Teo - Ordenanza fiscal reguladora da taxa pola entrada de vehículos a través das beirarrúas e por reserva da vía pública para aparcadoiro exclusivo, carga e descarga de mercadorías de calquera clase.

No uso das facultades concedidas polos artigos 133.2 e 142 da Constitución e polo artigo 106 da Lei 7/1985, do 2 de abril, reguladora das bases de réxime local, en relación cos artigos 149 e seguintes, 137 e seguintes da Lei 5/1997, do 22 de xullo, de Administración Local de Galicia e de conformidade co disposto nos artigos 15 a 20 da Lei Reguladora das facendas locais, Texto Refundido aprobado por Real Decreto Lexislativo 2/2004, de 5 de marzo, o Concello de Teo establece a taxa pola entrada de vehículos a través das beirarrúas ou pola reserva da vía pública para aparcadoiro exclusivo, carga e descarga de mercadorías de calquera clase á que se refire o artigo 20.3 da devandita Lei de Facendas Locais, que se rexerá pola presente ordenanza fiscal.

Constitúe o feito impoñible a utilización privativa ou o aproveitamento especial do dominio público local pola ocupación deste para a entrada de vehículos a través das beirarrúas ou pola reserva da vía pública para aparcadoiro exclusivo, carga e descarga de mercadorías de calquera clase.

1. Son suxeitos pasivos, en concepto de contribuíntes, as persoas físicas e xurídicas, así como as entidades ás que se refire o art. 35 e seguintes da Lei 58/2003, de 17 de decembro, xeral tributaria que gocen, utilicen o aproveiten especialmente o dominio público local en beneficio particular.

2. Terán a condición de substitutos do contribuínte os propietarios das fincas e locais a que dean acceso as entradas de vehículos, que poderán repercutir, no seu caso, as cotas sobre os beneficiarios.

A base tributaria estará constituída, segundo ó feito impoñible:

1. Polo número, en metros da lonxitude da entrada.

2. Polo número de prazas no caso de garaxes comunitarios.

1. A contía da taxa regulada nesta ordenanza será a resultante de aplicar as tarifas contidas no apartado seguinte.

2. Tarifa primeira:

a) Entrada de vehículos en vivendas unifamiliares, por metro lineal e ano: 11,42 euros.

b) Entrada de vehículos en garaxes comunitarios, por metro lineal e ano: 12,02 euros, multiplicados polos seguintes coeficientes, segundo o caso:

- De 2 a 9 prazas: coeficientes que van do 1,2 ó 1,9, segundo o número de prazas.

(Exemplo: un garaxe de 5 prazas e tres metros de entrada sería: 12,02 x 3 x 1,5= 54,09 euros)

- De 10 a 19 prazas: coeficientes do 2,0 ó 2,9

(Exemplo: garaxe de 15 prazas sería 12,02 x 3 x 2,5= 90,15 euros)

- De 20 a 29 prazas: coeficientes do 3,0 ó 3,9

- De 30 a 39 prazas: coeficientes do 4,0 ó 4,9

- De 40 a 49 prazas: coeficientes do 5,0 ó 5,9

Cando o número de prazas exceda de 49 irase calculando a taxa por tramos de dez en dez e multiplicando polo coeficiente que corresponda.

3. Tarifa segunda:

a) Entrada de vehículos en garaxes ou locais para a garda de vehículos podendo realizar reparacións destes, prestación de servicios de engraxado, lavado, petroleado, etc., ou repostar carburantes, por metro lineal e ano: 18,03 euros, calculándose a taxa do mesmo xeito ca no apartado anterior.

b) Entrada de vehículos en almacéns ou similares, por metro lineal e ano: 30,05 euros.

4. Tarifa terceira:

a) Reserva de aparcadoiros para carga ou descarga de mercadorías, por metro lineal e ano: 18,03 euros.

b) Reserva de espacios en vías públicas para carga ou descarga de materiais de construcción, formigóns, mudanzas, etc., por día: 15,00 euros.

5. Placa:

O importe da placa deberá pagalo o interesado e o prezo será o de compra segundo o estipulado na factura.

1. O período impositivo coincide co ano natural, excepto cando se trate de supostos de inicio da utilización privativa ou aproveitamento especial do dominio público local, xa que, neste caso abranguerá desde a data da concesión da autorización municipal ata o remate do ano natural.

2. A taxa devéngase o 1 de xaneiro de cada ano e as cotas serán irreducibles, agás nos casos de utilización privativa ou aproveitamento especial do dominio público local no que a data de solicitude non coincida co ano natural, prorratearase por semestres a partir da aprobación da solicitude pola Xunta de Goberno Local.

3. Así mesmo, e no caso de cesamento na utilización privativa ou aproveitamento especial as cotas serán prorrateables por semestres naturais, computando no prorrateo aquel no que se produce o cesamento.

1. Os interesados na obtención dunha autorización para utilizar privativamente ou para o aproveitamento especial do dominio público local para a entrada de vehículos a través das beirarrúas ou pola reserva da vía pública para o aparcadoiro exclusivo, carga e descarga de mercadorías de calquera clase deberán presentar unha solicitude nas oficinas xerais do concello, cubrindo o modelo establecido, que se lle facilitará nas devanditas oficinas.

2. Neste impreso especifícase o lugar exacto da ocupación e se fai unha descrición desta.

3. Coa solicitude iníciase o expediente, inscrición no rexistro de vados e informe sobre a viabilidade desta ocupación.

4. Os servicios técnicos ou a Policía Local deste concello comprobarán as solicitudes presentadas e informaranas propoñendo a concesión ou denegación da licencia.

5. Coa concesión da licencia practicarase a liquidación da taxa, así como o importe da placa e non se considerará concedida a licencia ata tanto non se xustifique o pagamento da débeda tributaria.

6. Unha vez autorizada a ocupación entenderase prorrogada anualmente mentres o interesado non presente declaración de baixa ou sexa revogada polo concello, de acordo co que se estableza na Ordenanza municipal de circulación.

Para todo o relativo á cualificación das infraccións tributarias e á imposición das sancións correspondentes, rexerá o disposto nos artigos 181 e seguintes e seguintes da Lei xeral tributaria.

A presente ordenanza fiscal entrará en vigor no día da súa publicación no Boletín Oficial da Provincia e comezará a aplicarse a partir do día 1 de xaneiro de 2005, continuando vixente en tanto non se acorde a súa modificación ou derrogación expresas.