Pontedeume - REGULAMENTO ORGÁNICO MUNICIPAL DO CONCELLO DE PONTEDEUME

ÍNDICE DE ARTIGOS

TÍTULO PRELIMINAR. DISPOSICIÓNS XERAIS

TÍTULO I. ESTATUTO DOS/AS MEMBROS DA CORPORACIÓN LOCAL

CAPÍTULO PRIMEIRO. Adquisición, Suspensión e Perda da Condición de membro da Corporación Local

CAPÍTULO SEGUNDO. Dereitos e Deberes

CAPÍTULO TERCEIRO. Os Grupos Políticos

CAPÍTULO CUARTO. Rexistro de Intereses

TÍTULO II. A ORGANIZACIÓN MUNICIPAL

CAPÍTULO PRIMEIRO. Órganos Unipersoais do Municipio

CAPÍTULO SEGUNDO. Órganos Complementarios do Municipio

CAPÍTULO TERCEIRO. Outros Órganos Municipais Complementarios

TÍTULO III. FUNCIONAMENTO DOS ÓRGANOS NECESARIOS DO CONCELLO

CAPÍTULO PRIMEIRO. Funcionamento do Pleno

SECCIÓN PRIMEIRA. Das Sesións do Pleno

SECCIÓN SEGUNDA. Dos Debates

SECCIÓN TERCEIRA. Das Votacións

SECCIÓN CUARTA. Do Control e Fiscalización polo Pleno da Actuación dos demais Órganos de Goberno

SECCIÓN QUINTA. Fe Pública

CAPÍTULO SEGUNDO. A Xunta de Goberno Local

TÍTULO IV. FUNCIONAMENTO DOS ÓRGANOS COMPLEMENTARIOS DO CONCELLO

CAPÍTULO PRIMEIRO. As Comisións Informativas

CAPÍTULO SEGUNDO. Regras Especiais de Funcionamento dos demais Órganos Complementarios Colexiados

TÍTULO V. ESTATUTO DA VECIÑANZA

DISPOSICIÓN DERROGATORIA

DISPOSICIÓN FINAL

En virtude e recoñecemento da potestade regulamentaria e a capacidade de autoorganización das Corporacións Locais recoñecida polos Artigos 4 e 20.3 da Lei 7/1985, do 2 de abril, reguladora das Bases do Réxime Local, o Artigo 24.b) do Real Decreto 781/1986, do 18 de abril, polo que se aproba o Texto Refundido das disposicións legais vixentes en materia de Réxime Local, e o Artigo 4 do Real Decreto 2568/1986, do 28 de novembro, polo que se aproba o Regulamento de Organización, Funcionamento e Réxime Xurídico das Entidades Locais, así como a Lei de administración local de Galicia, Lei 5/1997 do 22 de xullo o Concello de Pontedeume adopta o presente acordo constitutivo do Regulamento Orgánico Municipal.

Artigo 1. Obxecto.

O presente Regulamento ten por obxecto regular a organización e o réxime de funcionamento dos Órganos de Goberno e Administración deste Municipio.

Artigo 2. Ámbito de aplicación.

Os preceptos deste Regulamento aplicaranse preferentemente sempre que non entren en contradición con disposicións de rango legal que sexan de obrigado cumprimento, tendo en conta que a Lei 7/1985, de 2 de abril, Reguladora das Bases do Réxime Local, ten carácter básico, e, igualmente, os Artigos 1, 2, 3.2, 12, 13, 14, 15, 16, 18, 22, inciso primeiro, 25, 26, 34, 48, 49, 50, 52, 54, 56, 57, 58, 59, 69 e 71 do Real Decreto Lexislativo 781/1986, do 18 de abril, polo que se aproba o Texto Refundido das Disposicións Legais vixentes en materia de Réxime Local, e demais normativa de rango legal ou regulamentario de ámbito xerárquico superior.

Os Bandos de Alcaldía e as Ordenanzas Municipais non poderán conter disposicións organizativas ou de funcionamento que contradigan as do presente Regulamento, ou de calquera outra norma de rango superior.

Artigo 3. Principios xerais.

O Concello de Pontedeume, con personalidade xurídica plena, exerce as súas competencias en réxime de autonomía e, en uso da potestade de autoorganización municipal, desenvolve as súas funcións organizativas, executivas e administrativas, de acordo cos principios de eficacia, descentralización, desconcentración, coordinación e servizo ao cidadán, con sometemento pleno á lei e ao dereito.

Nas súas relacións cos cidadáns e cidadás, a administración municipal actuará de acordo cos principios de transparencia e participación, impulsando a utilización das tecnoloxías da información e a comunicación e garantindo a plena efectividade dos dereitos da cidadanía, así como a mellora continua dos servizos que presta.

Artigo 4. Organización do Concello.

O Concello ten a potestade de goberno e administración municipal, sendo órganos necesarios do Concello:

- O/A Alcalde

- Os/as Tenentes de Alcalde.

- O Pleno.

- A Xunta de Goberno Local.

- A Comisión Especial de Contas.

Son órganos complementarios do Concello:

- Os/as Concelleiros/as Delegados.

- As Comisións Informativas.

CAPÍTULO PRIMEIRO. ADQUISICIÓN, SUSPENSIÓN E PERDA DA CONDICIÓN DE MEMBRO DAS CORPORACIÓNS LOCAIS

Artigo 5. Adquisición da condición de membro da Corporación Local.

A adquisición da condición de membro da Corporación, a determinación do número de membros que compoñerán aquela, o procedemento de elección, a duración do mandato e os supostos de inexibilidade e incompatibilidade son os regulados na Lexislación estatal, en concreto na Lei Orgánica 5/1985, do 19 de xuño, do Réxime Electoral Xeneral, na Lei 7/1985, do 2 de abril, Reguladora das Bases de Réxime Local, e no Real Decreto 2568/1986, 28 novembro, polo que se aproba o Regulamento de Organización, Funcionamento e Réxime Xurídico das Entidades Locais.

As candidaturas que se presenten para as eleccións municipais deberán ter nos termos do Artigo 44 bis da Lei Orgánica 5/1985, do 19 de xuño, do Réxime Electoral Xeneral, unha composición equilibrada de mulleres e homes, de forma que no conxunto da lista os candidatos de cada un dos sexos supoñan como mínimo o corenta por cento. Cando o número de postos a cubrir sexa inferior a cinco, a proporción de mulleres e homes será o máis próxima posible ao equilibrio numérico. Quedará a presente disposición a expensas do que a lexislación de aplicación para cada unha das eleccións municipais estableza ao efecto, tendo en conta o establecido no artigo 2 do presente regulamento.

Os Concelleiros e Concelleiras electos/as deberán presentar a credencial ante a Secretaría Xeral da Corporación e realizar a declaración sobre causas de posible incompatibilidade e sobre calquera actividade que lles proporcione ou poida proporcionar ingresos económicos. Formularán, así mesmo, declaración dos seus bens patrimoniais, que se realizará antes da toma de posesión do cargo.

Artigo 6. Perda da condición de membro da Corporación Local.

O/A Concelleiro/a perderá a súa condición como tal polas seguintes causas:

- Por decisión xudicial firme, que anule a elección ou proclamación.

- Por falecemento ou incapacitación, declarada por decisión xudicial firme.

- Por extinción do mandato ao expirar o prazo deste, sen prexuízo de que continúe nas súas funcións soamente para a administración ordinaria ata a toma de posesión dos seus sucesores.

- Por renuncia, que deberá facerse efectiva ante o Pleno da Corporación.

- Por incompatibilidade, nos supostos e condicións establecidos na Lexislación electoral.

- Por perda da nacionalidade española

Así como polas demais causas previstas legalmente.

CAPÍTULO SEGUNDO. DEREITOS E DEBERES

Artigo 7. Honras, Prerrogativas e Distincións.

Os/as membros da Corporación Local gozan, unha vez que tomaron posesión do cargo, das honras, prerrogativas e distincións propios deste, que se establezan nas Leis estatais e nas que as desenvolvan, e están obrigados/as ao cumprimento estrito dos seus deberes e obrigas inherentes naquel.

Os Concelleiros e Concelleiras electos/as facilitarán a dirección de correo electrónico á que se enviarán todas as notificacións electrónicas que lles afecten, dando por cumprido trámite a documentación remitida por este medio, do que se deixará constancia suficiente.

