social.

Secretario/a: un/ unha funcionario/a designado pola Alcaldía.

Os acordos tomaranse por maioría simple e resolverá, en caso de empate, o presidente.

7.1. Unha vez estudiadas pola comisión tódalas solicitudes presentadas, e unha vez resoltas, procederase á publicación da relación provisional de admitidos, e da lista de espera, no taboleiro de anuncios do Concello.

7.2. No prazo de dez días contados a partir da data de exposición da relación provisional de admitidos, os interesados poderán presentar no rexistro do Concello as reclamacións que estimen oportunas dirixidas ó presidente da comisión de baremación.

7.3. Estudiadas pola comisión de baremación tódalas reclamacións presentadas, expoñerase no taboleiro de anuncios do Concello a relación definitiva de admitidos e a lista de espera coa puntuación obtida en cada caso.

7.4. As resolucións recaídas deberánselles notificar ós solicitantes. Os admitidos disporán dun prazo de quince días para confirmaren a súa praza e achegaren a documentación complementaria.

7.5. As vacantes que se vaian producindo ó longo do curso serán cubertas por rigorosa orde entre os solicitantes en lista de espera.

Non poderá renova-la súa praza o solicitante que no momento da reserva teña pendente o pagamento dalgunha mensualidade.

A inasistencia do usuario por un período determinado, xustificado ou non, non dá dereito á reducción nas tarifas, mentres non se formalice a baixa correspondente.

Con carácter excepcional, poderase solicitar exención de pagamento por causas de enfermidade do usuario, dende o primeiro día do segundo mes posterior ó comezo da ausencia, ata o primeiro día do mesmo mes de incorporación.

Será causa de baixa na gardería por algunha das circunstancias seguintes:

9.1. Por cumprimento da idade máxima regulamentaria de permanencia na gardería.

9.2. Por solicitude dos pais ou representantes legais.

9.3. Polo non pagamento da cota establecida durante dous meses consecutivos ou tres alternos, calquera que sexa o curso escolar ó que se refira a débeda.

9.4. Por comprobación de falsidade nos documentos ou datos achegados.

9.5. Por incompatibilidade ou inadaptación absoluta para permanecer no centro.

9.6. Por falta de asistencia continuada durante un mes sen causa xustificada.

As baixas por incompatibilidade ou inadaptación serán resoltas pola comisión, unha vez oídos a dirección escolar e mailo interesado. As baixas producidas ó longo do curso escolar por calquera dos motivos anteriores, cubriranse coas solicitudes que quedasen en lista de espera en cada grupo de idade por rigorosa orde de entrada da solicitude no rexistro da Corporación local.

As vacacións de verán terán un mes de duración, que será o de agosto.

O horario da gardería será de 8:00 ás 20:00 horas, sendo o máximo de horas de asistencia do menor ó centro de oito horas. Só en casos de especial necesidade, e trala debida xustificación dos horarios de traballo dos dous pais e a falta dunha persoa que os poida recoller do centro, permanecerían no centro o máximo do horario. Será estimado pola comisión.

A comisión poderá modifica-lo horario segundo as necesidades existentes, así como os casos de horarios especiais.

A comisión proporá ó Pleno a modificación destas bases segundo as necesidades existentes, e como mínimo serán revisadas anualmente.

Dende a dirección do centro fomentarase a colaboración dos pais coa escola infantil e as relacións co persoal desta, así coma a participación nos órganos colexiados que puidesen crearse.

A prestación do servicio da escola infantil municipal financiarase coas achegas da Comunidade Autónoma de Galicia, da Deputación Provincial, do propio Concello e dos propios usuarios.

Este regulamento entrará en vigor unha vez publicado no Boletín Oficial da Provincia e unha vez transcorrido o prazo ó que se refire o artigo 70.2, en relación co 65.2 da citada Lei 7/1985, e comezará a aplicarse a partir do día seguinte.