Padrón - Regulamento orgánico municipal

Artigo 1.º .

O Concello de Padrón, no exercicio da potestade regulamentaria e de autoorganización que lle recoñece a Lei 7/1985, do 2 de abril, reguladora das Bases de Réxime Local, e o artigo 6.1 a) e 59.1 da Lei de Administración Local de Galicia, promove, polo presente regulamento a súa organización e réxime de funcionamento dos órganos básicos e complementarios que no mesmo se establece.

Artigo 2.º .

Na regulación das materias obxecto deste regulamento rexe a seguinte prelación de fontes:

a) Lei de Administración Local de Galicia.

b) Lei Reguladora das Bases de Réxime Local.

c) Regulamento Orgánico Municipal.

d) Lexislación Xeral do Estado, especialmente o Regulamento de Organización, Funcionamento e Réxime Xurídico das Entidades Locais, para aquelas materias non reguladas polo presente regulamento orgánico ou que o seu desenvolvemento resulte insuficiente.

Artigo 3.º .

Correspóndelle ó alcalde dictar instruccións interpretativas e aclaratorias da normativa reseñada no artigo anterior, para a súa aplicación no municipio.

Artigo 4.º .

Correspóndelle ó Concello pleno o control e fiscalización de tódolos órganos de goberno.

Artigo 5.º .

Os membros da corporación, para os efectos da súa actuación corporativa, constituiranse en grupos, que se corresponderán cos partidos políticos, federacións, coalicións ou agrupacións que obtivesen postos na corporación. Cada partido político, federación, coalición ou agrupación constituirá un único grupo.

Artigo 6.º .

Integraranse, en calquera caso no grupo mixto, os membros dos partidos políticos, federacións, coalicións ou agrupacións que non obtivesen un mínimo de dous escanos.

No suposto de que non existise grupo mixto, este quedará constituído polo membro do partido político, federación, coalición ou agrupación que obtivese un só escano.

Durante o mandato da corporación, ningún membro dela poderá integrarse nun grupo distinto daquel no que o faga primeiramente.

Artigo 7.º .

Os grupos políticos constituiranse mediante escrito dirixido ó presidente e subscrito por tódolos seus integrantes, que se presentarán na Secretaría Xeral do Concello dentro dos cinco días hábiles seguintes á constitución da corporación.

Se algún concelleiro non asinase o escrito de constitución do grupo, esto non impedirá a súa constitución, e os non asinantes integraranse no grupo mixto.

No mesmo escrito de constitución farase consta-la designación do voceiro do grupo, podendo designarse tamén suplentes.

Artigo 8.º .

Da constitución dos grupos políticos e dos seus integrantes e voceiros, o presidente dará conta ó Pleno na primeira sesión que se celebre tras cumprirse o prazo previsto no artigo anterior.

Artigo 9.º .

Os membros da corporación que adquiran a súa condición con posterioridade á sesión constitutiva deberán incorporarse ó grupo correspondente á lista na que foron elixidos ou, no seu caso, ó grupo mixto. No primeiro suposto terán un prazo de cinco días hábiles, que comezará a contar desde que tomen posesión no seu cargo, para acredita-la súa incorporación ó grupo que corresponda, mediante escrito dirixido ó presidente e asinado, así mesmo, polo correspondente voceiro. Se non se produce a súa integración na forma prevista anteriormente, e salvo que se interpuxese causa de forza maior, integrarase automaticamente no grupo correspondente á lista na que saísen elixidos.

Artigo 10.º .

Correspóndelle ós grupos políticos designaren, mediante escrito do seu voceiro dirixido ó presidente, aqueles dos seus compoñentes que os vaian representar en tódolos órganos colexiados integrados por corporativos pertencentes ós diversos grupos.

Artigo 11.º .

Sempre que sexa posible, os diversos grupos políticos disporán, na sede da entidade local, dun despacho ou local para recibir visitas dos cidadáns.

Os grupos políticos poderán facer uso dos locais municipais de reunión da corporación para realizaren reunións e sesións de traballo con asociacións para a defensa dos intereses colectivos, xerais ou sectoriais da poboación. Estas reunións non se permitirán se coinciden con sesións do Pleno ou porque a disponibilidade de espacios para outros actos político-administrativos da corporación o impidan.

Artigo 12.º .