O Alcalde-Presidente promoverá o uso de medios electrónicos por todos os concelleiros e concelleiras da corporación para a remisión de documentación, convocatorias a sesións, remisión de actas, entre outros.

A notificación electrónica terá lugar a través do Sistema de Notificacións de Galicia, Notifica.gal.

O Alcalde ou Alcaldesa do Concello de Pontedeume recibirá o tratamento de Señoría.

Artigo 8. Asistencia e Votación

Os/as membros das Corporacións Locais teñen o dereito e o deber de asistir, con voz e voto, ás sesións do Pleno e ás daqueloutros órganos colexiados de que formen parte, salvo xusta causa que llo impida, que deberán comunicar coa antelación necesaria ao/á Presidente/a da Corporación.

As ausencias dos/as membros da Corporación do termo municipal que sexan superiores a oito días deberán comunicarse ao Alcalde, facéndoo por escrito, ben persoalmente ou por medio do Portavoz do Grupo Político, concretando a duración previsible da ausencia.

Artigo 9. Retribucións

Teñen dereito a recibir retribucións polo exercicio dos seus cargos cando os desempeñen con dedicación parcial ou exclusiva.

Se a dedicación é exclusiva, serán dados de alta na Seguridade Social, asumindo a Corporación o pago das cotas empresariais que correspondan. O recoñecemento da dedicación exclusiva dun/ha membro da Corporación esixirá a dedicación preferente do mesmo ás tarefas propias do seu cargo. En todo caso, o resto de dedicacións serán marxinais e en caso de ser remuneradas deberán obter por parte do Pleno dunha declaración formal de recoñecemento.

Artigo 10. Dereito de Información

Todos os/as membros das Corporacións Locais teñen dereito a obter do/a Alcalde/Alcaldesa ou da Xunta de Goberno Local cantos antecedentes, datos ou informacións obren en poder dos servizos da Corporación e resulten precisos para o desenvolvemento da súa función. En ningún caso haberá dereito a solicitar a elaboración de documentos, listaxes, certificados ou informacións que non estean unidos previamente aos expedientes solicitados. A necesidade concreta para o desenvolvemento da función será motivada na solicitude, xustificando pormenorizadamente a necesidade do acceso á documentación solicitada. A falta de motivación bastante da solicitude implicará a denegación daquela.

A petición de información será concreta e específica, non xenérica nin indeterminada, e compatible co normal funcionamento dos servizos administrativos municipais. A solicitude será dirixida a Acaldía e este órgano será o responsable de suministrar a mesma cando esta cumpra os requisitos establecidos legalmente no presente Regulamento. En todo caso serán denegadas as peticións de consulta que supoñan un abuso de dereito por evidenciar unha finalidade claramente obstrucionista, e as que sexan manifestamente incongruentes cos motivos alegados.

A petición de acceso á información entenderase concedida por silencio administrativo no caso de que non se dite resolución ou Acordo denegatorio no prazo de 5 días a contar desde o día seguinte á presentación da solicitude. En ningún caso se entenderán adquiridos por silencio máis dereitos que os que se poden adquirir por resolución expresa.

Sen necesidade de que o/a membro da Corporación estea autorizado/a, os servizos administrativos municipais estarán obrigados a facilitar a información solicitada, nos seguintes casos:

- Cando se trate do acceso dos/as membros da Corporación que obstenten delegacións ou responsabilidades de xestión á información propia daquelas.

- Cando se trate do acceso de calquera membro da Corporación á información e documentación correspondente aos asuntos que haxan de ser tratados polos órganos colexiados de que formen parte, así como ás resolucións ou Acordos adoptados por calquera órgano municipal. Neste suposto os concelleiros/as terán dereito a acceder aos asuntos incluídos na orde do día de órganos colexiados de que formen parte, pero non haberá dereito a obter copia daqueles, fóra das propostas de acordos dos asuntos incluídos na orde do día do Pleno corporativo e Xunta de Goberno local para os concelleiros e concelleiras que respectivamente formen parte de cada un dos devanditos órganos.

- Cando se trate do acceso dos/as membros da Corporación á información ou documentación da Entidade Local que sexa de libre acceso para os cidadáns e cidadás. Este suposto concrétase en facilitar o acceso a información ou documentación que se atope en fase de exposición pública ou expedientes que pola súa natureza sexan de libre acceso para a cidadanía.

A consulta e o exame concreto dos expedientes, libros e documentación rexerase polas normas seguintes:

- A consulta xeral de calquera expediente ou antecedentes documentais poderá realizarse, ben no arquivo xeral ou na dependencia onde se atope que como regra xeral serán as oficinas xerais do concello, salvo indicación expresa en contrario especificándose nese caso o lugar de consulta, ben mediante entrega destes ou de copia ao/á membro da Corporación interesado/a para que poida examinalos no despacho ou salas reservadas aos/ás membros da Corporación que como regra xeral será o salón de sesións municipal.

-En ningún caso os expedientes, libros ou documentación poderán saír da Casa Consistorial, ou das correspondentes dependencias e oficinas locais.

- A consulta dos Libros de Actas e os Libros de Resolucións do Presidente deberá efectuarse no arquivo municipal, na Secretaría Xeral ou en lugar habilitado respecto diso que como regra xeral serán as oficinas municipais ou o salón de sesións municipal baixo a custodia do/a titular da Secretaría Municipal ou do/a funcionario/a en quen esta delegue, durante o tempo de consulta. Especificarase en cada caso o lugar de consulta cando se trate do acceso aos Libros de Actas e os Libros de Resolucións do Presidente.

- O exame de expedientes sometidos a sesión poderá facerse unicamente no lugar en que se atopen de manifesto a partir da convocatoria, que como regra xeral serán as oficinas municipais salvo indicación expresa en contrario.

- Os/as membros da Corporación teñen o deber de gardar reserva en relación as informacións que lles faciliten para facer posible o desenvolvemento da súa función.

Artigo 11. Incompatibilidades.

O Alcalde ou Alcaldesa e os Concelleiros e Concelleiras deberán observar en todo momento as normas sobre incompatibilidades e deberán poñer en coñecemento da Corporación calquera feito que puidese constituír causa daquelas.

Para iso, os/as concelleiros/as electos/as deberán presentar a credencial ante a Secretaría Xeral e realizar a declaración sobre causas de posible incompatibilidade e sobre calquera actividade que lles proporcione ou poida proporcionar ingresos económicos.

Formularán, así mesmo, declaración dos seus bens patrimoniais e da participación en sociedades de todo tipo, con información das sociedades por elas participadas e das liquidacións dos impostos sobre a Renda, Patrimonio e, no seu caso, Sociedades. Tales declaracións levarán a cabo antes da toma de posesión do cargo e poderán instrumentarse en calquera clase de documento que de fe da data e da identidade do declarante.

CAPÍTULO TERCEIRO. OS GRUPOS POLÍTICOS

Artigo 12. Grupos Políticos

Os/as membros da Corporación constituiranse en Grupos Políticos. Ningún Concelleiro ou Concelleira poderá pertencer a máis dun Grupo Municipal.

Os/as Concelleiros/as que non se integren nun Grupo Municipal, e os que causen baixa no que inicialmente se integraron, constituirán o Grupo Mixto, ou como membro non adscrito; en todo caso segundo estableza a lexislación estatal e autonómica aplicable á materia.

Artigo 13. Constitución dos Grupos Políticos

Os Grupos Políticos constituiranse mediante escrito que, dirixido ao Presidente e subscrito por todas as persoas que o integran, deberá indicar a denominación do grupo e o nome do portavoz que lle represente podendo designarse tamén os/as suplentes.

O escrito de constitución haberá de presentarse na Secretaría Xeral da Corporación dentro dos cinco días hábiles seguintes á constitución da Corporación.

Da constitución dos Grupos Políticos e dos/as integrantes e Portavoces, o/a Presidente/a dará conta ao Pleno na primeira sesión que se celebre tras cumprirse o prazo previsto no apartado anterior.

Cando a maioría dos concelleiros/as dun grupo político municipal abandonen a formación política que presentou a candidatura pola que concorreron ás eleccións ou sexan expulsados/as desta, serán os concelleiros/as que permanezan na citada formación política os/as lexítimos integrantes do devandito grupo político para todos os efectos. En calquera caso, o/a titular da Secretaría da Corporación poderá dirixirse ao representante legal da formación política que presentou a correspondente candidatura a efectos de que notifique a acreditación das circunstancias sinaladas.