Son órganos necesarios do Concello os enumerados na Lei de Administración Local de Galicia, é dicir:

a) O alcalde.

b) Os tenentes alcaldes.

c) O Pleno.

d) A comisión de goberno.

e) A comisión especial de contas.

f) As comisións de estudio, informe e consulta.

Artigo 13.º .

As atribucións dos distintos órganos necesarios son as que veñen determinadas na Lei 7/1985, do 2 de abril, reguladora das Bases de Réxime local; Lei 5/1997, do 22 de xullo, de Administración Local de Galicia, así como no texto refundido de disposicións legais vixentes en materia de réxime local, aprobado polo R.D.L. 781/1986, do 18 de abril.

Artigo 14.º .

O Pleno e o alcalde poden efectuar delegacións a prol da comisión de goberno.

En todo caso entenderanse delegadas polo Pleno a prol de dita comisión de goberno, as atribucións sinaladas no artigo 64.2, letras g), l) e n) da Lei de Administración Local de Galicia, ó amparo do establecido no artigo 64.4. Para a delegación destas atribucións do Pleno en favor da comisión de goberno requirirase acordo adoptado pola maioría do número legal de membros da corporación para a aprobación deste regulamento.

Igualmente, o alcalde delega na comisión de goberno as atribucións que sinala o artigo 61 da citada Lei de Administración Local de Galicia, agás as de convocar e presidi-las sesións do Pleno e da comisión de goberno, e as mencionadas nas letras b), f), h), j) e k) do apartado 1 deste artigo, que son indelegables.

Tamén pode o alcalde efectuar delegacións xenéricas ou específicas a prol de calquera dos concelleiros, aínda que non pertenzan á comisión de goberno.

Artigo 15.º .

As delegacións xenéricas e especificas referiranse a unha ou varias materias determinadas, abranguendo tanto a facultade de dirixi-los servicios correspondentes como a de xestionalos, baixo a supervisión directa do señor alcalde.

De tódalas delegacións e das súas modificacións darase conta ó Pleno na primeira sesión que se celebre.

Artigo 16.º .

O órgano delegante poderá abocar en calquera intre as competencias delegadas. Ningún órgano poderá delegar nun terceiro as atribucións ou potestades recibidas por delegación doutro órgano.

Artigo 17.º .

O número e a denominación das distintas áreas de servicios que poden ser obxecto de delegación será de libre determinación do señor alcalde.

Artigo 18.º .

O nomeamento dos tenentes de alcalde será libremente realizado polo alcalde entre os membros da comisión de goberno.

O nomeamento, así coma o cesamento, farase mediante resolución do alcalde, da que se dará conta ó Pleno na primeira sesión que se celebre, facéndose público polos medios de costume; todo iso sen prexuízo da súa efectividade dende o día seguinte á sinatura da resolución, se non se dispuxese outra cosa nela.

Artigo 19.º .

A condición de tenente de alcalde pérdese, ademais de polo cesamento decretado pola Alcaldía, por renuncia expresa manifestada por escrito e por perda da condición de membro da comisión de goberno.

Artigo 20.º .

Correspóndelle ós tenentes de alcalde substituír na totalidade das súas funcións e pola orde do seu nomeamento, ó alcalde, no caso de ausencia, enfermidade ou impedimento que imposibilite a este para o exercicio das súas atribucións, así como desempeña-las funcións de alcalde no suposto de vacante na Alcaldía, ata que tome posesión o novo alcalde.

No caso de ausencia, enfermidade ou impedimento, as funcións do alcalde non poderán ser asumidas polo tenente de alcalde a quen corresponda sen expresa delegación da Alcaldía.

Nembargantes o disposto anteriormente, cando o alcalde se ausente do término municipal sen ter conferida a delegación ou cando por causa imprevista lle resultase imposible outorgala, será substituído polo tenente alcalde que lle corresponda, dando conta posterior á corporación.

Artigo 21.º .

Nos supostos de substitución do alcalde por razóns de ausencia ou enfermidade, o tenente de alcalde que asuma as súas funcións non poderá revoga-las delegacións que outorgase o primeiro.

Sección 1.ª. Funcionamento do Pleno.

Artigo 22.º .

Os tipos de sesión e a súa convocatoria rexerase polo establecido na Lei de Administración Local de Galicia, na Lei reguladora das Bases do Réxime Local, o texto refundido das disposicións legais vixentes sobre réxime local e, no non establecido neste regulamento, no ROF.

Artigo 23.º .