Artigo 14. Desenvolvemento das actividades.

Os Grupos Políticos poderán facer uso de locais da Corporación, cando estes estean dispoñibles e sexan asignados polo/a Alcalde/Alcaldesa Presidente/a, para celebrar reunións ou sesións de traballo con asociacións para a defensa dos intereses colectivos, xerais ou sectoriais da poboación. Disporán ademais, cando as dispoñibilidades de locais o permitan e sexa así autorizado caso por caso polo Sr./Sra. Alcalde/Alcaldesa-Presidente/a, na sede da Entidade Local dun despacho ou local para reunirse de maneira independente e recibir visitas de cidadáns e cidadás, e o/a Presidente/a ou o/a membro da Corporación responsable da área de Réxime Interior poñerán á súa disposición, cando as dispoñibilidades o permitan, unha infraestrutura mínima de medios materiais e persoais. Será o Alcalde o competente para autorizar aquelas.

CAPÍTULO CUARTO. REXISTRO DE INTERESES

Artigo 15. Obxecto e fundamento.

Constitúese un Rexistro de Intereses dos/as membros da Corporación, debendo estes formular declaración sobre causas de posible incompatibilidade e sobre calquera actividade que lles proporcione ou poida proporcionar ingresos económicos. Formularán, así mesmo, declaración dos seus bens patrimoniais e da participación en sociedades de todo tipo, con información das sociedades por elas participadas e das liquidacións dos impostos sobre a Renda, Patrimonio e, no seu caso, Sociedades. Tales declaracións inscribiranse nos Rexistros de Intereses.

Os/as membros da Corporación Local deberán realizar as declaracións antes enumeradas nas seguintes circunstancias:

- Antes de tomar posesión do seu cargo.

- Cando se produzan variacións ao longo do mandato. Neste caso, o termo para comunicar as variacións será dun mes para contar desde o día en que se produciron.

- Con ocasión do cesamento.

- Ao final do mandato.

Quedará este punto á expensas do que estableza a lexislación estatal e autonómica aplicable ao mesmo así como as disposicións de rango regulamentario superior ao presente ROM.

Artigo 16. Competencia.

A custodia e dirección do Rexistro de Intereses é competencia do/a titular da Secretaría do Concello.

Artigo 17. Presentación de declaracións.

A declaración de intereses deberá presentarse no Rexistro de Intereses, en documento formalizado aprobado por este Concello e deberá ser asinado polo interesado e o/a Secretario/a, para dar fe.

Artigo 18. Dereito de acceso.

O Rexistro de causas de posible incompatibilidade e de actividades terá carácter público, tendendo todos os/as membros da Corporación o dereito para obter do Alcalde ou Alcaldesa cantos datos ou informacións obren en poder dos servizos da Corporación e resulten precisos para o desenvolvemento da súa función, mediante solicitude escrita dirixida ao Alcalde ou Alcaldesa nos termos do Artigo 14 do Real Decreto 2568/1986, do 28 de novembro, polo que se aproba o Regulamento de Organización, Funcionamento e Réxime Xurídico das Entidades Locais.

A solicitude do dereito recollido no parágrafo anterior haberá de ser resolta motivadamente nos cinco días naturais seguintes a aquel en que se presentou.

En canto ao Rexistro de bens patrimoniais, que non ten carácter público, será preciso para exercer o dereito de acceso acreditar a condición de interesado lexítimo directo, de conformidade cos criterios xerais establecidos no Artigo 31 da Lei 30/1992, do 16 de novembro, de Réxime Xurídico e do Procedemento Administrativo Común.

CAPÍTULO PRIMEIRO. ÓRGANOS UNIPERSOAIS DO MUNICIPIO

Artigo 19. Alcalde ou Alcaldesa.

A elección do Alcalde ou Alcaldesa, o nomeamento, a toma de posesión e a destitución réxense segundo a Lexislación electoral, aplicando o sistema de votación previsto legalmente, que sexa acordado, e tendo en conta as regras previstas na Lexislación de Réxime Local.

No caso de votación segreda por papeleta en urna, o sistema será o seguinte:

- Entregarase aos Concelleiros e Concelleiras da Corporación unha papeleta para que nela escriban o nome dun dos candidatos/as á Alcaldía do Concello (os que encabezarán a súa lista). Esta papeleta introducirase nun sobre que se pechará a continuación e darase á persoa que ocupe a Presidencia da Mesa; estao introduciraa nunha urna.

A Mesa procederá ao escrutinio das votacións, contando o número de votos que tivo cada un dos candidatos ou candidatas á Alcaldía. Se no interior do sobre houbese máis dunha papeleta, o dito voto será nulo.

- Procederase á proclamación do Alcalde ou Alcaldesa.

Unha vez que se procedeu á elección, o Alcalde ou Alcaldesa deberá tomar posesión do cargo, para iso utilizará a forma legalmente establecida e xurará ou prometerá o cargo ante o Pleno do Concello.

Se non se atopa presente na sesión de constitución, será requirido/a para tomar posesión no prazo de corenta e oito horas, igualmente ante o Pleno da Corporación, coa advertencia de que, caso de non facelo sen causa xustificada, estarase ao disposto na Lexislación electoral para os caso de vacante na Alcaldía.

Artigo 20. Moción de Censura

O Alcalde ou Alcaldesa pode ser destituído/a mediante moción de censura, cuxa presentación, tramitación e votación ser rexerá polas regras establecidas na lexislación electoral e en concreto as seguintes:

a) A moción de censura deberá ser proposta, polo menos, pola maioría absoluta do número legal de membros da Corporación e haberá de incluír un candidato/a á Alcaldía, podendo selo calquera Concelleiro ou Concelleira cuxa aceptación expresa conste no escrito de proposición da moción.

b) No caso de que algún dos propoñentes da moción de censura forme ou formase parte do grupo político municipal ao que pertence o Alcalde ou Alcaldesa cuxa censura se propón, a maioría esixida no parágrafo anterior verase incrementada no mesmo número de concelleiros/as que se atopen en tales circunstancias.

c) Este mesmo suposto será de aplicación cando algún dos concelleiros/as propoñentes da moción deixase de pertencer, por calquera causa, ao grupo político municipal ao que se adscribiu ao comezo do seu mandato.

d) O escrito no que se propoña a moción censura deberá incluír as firmas debidamente autenticadas por Notario ou polo fundionario/a titular da Secretaría Xeral da Corporación e deberá presentarse ante este por calquera dos/as seus asinantes. O/a titular da Secretaría Xeral comprobará que a moción de censura reúne os requisitos esixidos e estenderá no mesmo acto a correspondente dilixencia acreditativa.

e) O documento así dilixenciado presentarase no Rexistro Xeral da Corporación por calquera dos/as asinantes da moción, quedando o Pleno automaticamente convocado para as doce horas do décimo día hábil seguinte ao do seu rexistro. O/a Secretario/a da Corporación deberá remitir notificación indicativa de tal circunstancia a todos os membros da mesma no prazo máximo dun día, a contar desde a presentación do documento no Rexistro, para os efectos da súa asistencia á sesión, especificando a data e hora daquela.

f) O Pleno será presidido por unha Mesa de idade, integrada polos concelleiros/as de maior e menor idade dos/as presentes, excluídos o Alcalde ou Alcaldesa e o candidato/a á Alcaldía, actuando como Secretario/a o quen o sexa da Corporación, quen acreditará tal circunstancia.

g) A Mesa limitarase a dar lectura á moción de censura, constatando para poder seguir coa súa tramitación, que nese mesmo momento se manteñen os requisitos esixidos nos tres parágrafos do apartado a, dando a palabra, no seu caso, durante un breve tempo, se estiveren presentes, ao/á candidato/a á Alcaldía, ao Alcalde ou Alcaldesa e aos/ás Portavoces dos grupos municipais, e a someter a votación a moción de censura.

Ningún concelleiro ou concelleira pode asinar durante o seu mandato máis dunha moción de censura. Aos ditos efectos non se tomarán en consideración aquelas mocións que non fosen tramitadas por non reunir os requisitos previstos na letra b) do apartado 1 deste Artigo.