O Pleno realizará sesión ordinaria, como mínimo, cada dous meses, e extraordinaria cando así o decida o presidente ou o solicite a cuarta parte, polo menos, do número legal de membros da corporación. Neste último caso o presidente verase obrigado a convocala dentro dos catro días seguintes á súa solicitude e a súa celebración non poderá demorarse por máis de un mes dende que foi solicitada.

O Pleno sinalará os días e horas nas que terán lugar ditas sesións, que poderán ser mudados en calquera intre posterior por dito órgano. Igualmente, o alcalde, por propia iniciativa ou a petición dos voceiros, por causa xustificada, poderá varia-lo día ou a hora dalgunha sesión, alonxándoo só o imprescindible dos fixados polo Pleno e comunicándollo ós interesados e publicándoo no taboleiro de anuncios coa maior brevidade posible.

Artigo 24.º .

As sesións poderán celebrarse en primeira ou segunda convocatoria. A segunda convocatoria sería dous días despois da sinalada para a primeira ou ó día seguinte hábil se cadrase en festivo. Neste caso non sería necesario o envío da orde do día, pero si a notificación da súa celebración en segunda convocatoria.

Artigo 25.º .

As sesións extraordinarias convocadas con tal carácter a solicitude da cuarta parte, polo menos, do número legal de membros da corporación, deberán pedirse por escrito no que se razoe o asunto ou asuntos que a motiven, asinado persoalmente por tódolos que a subscriben. Tamén deberán achegar a dito escrito tódolos documentos que deban estar a disposición dos señores concelleiros na Secretaría Xeral desde o intre da convocatoria. A relación de asuntos incluídos no escrito non enerva a facultade do alcalde de determina-los puntos da orde do día, se ben a exclusión neste dalgún dos asuntos propostos deberá ser motivada.

Artigo 26.º .

Calquera que sexa a clase de sesión, levantarase no mesmo día en que se abrise e deberá respecta-lo principio de unidade de acto.

Artigo 27.º .

A orde do día das sesións será fixado polo alcalde asistido do secretario. Así mesmo poderá solicita-la asistencia dos membros da comisión de goberno e consultar, se o estima oportuno, ós voceiros dos grupos existentes na corporación.

Os asuntos que se inclúan na orde do día deberán estar, previamente, dictaminados ou informados pola comisión informativa correspondente, no caso de que o Pleno acordase a súa constitución, ou polos concelleiros-delegados das respectivas áreas cando non se crease a comisión informativa para estes servicios concretos.

O alcalde, por razóns de urxencia, poderá incluír na orde do día, a iniciativa propia, asuntos que non fosen previamente informados pola respectiva comisión, en caso de que se crease, previa ratificación polo Pleno da urxencia do asunto. No caso de que a comisión non estivese constituída nesa área, será necesario e suficiente o informe do concelleiro-delegado da mesma.

Na orde do día das sesións ordinarias incluirase sempre o punto de rogos e preguntas e darase conta das resolucións da Alcaldía para coñecemento.

Artigo 28.º .

O alcalde convocará ós concelleiros a sesións plenarias, sexan ordinarias ou extraordinarias, polo menos con dous días hábiles de antelación, agás as extraordinarias de carácter urxente, nas que a convocatoria deberá ser ratificada polo Pleno. A documentación íntegra dos asuntos incluídos na orde do día, que servirá como base para o debate, e no seu caso, para a votación, estará a disposición dos señores concelleiros dende o mesmo día da convocatoria, na Secretaría da corporación.

Se varios concelleiros desexasen examina-los expedientes á vez, distribuiranos entre eles mesmos. Se non se puxesen de acordo, requirirán ó secretario para que emita un informe proposta verbal. Se dita proposta tampouco satisfacese ós interesados, someterase á decisión do señor alcalde-presidente, que resolverá distribuíndo o tempo e os expedientes de xeito que estes poidan ser vistos por quen quixesen facelo.

Artigo 29.º .

O horario para exame de expedientes será o correspondente ó normal de oficina. Nembargantes, aquel poderá ser ampliado pola presidencia cando o número ou a importancia dos asuntos así o requira. Dita ampliación será posta en coñecemento dos señores concelleiros e da Secretaría Xeral. Baixo ningún concepto os expedientes poderán sacarse da Secretaría Xeral ou do lugar no que estean postos de manifesto.

Artigo 30.