A dimisión sobrevida do Alcalde ou Alcaldesa non suspenderá a tramitación e votación da moción de censura.

Artigo 21 Renuncia do Alcalde ou Alcaldesa.

O Alcalde ou Alcaldesa poderá renunciar ao cargo sen perder por iso a súa condición de Concelleiro/a. A renuncia a Alcaldía non levará a perda da condición de Concelleiro/a; con todo, a renuncia ao cargo de Concelleiro/a leva consigo a renuncia á Alcaldía.

Vacante a Alcaldía por renuncia do/a seu titular, falecemento ou sentenza firme, a sesión extraordinaria para a elección dun novo Alcalde ou Alcaldesa celebrarase, cos requisitos establecidos na Lexislación electoral, dentro dos dez días seguintes á aceptación da renuncia polo Pleno, ao momento da adopción do falecemento ou a notificación da sentenza, segundo os casos.

Artigo 22. Competencias do Alcalde ou Alcaldesa.

O Alcalde ou Alcaldesa preside a Corporación e ostenta as atribucións previstas na lexislación estatal e autonómica, así como as establecidas en disposicións regulamentarias en desenvolvemento das anteriores, así como as de delegación de outros órganos.

Artigo 23. Delegación de competencias.

O Alcalde poderá delegar o exercizo das atribucións que ten conferidas, salvo as de convocar e presidir as sesións do Pleno e da Xunta de Goberno Local, decidir os empates co voto de calidade, a concertación de operacións de crédito, a xefatura superior de todo o persoal, a separación do servizo dos funcionarios e o despedimento do persoal laboral, e as restantes enunciadas na lexislación estatal e autonómica así como disposicións regulamentarias en desenvolvemento das anteriores. Con todo, poderá delegar na Xunta de Goberno Local o exercicio das atribucións contempladas legalmente.

Artigo 24. Control e Fiscalización

En cumprimento do artigo 42 do Real Decreto 2568/1986, de 28 de novembro, por lo que se aproba o Regulamento de Organización, Funcionamento e Réxime Xurídico das Entidades Locais, o Alcalde dará conta ao Pleno da Corporación, sucintamente, das Resolucións que tomase dende a sesión plenaria anterior, para que os Concelleiros coñezan o desenvolvemento da Administración Municipal para os efectos do control e fiscalización dos Órganos de Goberno.

Artigo 25. Nomeamento e cesamento dos/as Tenentes de Alcalde.

Os/as Tenentes de Alcalde serán libremente nomeados e cesados polo Alcalde ou Alcaldesa de entre os/as membros da Xunta de Goberno Local.

O número de Tenentes de Alcalde non poderá ser superior ao número de membros que compoñen a Xunta de Goberno Local.

A condición de Tenentes de Alcalde pérdese, ademais de por o cesamento ordenado por Decreto de Alcaldía, por renuncia expresa manifestada por escrito e pola perda da condición de Concelleiro/a [ou a de membro da da Xunta de Goberno Local]

Os nomeamentos e os cesamentos faranse mediante Resolución da Alcaldía da que se dará conta ao Pleno na primeira sesión que celebre, notificándose, ademais, persoalmente aos/ás designados/as, e publicaranse no Boletín Oficial da Provincia, sen prexuízo da súa efectividade desde o día seguinte da firma da Resolución pola Alcaldía, sen nela non se dispuxese outra cousa.

Artigo 26. Competencias dos/as Tenentes de Alcalde.

Corresponde aos/ás Tenentes de Alcalde, en canto tales, substituír na totalidade das súas funcións e pola orde do seu nomeamento, ao Alcalde ou Alcaldesa, nos casos de ausencia, enfermidade ou impedimento que imposibilite a este para o exercicio das súas atribucións, así como desempeñar as funcións do Alcalde ou Alcaldesa nos supostos de vacante na Alcaldía ata que tome posesión o novo Alcalde ou Alcaldesa.

Nos casos de ausencia, enfermidade ou impedimento, as funcións do Alcalde ou Alcaldesa non poderán ser asumidas polo/a Tenente de Alcalde a quen corresponda sen expresa delegación. A delegación debe conter os seguintes requisitos:

- As delegacións serán realizadas mediante Decreto da Alcaldía que conterá o ámbito dos asuntos a que se refire a delegación, as facultades que se deleguen, así como as condicións específicas de exercicio destas.

- A delegación de atribucións da Alcaldía surtirá efecto desde o día seguinte ao da data do Decreto, salvo que nela se dispoña outra cousa, sen prexuízo da súa preceptiva publicación no Boletín Oficial da Provincia.

Nos supostos en que o Alcalde ou Alcaldesa se ausente do termo municipal por máis de vinte e catro horas, sen conferir a delegación ou cando por causas imprevistas lle resultado imposible outorgala, substituiralle na totalidade das súas funcións o/a Tenente de Alcalde a quen corresponda, dando conta ao resto da Corporación.

Artigo 27. Perda da condición de Tenente de Alcalde

A perda da condición de Tenente de Alcalde prodúcese por:

- Decreto de Alcaldía decidindo o cesamento.

- Renuncia expresa por escrito.

- Perda da condición de membro da Corporación.

Artigo 28. Os/as Concelleiros/as Delegados/as.

Os Concelleiros e Concelleiras Delegados/as son aqueles Concelleiros/as que obstentan algunhas das delegacións de atribucións realizada pola Alcaldía, sempre que sexa nunha das materias delegables regradas na Lei Reguladora de Bases de Réxime Local.

Artigo 29. Delegación

A delegación de competencias deberá realizarse mediante un Decreto da Alcaldía, no que se especifique cales son as competencias delegadas e as condicións do exercicio da facultade delegada.

Se a resolución de delegación se refire xenericamente a unha materia ou sector de actividade sen especificación de potestades, entenderase que comprende todas aquelas faculdades, dereitos e deberes referidos á materia delegada que corresponden ao órgano que ten asignadas orixinariamente as atribucións coa soa excepción das que segundo a Lei Reguladora de Bases de Réxime Local son materias non delegables.

A delegación de atribucións requirirá, para ser eficaz, a súa aceptación por parte do/a Delegado/a. A delegación entenderase aceptada tácitamente se no termo de tres días hábiles contados desde a notificación do acordo o/a membro ou órgano destinatario da delegación non fai manifestación expresa ante o órgano delegante de que non acepta a delegación.

Se no Decreto de delegación non se dispón outra cousa, o Alcalde ou Alcaldesa conservará as seguintes faculdades en relación coa competencia delegada:

- A de recibir información detallada da xestión da competencia delegada e dos actos ou disposicións emanadas en virtude da delegación.

- A de ser informado previamente á adopción de decisións de transcendencia.

- Os actos ditados polo órgano delegado no exercicio das atribucións delegadas enténdense ditados polo órgano delegante, correspondendo, en consecuencia, a este a resolución dos recursos de reposición que poidan interpoñerse, salvo que no Decreto de delegación expresamente se confirira a resolución dos recursos de reposición contra os actos ditados polo órgano delegado.

Artigo 30. Revogación da Delegación

No suposto de revogación de competencias delegadas, o Alcalde ou Alcaldesa poderá revisar as resolucións adoptadas polo/a Concelleiro/a Delegado/a nos mesmos casos, e condicións establecidas para a revisión de oficio dos actos administrativos.

A revogación ou modificación das delegacións haberán de adoptarse coas mesmas formalidades que as esixidas para o seu outorgamiento.

Artigo 31. Perda da Condición de Concelleiro/a Delegado/a.

Pérdese a condición de Concelleiro/a Delegado/a:

- Por renuncia expresa, que haberá de ser formalizada por escrito ante a Alcaldía.

- Por revogación da delegación, adoptada pola Alcaldía coas mesmas formalidades previstas para outorgala.

- Por perda da condición de membro da Corporación Municipal.

Asi como polas restantes previstas legalmente.

CAPÍTULO SEGUNDO. ÓRGANOS COLEXIADOS DO MUNICIPIO

Artigo. 32. O Pleno

O Pleno está integrado por todos os Concelleiros e Concelleiras e é presidido polo Alcalde ou Alcaldesa.

Artigo. 33. Competencias do Pleno

Corresponden, en todo caso, ao Pleno, as atribucións previstas na lexislación estatal e autonómica, así como as establecidas en disposicións regulamentarias en desenvolvemento das anteriores.