O quórum mínimo dun tercio do número legal de membros da corporación para poderen celebrar validamente sesión, manterase durante todo o desenvolvemento da mesma. A ausencia dun ou varios concelleiros, unha vez iniciada a deliberación dun asunto, equivale, para os efectos da votación correspondente, á súa abstención.

Artigo 31.º .

O disposto no artigo anterior enténdese sen prexuízo de que os asuntos, ou algún deles, a resolver nunha sesión, esixan un número especial de asistencia para adoptar acordos válidos sobre eles; neste caso, o quórum preciso será o que se estableza con ese número especial.

Artigo 32.º .

No suposto de que no día e na hora sinalados na convocatoria para celebrar sesión non concorresen membros da corporación bastantes, acreditarase tal circunstancia polo secretario mediante dilixencia, na que se expresará o número e nome dos que asistisen e dos que xustificasen a súa ausencia e reiterarase a convocatoria cantas veces sexa preciso ata logra-la asistencia que cumpra o quórum necesario.

Artigo 33.º .

O público asistente ás sesións non poderá intervir nos debates, nin tampouco se permitirán manifestacións de agrado ou desagrado, podendo o presidente proceder, en casos extremos, á expulsión do salón de todo aquel que por calquera causa impida o normal desenvolvemento da sesión.

Sección 2.ª. Dos debates e intervencións.

Artigo 34.º .

Aberta a sesión, o secretario procederá á lectura da acta da sesión anterior, excepto que se tivese remitido previamente copia da mesma; nese caso tense por lida, quedando aprobada se ningún dos asistentes formulase reparos. De haber oposición, a corporación decidirá, por maioría simple, a súa aprobación ou modificación, que en ningún caso afectará ó fondo dos acordos adoptados e só se poderán emenda-los simples erros materiais ou de feito.

Artigo 35.º .

O estudio dos asuntos iniciarase coa lectura polo secretario de cada un dos puntos da orde do día e dos dictames elaborados polas comisións informativas, se existisen, ou dos concelleiros-delegados das respectivas áreas. Se ninguén pedise a palabra, quedarán aprobados por unanimidade.

Artigo 36.º .

Se se promove debate, as intervencións serán ordenadas polo alcalde, conforme ás seguintes regras:

a) Só poderá facerse uso da palabra previa autorización do presidente.

b) No debate, os diversos grupos consumirán unha primeira quenda, dunha duración proporcional ós resultados electorais, que nunca excederá de tres minutos.

c) Os concelleiros que consumiron a súa quenda, poderán volver facer uso da palabra para rectificar concisamente, e por unha soa vez, os feitos ou conceptos que se lle tivesen atribuído. Para estes efectos, o alcalde concederalles a palabra pola metade do tempo anterior como máximo.

d) Aquel que se considerase aludido por unha intervención, poderá solicitar do alcalde que se conceda unha quenda por alusións, que será breve e concisa, sen que poida exceder de un minuto e medio.

e) O presidente poderá reducir ou amplia-los tempos de intervención nos debates en razón da importancia ou transcendencia do asunto.

f) Non se admitirán outras interrupcións cás do presidente para chamar á orde ou á cuestión debatida. Os membros da corporación poderán en calquera intre do debate pedi-la palabra para expoñer unha cuestión de orde, invocando a tal efecto a norma da que se reclama aplicación. O presidente resolverá o que proceda sen que por este motivo se principie debate ningún. O secretario e mailo interventor poderán intervir cando fosen requiridos polo presidente por razóns de asesoramento técnico ou aclaración de conceptos. Cando ditos funcionarios entendan que no debate se expuxo algunha cuestión sobre a que poida dubidarse da súa legalidade ou puidese ter implicacións económicas, poderá solicitarlle ó presidente o uso da palabra para asesorar á corporación.

Artigo 37.º .

Nas deliberacións poderá intervir cada grupo municipal mediante o voceiro ou outros membros pola orde inversa de representantes na corporación, consumindo quenda en primeiro lugar o grupo mixto, de habelo; logo, os minoritarios, e en último término o maioritario, agás pacto en contrario.

A intervención normal de cada grupo non excederá de cinco minutos. Nembargantes, naqueles temas que pola súa importancia ou complexidade así o requiran e a petición de calquera voceiro, o presidente notificaralle ó Pleno a duración das intervencións antes de comezar estas.

A duración da segunda quenda terá unha duración máxima do cincuenta por cento da quenda anterior.

O tempo que corresponda ó grupo mixto poderá repartirse por igual entre os representantes das listas que o integran.

O presidente poderá acordar, durante o transcurso da sesión, que se interrompa a mesma para permiti-las deliberacións dos grupos sobre a cuestión debatida ou para descanso dos debates. Estas interrupcións non terán duración superior a dez minutos.

Artigo 38.º .

O alcalde poderá chamar á orde a calquera membro da corporación que:

a) Profira palabras ou verta conceptos ofensivos ó decoro da corporación ou dos seus membros, das institucións públicas ou de calquera outra persoa ou entidade.

b) Produza interrupcións ou, de calquera outro xeito, altere a orde das sesións.

c) Pretenda facer uso da palabra sen que se lle teña sido concedida ou unha vez que se lle teña sido retirada.

Tras tres chamadas á orde na mesma sesión (ou dúas chamadas á orde no debate dun mesmo asunto), coa advertencia na última, das consecuencias dunha nova chamada, o presidente poderá ordenar a un concelleiro que abandone o local no que se estea celebrando a reunión. Adoptando as medidas que considere oportunas para facer efectiva a expulsión.

Artigo 39.º .

Nos supostos nos que, de conformidade co establecido no artigo 76 da Lei 7/85, algún membro da corporación deba absterse de participar na deliberación e votación, deberá abandona-lo salón mentres se discuta e vote o asunto, agás cando se trate de debate-la súa actuación como corporativo, no que terá dereito a permanecer e defenderse.

Artigo 40.º .

Para os efectos do desenvolvemento das sesións e para defini-lo carácter das intervencións dos membros da corporación, empregarase a seguinte terminoloxía:

1.-DICTAME é a proposta sometida ó Pleno tralo estudio do expediente pola comisión informativa. Contén unha parte expositiva e un acordo a adoptar.

2.-PROPOSICIÓN é a proposta que se somete ó Pleno relativa a un asunto incluído na orde do día que acompaña á convocatoria. Conterá unha parte expositiva ou xustificación e un acordo, así mesmo, a adoptar. Non procederá entrar a debater nin votar unha proposición sen que previamente se ratificase, de acordo co disposto na lei, a inclusión do asunto na orde do día.

3.-MOCIÓN é a proposta que se somete directamente a coñecemento do Pleno ó amparo do prevido no regulamento. Poderá formularse por escrito ou oralmente, seguindo o procedemento establecido no artigo 91.4 do ROF.

4.-EMENDA é a proposta de modificación dun dictame ou proposición presentada por calquera membro mediante escrito dirixido ó presidente antes de se inicia-la deliberación do asunto.

5.- ROGO é a formulación dunha proposta de actuación dirixida a algúns dos órganos de goberno municipal. Os rogos formulados no seo do Pleno poderán ser debatidos, pero en ningún caso sometidos a votación.

Poden expoñer rogos tódolos membros da corporación ou grupos municipais a través dos seus voceiros, sempre que os anuncien á Presidencia con 24 horas de antelación ó comezo da sesión.

Os rogos poderán ser efectuados oralmente ou por escrito e serán debatidos xeralmente na sesión seguinte, sen prexuízo de que o poidan seren na mesma sesión que se formulen se o alcalde ou presidente o estiman conveniente.

6.-PREGUNTA é calquera cuestión exposta ós órganos de goberno no seo do Pleno. Poden facer preguntas tódolos membros da corporación ou grupos municipais a través dos seus voceiros. Serán presentadas con 24 horas de antelación ó comezo da sesión, por escrito, non sendo obrigación da presidencia, contestar a máis de 10 preguntas formuladas por cada grupo político que compón a corporación, dentro da mesma sesión.

Sección 3.ª.- Das votacións.

Artigo 41.º .

Rematado o debate dun asunto, procederase a súa votación.

Antes de comenza-la votación, o alcalde expoñerá clara e concisamente os termos da mesma e a forma de emiti-lo voto.

Unha vez iniciada a votación non poden interrumpirse por ningún motivo. Durante o desenvolvemento da votación, o presidente non concederá o uso da palabra e ningún membro corporativo poderá entrar no salón ou abandonalo.

Artigo 42.º .

O voto dos concelleiros é persoal e indelegable.

Artigo 43.º .

As votacións poden seren ordinarias, nominais e secretas. Son ordinarias as que se manifestan por signos convencionais de asentimento, disentimento ou abstención.