Artigo 34. Delegación de competencias.

O Pleno poderá delegar o exercicio das atribucións no Alcalde ou Alcaldesa e na Xunta de Goberno Local referidas no Artigo anterior, salvo as que expresamente se califiquen como non delegables por parte da lexislación en vigor.

A delegación de competencias realizarase a través dun Acordo, que se adoptará por maioría simple, e surtirá efectos desde o día seguinte ao da súa adopción, sen prexuízo da súa publicación no Boletín Oficial da Provincia. Estas regras serán de aplicación ás modificacións posteriores do devandito Acordo.

O Acordo de delegación conterá o ámbito dos asuntos a que a mesma se refira e as facultades concretas que se delegan, así como as condicións específicas de exercicio das mesmas.

As delegacións do Pleno en materia de xestión financeira poderán, así mesmo, conferirse a través das bases de execución do Orzamento.

Artigo 35. Xunta de Goberno Local

A Xunta de Goberno Local, é o órgano que baixo a presidencia do Alcalde ou Alcaldesa colabora con el na función de dirección política e exerce funcións executivas e administrativas, está integrada polo Alcalde ou Alcaldesa, que a preside, e Concelleiros e Concelleiras nomeados libremente por el/ela como membros desta. Non son públicas as sesións da Xunta de Goberno Local.

[O número de Concelleiros/as aos/ás que o Alcalde ou Alcaldesa, por Decreto pode nomear membros da Xunta de Goberno Local non poderá ser superior ao terzo do número legal de membros da Corporación. Para os efectos do cómputo non se terán en conta os decimais que resulten de dividir por tres o número total de Concelleiros/as].

Artigo 36. Nomeamento e cesamento dos membros da Xunta.

O Alcalde ou Alcaldesa pode cesar libremente, en todo momento, a calquera membro da Xunta de Goberno Local. Os nomeamentos e cesamentos serán adoptados por medio de Resolución da Alcaldía da que se dará conta ao Pleno na primeira sesión que se celebre, notificándose, ademais, persoalmente aos designados, e publicaranse no Boletín Oficial da Provincia, sen prexuízo da súa efectividade desde o día seguinte da firma de Resolución polo Alcalde ou Alcaldesa, se naquela non se dispuxese outra cousa.

Artigo 37. Competencias da Xunta de Goberno Local

É atribución propia e indelegable da Xunta de Goberno Local a asistencia permanente ao Alcalde ou Alcaldesa no exercicio das súas atribucións. Para o correcto exercicio desta función, a Xunta de Goberno Local será informada de todas as decisións do Alcalde ou Alcaldesa. Esta información terá carácter previo á adopción da decisión sempre que a importancia do asunto así o requira.

Corresponden, ademais, á Xunta as funcións executivas e administrativas que a Lei e o presente Regulamento lle confiran.

A Xunta de Goberno desempeñará, así mesmo, aquelas funcións que sexan delegadas polo Alcalde ou Alcaldesa ou outro órgano municipal, ou outorgada por atribución da Lei.

Artigo 38. Comisións Informativas

As Comisións Informativas son órganos de carácter complementario do Concello, integradas exclusivamente por membros da Corporación.

As Comisións Informativas son órganos sen atribucións resolutorias que teñen por función o estudo, informe ou consulta dos asuntos que teñan que ser sometidos á decisión do Pleno, así como da Xunta de Goberno Local ou do Alcalde cando éstes actúen con competencias delegadas polo Pleno.

Estas Comisións informarán daqueles asuntos da competencia propia da Xunta de Goberno Local, e do Alcalde, que lles sexan sometidos ao seu coñecemento por expresa decisión daqueles.

Artigo 39. Tipos de Comisións Informativas.

As Comisións Informativas poden ser permanentes e especiais.

Son Comisións Informativas permanentes as que se constitúen con carácter xeral, distribuíndo entre elas as materias que han de someterse ao Pleno. O seu número e denominación inicial, así como calquera variación das mesmas durante o mandato corporativo, decidirase mediante acordo adoptado polo Pleno a proposta do Alcalde ou Alcaldesa, procurando, no posible, o seu correspondente co número e denominación das grandes áreas en que se estruturan os servizos corporativos.

Son Comisións Informativas especiais as que o Pleno acorde constituír para un asunto concreto, en consideración ás súas características especiais de calquera tipo.

Artigo 40. Disolución das Comisións Informativas.

As Comisións Informativas disólvense automaticamente unha vez que ditaminen ou informen sobre o asunto que constitúe o seu obxecto, salvo que o Acordo plenario que as creou dispuxese outra cousa.

Artigo 41. Acordo de creación das Comisións Informativas

No Acordo de creación das Comisións Informativas determinarase a composición concreta destas, tendo en conta as seguintes regras:

- O Alcalde ou Alcaldesa é o/a Presidente/a nato de todas elas; con todo, a Presidencia efectiva poderá delegala en calquera membro da Corporación, a proposta da propia Comisión, tras a elección efectuada no seu seo.

- Cada Comisión estará integrada de forma que a súa composición se acomode á proporcionalidade existente entre os distintos grupos políticos representados na Corporación.

- A adscrición concreta a cada Comisión dos membros da Corporación que deban formar parte desta en representación de cada Grupo realizarase mediante escrito do/a Portavoz deste dirixido ao Alcalde ou Alcaldesa, e do que se dará conta ao Pleno. Poderase designar, de igual forma, un/ha suplente por cada titular.

Artigo 42. Ditames das Comisións Informativas.

Os Ditames das Comisións Informativas teñen carácter preceptivo e non vinculante.

En supostos de urxencia, o Pleno ou a Xunta de Goberno Local, poderá adoptar Acordos sobre asuntos non ditaminados pola correspondente Comisión Informativa, pero, nestes casos, do Acordo adoptado deberase dar conta á Comisión Informativa na primeira sesión que se celebre. A proposta de calquera dos membros da Comisión Informativa, o asunto deberá ser incluído na orde do día do seguinte Pleno con obxecto de que este delibere sobre a urxencia acordada, en exercicio das súas atribucións de control e fiscalización.

Artigo 43. A Comisión Especial de Contas.

A Comisión Especial de Contas é de existencia preceptiva, e a súa constitución, composición e integración e funcionamento axústase ao establecido para as demais Comisións Informativas.

A Comisión Especial de Contas da Entidade Local estará constituída por membros dos distintos Grupos Políticos integrantes da Corporación, de forma que a súa composición se acomode á proporcionalidade existente entre os distintos Grupos Políticos representados na Corporación.

Corresponde á Comisión Especial de Contas o exame, estudo e informe de todas as contas, orzamentarias e extraorzamentarias, que deba aprobar o Pleno da Corporación, de acordo co establecido na Lexislación reguladora da contabilidade das Entidades Locais.

A Comisión Especial de Contas actuará como Comisión Informativa permanente para os asuntos relativos á economía e facenda deste Concello.

CAPÍTULO TERCEIRO. OUTROS ÓRGANOS MUNICIPAIS COMPLEMENTARIOS

Artigo 44. As Xuntas Municipais e Veciñais.

O Pleno do Concello poderá acordar a creación de Xuntas Municipais de Distrito que terán carácter de órganos territoriais de xestión desconcentrada e cuxa finalidade será a mellor xestión dos asuntos da competencia municipal e facilitar a participación cidadá no respectivo ámbito territorial.

A composición, organización, ámbito territorial, así como a porcentaxe mínima dos recursos orzamentarios da corporación que deberán xestionarse polas Xuntas, serán establecidas no correspondente Regulamento regulador aprobado polo Pleno.

O Regulamento das Xuntas determinará así mesmo as funcións administrativas que, en relación ás competencias municipais, se deleguen ou poidan ser delegadas naquelas, deixando a salvo a unidade de xestión do Municipio.

O Regulamento das Xuntas Municipais de Distrito considerarase, para todos os efectos, parte integrante deste Regulamento.

Artigo 45. Os Consellos Sectoriais.

O Pleno do Concello poderá acordar o establecemento de Consellos Sectoriais. A finalidade destes órganos é a de canalizar a participación da cidadanía e das súas asociacións nos asuntos municipais. Desenvolverán exclusivamente funcións de informe e, no seu caso, proposta, en relación coas iniciativas municipais relativas ao sector de actividade ao que corresponda cada Conselleiro/a.