Son nominais aquelas votacións que se realizan mediante chamamento por orde alfabética de apelidos e sempre en último lugar o presidente, e na que cada membro da corporación, ó ser chamado, responde en voz alta "si", "non" ou "abstéñome".

Son secretas as que realizan por papeletas que cada membro da corporación vaia depositando nunha urna ou bolsa.

Artigo 44.º .

O sistema normal de votación será a votación ordinaria.

A votación nominal requirirá a solicitude dun grupo municipal aprobada polo Pleno por unha maioría simple en votación ordinaria, de acordo co disposto nos artigos 46 da Lei 7/85 e 210 da Lei 5/97, do 22 de xullo.

A votación secreta só poderá realizarse para a selección ou destitución de persoas, así como no suposto previsto no artigo 70.1 da Lei 7/85.

Artigo 45.º .

Rematada a votación ordinaria, o presidente declarará o acordado.

Inmediatamente de concluí-la votación nominal ou secreta, o secretario, computará os votos emitidos e anunciará en voz alta o seu resultado; en vista desto, o presidente proclamará o acordo adoptado.

Sección 4.ª. Das actas.

Artigo 46.º .

De cada sesión, o secretario estenderá acta na que fará constar tódolos requisitos que sinala o artigo 109 do ROF. De non celebrarse sesión por falla de asistentes ou outros motivos, o secretario suplirá a acta cunha dilixencia autorizada coa súa sinatura, na que consigne a causa e nomes dos concorrentes e dos que escusarán a súa ausencia.

Artigo 47.º .

O secretario redactará a acta de maneira concisa, configurando un extracto do sucedido e recollendo as opinións sintetizadas dos membros da corporación que interviñesen nas deliberacións, plasmando de forma fidedigna os acordos e os orzamentos imprescindibles que lle sirvan de base.

Todo concelleiro que desexe que consten especialmente as súas verbas na acta, deberá solicitalo expresamente do secretario.

Artigo 48.º .

Unha vez aprobada a acta polo Pleno, transcribiranse no libro de actas autorizándoa coa sinatura do alcalde e do secretario.

Sección 5.ª. Funcionamento da comisión de goberno.

Artigo 49.º .

A comisión de goberno celebrará sesión constitutiva á convocatoria do alcalde dentro dos 15 días seguintes a aquel no que este designase ós membros que a integran.

As sesións ordinarias terán lugar cada 15 días.

Non obstante, á proposta da Presidencia, poderá acordarse pola propia comisión a celebración de sesións ordinarias semanais.

Corresponde ó alcalde fixar mediante providencia o día e hora das sesións ordinarias.

As sesións extraordinarias e urxentes terán lugar cando con tal carácter sexan convocadas polo alcalde.

O alcalde poderá en calquera momento reunir á comisión de goberno cando estime necesario coñece-lo seu parecer ou pedi-la súa asistencia con anterioridade a dictar resolucións no exercicio das atribucións que lle corresponden.

Artigo 50.º .

As sesións da comisión de goberno axustaranse ó disposto na lexislación vixente e neste regulamento para as sesións plenarias, coas modificacións seguintes:

a) Entre a convocatoria e a celebración da sesión non poderá transcorrer menos de vintecatro horas, agás nos casos das sesións extraordinarias e urxentes, nas que , antes de entrar a coñece-los asuntos incluídos na orde do día, deberá ser declarada a urxencia por acordo favorable da maioría dos membros.

b) As sesións da comisión de goberno non serán públicas sen prexuízo da publicidade e comunicación ás Administracións estatal e autonómica dos acordos adoptados. Ademais, no prazo de 10 días deberá enviarse a tódolos membros da corporación copia da acta.

c) Para a válida constitución da comisión de goberno requírese a asistencia da maioría absoluta dos seus compoñentes. Se non existise quórum, constituirase en segunda convocatoria, corenta e oito horas despois da sinalada para a primeira, sendo suficiente a asistencia da terceira parte dos seus membros.

d) O alcalde dirixe e ordena ó seu prudente arbitrio os debates no seo da comisión.

e) Nos casos nos que a comisión de goberno exerza competencias delegadas polo Pleno, non será preceptivo o previo informe da comisión informativa correspondente.

f) As actas das sesión da comisión de goberno transcribiranse en libro distinto do das sesións do Pleno.

g) Por razóns de urxencia, a comisión de goberno poderá asumir competencias do Pleno coa obriga de dar conta a este na próxima sesión que celebre. Tanto nas sesións coma nas reunións da comisión de goberno, o alcalde poderá requiri-la presencia de membros da corporación non pertencentes á comisión de goberno ou de persoal ó servicio da entidade, co obxecto de informar no relativo ó ámbito das súas actividades

Artigo 51.º .