A creación dos Consellos Sectoriais de Participación realizarase por Acordo do Pleno, acordando no mesmo a súa composición, organización e ámbito de actuación.

Cada Consello estará presidido por un membro da Corporación, nomeado e separado libremente polo Alcalde ou Alcaldesa, que actuará como ligazón entre a Corporación e o Consello.

As funcións dos Consellos regúlanse por Regulamento aprobado polo Pleno, no que, ademais, regularase a composición, organización, ámbito territorial e recursos que se lles asignen.

Artigo 46. Órganos desconcentrados e descentralizados para a xestión de servizos.

O Pleno poderá establecer órganos desconcentrados e de Entes descentralizados con personalidade xurídica propia, cando así o aconsellen a necesidade dunha maior eficacia na xestión, a complexidade daquela, a axilización dos procedementos, a expectativa de aumentar ou mellorar o financiamento ou a conveniencia de obter un maior grao de participación cidadá na actividade de prestación de servizos.

O establecemento dos órganos e Entes a que se refire o apartado anterior réxese, no seu caso, polo disposto na Lexislación de Réxime Local relativa ás formas de xestión de servizos, inspirándose no principio de economía organizativa, de maneira que o seu número sexa o menor posible en atención á correcta prestación daqueles.

CAPÍTULO PRIMEIRO. FUNCIONAMENTO DO PLENO

SECCIÓN PRIMEIRA. DAS SESIÓNS DO PLENO

Artigo 47. As sesións do Pleno.

As sesións do Pleno do Concello poden ser de tres tipos:

- Ordinarias.

- Extraordinarias.

- Extraordinarias con carácter urxente.

Son sesións ordinarias aquelas cuxa periodicidade está preestablecida. Fixarase por Acordo do Pleno celebrado en sesión extraordinaria convocada polo Alcalde ou Alcaldesa dentro dos trinta días seguintes á sesión constitutiva, a periodicidade das sesións ordinarias, que en ningún caso poderá exceder o límite fixado na Lei Reguladora de Bases de Réxime Local, así se celebrarán polo menos cada dous meses.

Son sesións extraordinarias aquelas que convoque o Alcalde ou Alcaldesa con tal carácter, por iniciativa propia ou a solicitude da cuarta parte, polo menos, do número legal de membros da Corporación. A convocatoria da sesión extraordinaria a instancia de membros da Corporación deberá efectuarse conforme ao establecido na Lei 7/1985 do 2 de abril.

Contra a denegación expresa ou presunta da solicitude a que se refire o Artigo anterior, poderanse interpoñer polos interesados os correspondentes recursos, sen prexuízo de que a Administración do Estado ou da Comunidade Autónoma respectiva poida facer uso das facultades de requirimento cando considere que no ámbito das súas respectivas competencias, que un acto ou Acordo dalgunha Entidade Local infrinxe o Ordenamento Xurídico, poderá requirila, invocando expresamente o Artigo 65 da Lei 7/1985, do 2 de abril, Reguladora das Bases do Réxime Local.

Son sesións extraordinarias urxentes as convocadas polo Alcalde ou Alcaldesa cando a urxencia do asunto ou asuntos a tratar non permite convocar a sesión extraordinaria coa antelación mínima de dous días, debéndose incluír, neste caso, como primeiro punto da orde do día o pronunciamiento do Pleno sobre a urxencia. Se esta non resulta apreciada polo Pleno, levantarase acto seguido a sesión.

Artigo 48. Convocatoria das sesións do Pleno.

Corresponde ao Alcalde ou Alcaldesa convocar todas as sesións do Pleno. Á convocatoria das sesións acompañarase a orde do día compresiva dos asuntos para tratar co suficiente detalle, e os borradores de Actas de sesións anteriores que deban ser aprobados na sesión.

Os borradores de actas de sesións anteriores serán postos a disposición dos membros do Pleno a través de medios electrónicos no Portal de Cargos Electos da Sede Electrónica municipal https://sede.pontedeume.gal.

Entre a convocatoria e a celebración da sesión non poderán transcorrer menos de dous días hábiles, salvo no caso das sesións extraordinarias urxentes.

Artigo 49. Contido da convocatoria da sesión

A convocatoria para unha sesión, ordinaria ou extraordinaria, dará lugar á apertura do correspondente expediente, no que deberá constar:

- A relación de expedientes conclusos que a Secretaría prepare e poña a disposición da Alcaldía.

- A fixación da orde do día polo Alcalde ou Alcaldesa.

- As copias das notificacións cursadas aos/ás membros da Corporación.

- Copia do anuncio no taboleiro de edictos do Concello e, no seu caso, na prensa local.

- Minuta do Acta.

- Copias dos oficios de remisión dos Acordos adoptados ás Administracións do Estado e Comunidade Autónoma.

- Publicación dos Acordos no taboleiro de edictos.

Artigo 50. Notificación da convocatoria e orde do día.

Xunto á convocatoria para a sesión será preceptiva a notificación aos/ás membros da Corporación Local da orde do día, e deberá quedar acreditado o cumprimento deste requisito na Secretaría Xeral.

A práctica da notificación da convocatoria terá lugar a través do Sistema de Notificacións de Galicia, Notifica.gal.

A orde do día das sesións será fixado polo Alcalde ou Alcaldesa asistido da Secretaría. Así mesmo, poderá solicitar a asistencia e consultar, se o estima oportuno, aos/ás voceiros dos Grupos existentes na Corporación.

Na orde do día só poden incluírse os asuntos que fosen previamente ditaminados, informados ou sometidos a consulta da Comisión Informativa que corresponda.

O Alcalde ou Alcaldesa, por razóns de urxencia debidamente motivada, poderá incluír na orde do día, a iniciativa propia ou a proposta dalgún/ha dos/as Portavoces, asuntos que non fosen previamente informados pola respectiva Comisión Informativa, pero, neste suposto, non poderá adoptarse Acordo algún sobre estes asuntos sen que o Pleno ratifique a súa inclusión na orde do día.

Na orde do día das sesións ordinarias incluirase sempre o punto de rogos e preguntas.

Artigo 51. Nulidade de acordos.

Serán nulos os Acordos adoptados en sesións extraordinarias sobre asuntos non comprendidos na súa convocatoria, así como os que se adopten en sesións ordinarias sobre materias non incluídas na respectiva orde do día, salvo especial e previa declaración de urxencia feita polo órgano correspondente, co voto favorable da maioría.

Artigo 52. Acceso á documentación.

A documentación dos asuntos incluídos na orde do día que debe servir de bases ao debate e, no seu caso, votación, deberá estar a disposición dos/as membros da Corporación desde o mesmo día da convocatoria a través de medios electrónicos no Portal de Cargos Electos da Sede Electrónica municipal https://sede.pontedeume.gal.

Calquera membro da Corporación poderá ter acceso á documentación dos asuntos incluidos na orde do día dos órganos colexiados dos que formen parte.

Artigo 53. Lugar e duración das sesións.

O Pleno celebrará as súas sesións na Casa Consistorial, salvo nos supostos de forza maior nos que, a través da convocatoria ou por Decreto de Alcaldía ditada previamente e notificada a todos os membros da Corporación, poderá habilitarse outro edificio ou local para ese efecto. En calquera caso, esta circunstancia farase constar no Acta.

Asimesmo, a celebración poderá ter lugar por medios telemáticos e será así determinado na convocatoria da mesma. A estos efectos todos/as ou parte dos membros da corporación e empregados/as públicos/as que asisten á sesión, poderanse atopar en lugares distintos ao lugar de celebración da sesión sempre e cando se asegure por medios electrónicos a identidade dos mesmos, o contido das súas manifestacións, e o momento no que se producen, así como a interactividade e intercomunicación entre eles en tempo real. A dispoñibilidade dos medios garantirase durante toda a sesión. En todo caso quedará garantida a participación do membro corporativo na votación dos asuntos a tratar o que equivale á garantía de expresar de forma inequívoca o sentido do voto. Entre outros, consideraranse medios electrónicos válidos a audioconferencia e a videoconferencia.

Toda sesión, sexa ordinaria ou extraordinaria, haberá de respectar o principio de unidade de acto e procurarase que termine no mesmo día do seu comezo. Se este rematara sen que se debatiran todos os asuntos incluídos na orde do día, a Presidencia poderá levantar a sesión. Neste caso os asuntos non debatidos deberanse de incluír na orde do día da seguinte sesión.