Son órganos complementarios do Concello:

a) Os concelleiros delegados.

b) A comisión especial de contas.

c) As comisións de estudio, informe e consulta.

d) As comisións informativas especiais.

e) Comisión de coordinación municipal. 

Artigo 52.º .

Os concelleiros-delegados son aqueles que posúan, dentro das súas respectivas areas de servicios, todas aquelas facultades, dereitos e deberes referidos á materia delegada que corresponden ó órgano que ten asignadas orixinariamente as atribucións.

Se para unha área determinada, non se crease polo Pleno a correspondente comisión informativa, correspóndelles igualmente a competencia para dictamina-los asuntos que pasen a sesión dos distintos órganos colexiados.

Artigo 53.º .

A comisión especial de contas é de existencia preceptiva, segundo dispón o artigo 116 da Lei 7/85, do 2 de abril, e artigo 66 da Lei 5/97, do 22 de xullo.

A comisión especial de contas estará constituída por membros dos distintos grupos políticos da corporación e o seu número será proporcional á súa representatividade no Concello ó igual para cada grupo; neste caso aplicarase o sistema de voto ponderado, de maneira que se adscribiría á mesma un membro de cada grupo político, que á hora das votacións representaría tantos votos político que, chegadas as votacións, representaría tantos votos coma o número de concelleiros que teña o seu partido ou grupo na corporación.

Correspóndelle á comisión especial de contas o exame, estudio ou informe da conta xeral e das demais contas anuais.

Para o exercicio das súas funcións, a comisión poderá requirir, por medio do alcalde, a documentación complementaria que considere precisa.

Artigo 54.º .

As comisión de estudio, informe ou consulta constituirase en tódolos municipios con máis de 5.000 habitantes.

Correponderalle a estas comisións o estudio e o dictame previo dos asuntos que deban someterse á decisión do Pleno.

Correspóndelle ó Pleno determina-lo número e a denominación das comisións de estudio, informe ou consulta e as súas modificacións.

Os informes destas comisións terán carácter de preceptivos e non vinculantes.

Os voceiros dos distintos grupos políticos deberán reunirse para determina-lo número e a denominación das distintas comisións informativas que deban funcionar nesta corporación. No caso de discrepancia, aplicarase o voto ponderado.

Artigo 55.º .

Para asuntos puntuais poderán nomearse outras comisións informativas especiais.

O alcalde é o presidente nato de tódalas comisións; nembargantes, a presidencia efectiva poderá delegala en calquera membro da corporación, e a súa delegación poderá ser abocada en calquera intre.

A adscrición concreta a cada comisión dos membros da corporación que deban formar parte da mesma en representación de cada grupo, realizarase mediante escrito do voceiro do mesmo dirixido ó alcalde. Poderá designarse, da mesma maneira, un suplente para cada titular.

Artigo 56.º .

As comisións informativas serán convocadas polo seu presidente e para a validez dos seus dictames deberán asistir, en primeira convocatoria, polo menos un tercio dos seus membros, sempre que sexan como mínimo tres.

Artigo 57.º .

Na segunda convocatoria, que será media hora despois da sinalada para a primeira, reunirase cos membros que asistan, calquera que sexa o seu número, debendo asistir, como mínimo, o presidente e o secretario, ou funcionario que lle substitúa.

No informe das comisións discrepantes poderán formular un voto particular, reservándose o seu dereito a defendelo no Pleno.

Artigo 58.º .

O presidente das comisións poderá requiri-la presencia, nas súas sesións, do persoal municipal que estime conveniente, para os efectos informativos.

Artigo 59.‑ A Comisión de coordinación Municipal, presidida polo Presidente da Corporación integrarase polos/as concelleiros/as que ostenten enc oda momento responsabilidades de goberno municipal e terá como obxetivo a coordinación das goberno municipal.

No non previsto neste regulamento rexerán as disposicións de carácter xeral recollidas no Regulamento de Organización, Funcionamento e Réxime Xurídico das Entidades Locais, así como a Lei 7/1985, do 2 de abril; e a Lei 5/1997, do 22 de xullo, de Administración Local de Galicia.