O Alcalde ou Alcaldesa, segundo o seu prudente criterio e en atención ao volume e complexidade dos asuntos para tratar poderá dispor dun ou máis descansos ao longo da sesión, coa advertencia da hora en que se continuará a sesión.

Artigo 54. Publicidade das sesións.

As sesións do Pleno serán públicas. O debate e a votación poderán ser segredos cando afecten ao dereito a honra, a intimidade persoal e familiar e á propia imaxe (Artigo 18.1 da Constitución), ou sexa acordado por maioría absoluta.

Permitirase a utilización de sistemas megafónicos e de gravación audiovisual polo público. Poderán instalarse sistemas de reprodución e gravación, con carácter oficial e como documentos complementarios para a redacción das correspondentes actas, ademais dos que poidan utilizar os medios informativos acreditados.

O público que asista ás sesións plenarias non pode participar nelas, nin manifestar agrado ou desagrado, podendo o/a Presidente/a proceder, en casos extremos, á expulsión do/a asistente que por calquera causa impida o normal desenvolvemento da sesión. Unha vez levantada a sesión, a Corporación pode establecer unha quenda de consultas polo público asistente sobre temas concretos de interese municipal.

Artigo 55. Asistencia ás sesións.

Os/as membros da Corporación nas sesións presenciais tomarán asento no Salón de Sesións unidos ao seu Grupo. A orde de colocación dos Grupos determinarase polo/a Presidente/a, ouvidos os/as voceiros, tendo preferencia o Grupo formado polos membros da lista que obtivese maior número de votos. En calquera caso, a colocación dos/as membros corporativos tenderá a facilitar a emisión e reconto dos votos.

Para a constitución válida do Pleno, requírese a asistencia presencial ou telemática dun terzo do número legal de membros da Corporación, que nunca poderá ser inferior a tres. Este quórum deberase manter durante toda a sesión.

En todo caso, deberán asistir presencial ou telemáticamente o/a Presidente/a e o/a Secretario/a da Corporación, ou quen legalmente lles substitúan.

Se realizada a primeira convocatoria non existise o quórum necesario, entenderase automaticamente convocada á mesma hora, dous días despois. Se tampouco nesta segunda convocatoria se acada o quórum necesario, os asuntos previstos a tratar pospoñeranse para o estudo na primeira sesión que se celebre con posterioridade, sexa ordinaria ou extraordinaria.

SECCIÓN SEGUNDA. DOS DEBATES

Artigo 56. Desenvolvemento das sesións.

As sesións comezarán preguntando a Presidencia se algún/ha membro da Corporación ten que formular observación á Acta da sesión anterior que se distribuiu coa convocatoria.

Se non houbese observacións considerarase aprobada e, se as houbese, debateranse e decidirán as rectificacións que procedan. En ningún caso poderá ser modificado o fondo dos Acordos e só poderán ser emendables erros materiais ou de feito. As intervencións de cada un dos membros manifestadas ao longo do debate serán transcritas en síntese permitindo destas fundamentalmente coñecer e xustificar o sentido da votación, polo que salvo erros de feito na transcrición non serán consideradas e por tanto non serán incluídas no Acta que se aproba, as pretensións de modificación ou rectificación de intervencións parte do debate que non teñan que ver co fondo do asunto ou co sentido do voto manifestado.

Os asuntos debateranse e votaranse pola orde en que estivesen relacionados na orde do día.

O Alcalde ou Alcaldesa poderá alterar a orde dos temas, retirar un asunto cando a súa aprobación esixise unha maioría especial e esta non se puidese obter no momento previsto inicialmente na orde do día.

A consideración de cada punto incluído na orde do día comezará coa lectura íntegra ou en extracto, polo/a Secretario/a, do Ditame formulado pola Comisión Informativa ou, se se trata dun asunto urxente, non ditaminado pola aquela, da proposición que se somete ao Pleno. A solicitude de calquera Grupo deberase de dar lectura íntegra a aquelas partes do expediente ou do informe ou Ditame da Comisión que se considere convinte para mellor comprensión.

Se ninguén solicitase a palabra tras a lectura, o asunto someterase directamente a votación.

Nas sesións ordinarias, unha vez que concluíu a orde do día, o Alcalde ou Alcaldesa preguntará se algún Grupo Político desexa someter á consideración do Pleno por razóns de urxencia algún asunto non incluído na orde do día, se así fóra, o/a voceiro dese Grupo Político propoñerá o punto que se quere tratar e a urxencia do mesmo, votándose sobre a procedencia ou non do debate.

As mocións de censura seguirán o procedemento establecido no Artigo 20 do presente Regulamento.

Artigo 57. Retirada de expedientes.

Durante o debate, calquera Concelleiro ou Concelleira poderá pedir que se produza a retirada dalgún expediente para que se incorporen a aquel documentos ou informes, e tamén se poderá solicitar que o expediente quede sobre a mesa, aprazándose a súa discusión para a seguinte sesión.

En ambos os supostos, a petición deberá ser votada, e tras terminar o debate e antes de proceder a votar sobre o fondo do asunto, se a maioría simple votase a favor da petición, non haberá lugar a votar a proposta do Acordo.

Artigo 58. Adiamento do debate.

Cando se trate de asuntos que non se incluíron na orde do día e que requiran informe preceptivo da Secretaría ou da Intervención deste Concello, se estes informes non se puidesen emitir no acto, deberase solicitar da Presidencia que se aprace o seu estudo quedando sobre a mesa ata a próxima sesión.

Se a petición non fose atendida, o/a Secretario/a farao constar expresamente na Acta.

Artigo 59. Regras das intervencións.

Se se promove o debate, as intervencións serán ordenadas polo Alcalde ou Alcaldesa, conforme ás seguintes regras:

- Só se poderá facer uso da palabra previa autorización do Alcalde ou Alcaldesa. O Alcalde ou Alcaldesa poderá intervir en calquera momento.

- As intervencións terán lugar persoalmente e de viva voz.

- Os concelleiros e concelleiras intervirán normalmente por medio do/a portavoz do correspondente grupo municipal.

- Dentro do mesmo Grupo poderanse ceder entre sí a quenda que lles corresponda, e todas as intervencións dirixiranse sempre á Corporación e non a un individuo ou fracción desta.

- O debate iniciarase cunha exposición e xustificación da proposta, a cargo dalgún/a membro da Comisión Informativa que a ditaminase ou, nos demais casos, dalgún dos/as membros da Corporación que subscriban a proposición ou moción, en nome propio ou do colectivo e órgano municipal propoñente desta.

- A continuación, os diversos grupos consumirán unha primeira quenda. Os/as voceiros de grupo ou os/as seus membros solicitarán do Alcalde ou Alcaldesa o uso da palabra en forma verbal ou por calquera medio convencional. O Alcalde ou Alcaldesa concederá a palabra aos/ás voceiros seguindo unha orde alternativa de intervencións, iniciadas de forma rotatoria. Os/as concelleiros/as non adscritos disporán do mesmo tempo de intervención en proporción ao que corresponde a cada un dos/as concelleiros/as.

- O Alcalde ou Alcaldesa velará para que todas as intervencións teñan unha duración igual que terán en todo caso unha duración máxima no seu conxunto de 6 minutos nunha primeira quenda por grupo municipal e de tres minutos na segunda quenda de réplica no seu conxunto e por grupo municipal, cando este fora solicitado. Con todo se a importancia ou a complexidade do asunto o require, o Alcalde ou Alcaldesa segundo o seu prudente criterio, poderá ampliar brevemente o tempo establecido

- Quen se considere aludido/a por unha intervención que implique xuízos de valor sobre a persoa ou a súa conduta poderá solicitar do Alcalde ou Alcaldesa que se conceda unha quenda por alusións, que será breve e concisa, cun máximo dun minuto. A concesión da quenda de alusións será acordada polo Alcalde ou Alcaldesa, previa solicitude e nela non se poderá entrar no fondo do asunto do debate senón só contestar estritamente as alusións realizadas na presente sesión na que se manifesten ou na seguinte que se celebre.

- Se o solicitase algún Grupo, procederase a unha segunda quenda de réplica que no seu conxunto e por grupo municipal será de máximo tres minutos. Consumido leste, o/a Presiente pode dar por terminada a discusión que se pechará cunha intervención do/a relator/a na que brevemente ratificará ou modificará a súa proposta.

- Non se admitirán outras interrupcións que as da Presidencia para chamar á orde ou á cuestión debatida a algún/ha dos/as membros do Pleno conforme ao establecido para estes supostos legalmente e no presente regulamento.

Os/as membros da Corporación poderán en calquera momento do debate pedir a palabra para expor unha cuestión de orde, invocando para o efecto a norma cuxa aplicación reclama. O/a Presidente/a resolverá o que proceda, sen que por este motivo se estableza debate algún.

Os/as funcionarios/as responsables da Secretaría e da Intervención poderán intervir cando fosen requiridos polo/a Presidente/a por razóns de asesoramento técnico ou aclaración de conceptos. Cando devanditos/as funcionarios/as entendan que no debate se espuxo algunha cuestión sobre a que poida dubidarse sobre a legalidade ou repercusións orzamentarias do punto debatido poderán solicitar ao/á Presidente/a o uso da palabra para asesorar á Corporación.

Artigo 60. Chamadas a cuestión e chamadas á orde.

O Alcalde ou Alcaldesa dirixe o debate podendo chamar a cuestión cando os/as intervenientes se desvien notoriamente do debate por disgresiones extranas ou volvan sobre o xa tratado ou resolto. O Alcalde ou Alcaldesa retirará a palabra a quen por terceira vez fose chamado/a a cuestión e poderá ao seu criterio concederlla de novo para que se xustifique ou se desculpe.

O Alcalde ou Alcaldesa poderá chamar á orde a calquera membro da Corporación que:

- Profira palabras agresivas ou desconsideradas ou verta conceptos ofensivos ou frases atentatorias ao decoro da Corporación ou dos seus membros ou do seu persoal, das Institucións Públicas ou de calquera outra persoa ou Entidade ou ao seu prestixio persoal, profesional ou institucional, segundo o caso, sen prexuízo das responsabilidades a que houber lugar

- Produza interrupcións ou, de calquera outra forma, altere a orde das sesións.

- Pretenda facer uso da palabra sen que lle fora concedida ou unha vez que lle fora retirada.

Tras tres chamadas á orde na mesma sesión, con advertencia na segunda da consecuencias da terceira chamada, o/a Presidente/a poderá ordearlle que abandone o local en que se estea celebrando a reunión, adoptando as medidas que considere oportunas para facer efectiva a expulsión.

Se como consecuencia da orde de abandono do Salón de Sesións ou por calquera outra causa se producise unha alteración da orde, que a xuízo da Alcaldía puidese afectar o decoro da Institución, interromperase a sesión por un tempo prudencial; se pasado este non pode continuarse normalmente, pecharase a sesión definitivamente e os asuntos que quedan pendentes deberán ser tratados noutra sesión para celebrar como moito no prazo de oito días, e co mesmo carácter que tivese a que se suspendeu.

Artigo 61. Abstención e abandono do salón.

Cando algún/ha membro da Corporación deba de absterse de participar na deliberación e votación, deberá abandonar o Salón mentres se discute e vota o asunto, salvo cando se trate de debater a súa actuación como corporativo/a, en que terá dereito a permanecer e defenderse.

Artigo 62. Intervencións dos/as membros da Corporación Local

A terminoloxía que para os efectos do desenvolvemento das sesións e para definir o carácter das intervencións dos/as membros da Corporación utilizarase será a seguinte:

- Ditame: é a proposta sometida ao Pleno tras o estudo do expediente pola Comisión Informativa. Contén unha parte expositiva e un Acordo para adoptar.

- Proposición: é a proposta que somete ao Pleno relativa a un asunto incluído na orde do día, que acompaña á convocatoria. Conterá unha parte expositiva ou xustificación e un acordo para adoptar.

- Moción: é a proposta que se somete a coñecemento do Pleno en exercicio das súas competencias por calquera dos grupos políticos integrantes do órgano. As mocións presentaranse sempre por escrito no Rexistro Xeral municipal con antelación suficiente para que poidan ser incluídas na orde do día do Pleno previo ditame da Comisión Informativa correspondente, salvo nos casos de urxencia debidamente motivada nos supostos de mocións con proposta de resolución. Exceptúanse de ser ditaminadas pola correspondente Comisión as mocións de mero contido ideolóxico, programático ou protocolario, que non implicarán acordo algún senón unha simple declaración formal ou de recoñecemento de feitos. No caso de que as mocións versen sobre asuntos que teñan que ser ditaminados, por implicar a adopción dun acordo plenario, deberán ser incluídas na orde do día da Comisión Informativa previa á sesión plenaria correspondente, en caso contrario terá que ser ratificada a urxencia da súa inclusión na orde do día do pleno, para o caso de que non se emitiu ditame previo. Conterán un parte expositiva xustificativa e unha proposta de resolución. As mocións que necesiten informes dos servizos municipais ou compromisos económicos e por tanto necesiten unha tramitación previa serán presentados con antelación suficiente á formación da orde do día, en caso contrario serán incorporadas á orde do día da seguinte sesión. A moción pode ser rexeitada polo Alcalde ou Alcaldesa cando verse sobre asuntos que non sexan competencia do Pleno ou sexa idéntica a unha presentada no último ano. As mocións poden ser emendadas por calquera concelleiro/a para modificar, engadir, suprimir ou substituír os termos nos que a mesma foi redactada. Se o/a propoñente da moción acepta a emenda inclúese aquela para os efectos da votación. Para tratar unha moción atenderase ao réxime xurídico aplicable ao debate establecido para os plenos en xeral. Poderán presentarse como máximo 2 mocións por grupo municipal e sesión.

- Voto particular: é a proposta de modificación dun Ditame formulada por un membro que forma parte da Comisión Informativa. Deberá acompañar ao Ditame desde o día seguinte á súa aprobación pola Comisión.

- Emenda: é a proposta de modificación dun Ditame ou proposición presentada por calquera membro, mediante escrito presentado á Presidencia antes de iniciarse a deliberación do asunto.

- Rogo: é a formulación dunha proposta de actuación dirixida a algún dos Órganos de Goberno municipal. Os rogos formulados no seo do Pleno non poderán ser debatidos, só formulados polo proponente de forma sucinta e motivada e en ningún caso serán sometidos a votación. Poden expor rogos todos os membros da Corporación, ou os Grupos Municipais a través das súas Portavocías. Os rogos serán efectuados por escrito e serán sometidos xeralmente á sesión seguinte, sen prexuízo de que o poidan ser na mesma sesión que se formulen se o Alcalde ou Alcaldesa o estima convinte, e fosen presentados polo menos con dous días hábiles de antelación á celebración da sesión. Poderanse presentar como máximo 12 rogos por grupo municipal e sesión.

- Pregunta: é calquera cuestión exposta aos Órganos de Goberno no seo do Pleno. Poden expor preguntas todos os/as membros da Corporación, ou os Grupos Municipais a través das súas Portavocías tanto ao Alcalde ou Alcaldesa como aos concelleiros e concelleiras que obstenten delegacións xerais ou especiais. As preguntas expostas oralmente no transcurso dunha sesión serán xeralmente contestadas polo seu destinatario na sesión seguinte, sen prexuízo de que o/a preguntado/a queira darlle resposta inmediata. As preguntas formuladas por escrito serán contestadas polo seu destinatario na sesión seguinte, sen prexuízo de que o/a preguntado/a queira darlle resposta inmediata. Así como regra xeral, as preguntas serán presentadas por escrito como mínimo un día antes da celebración da sesión correspondente, e serán contestadas ordinariamente na seguinte sesión sen prexuízo de que o/a preguntado/a queira darlle resposta na sesión inmediata. Non se admitirán preguntas sobre o exclusivo interese de quen a formula ou de calquera persoa singularizada ou as que supoñan consultas de índole estritamente xurídico, técnico ou económico. Na quenda de contestación ás preguntas non caberá ningunha intervención adicional á do/a preguntado/a, polo que non haberá lugar a debate algún. Poderanse presentar como máximo 12 preguntas por grupo municipal e sesión.

SECCIÓN TERCEIRA. DAS VOTACIÓNS

Artigo 63. Votacións.

Finalizado o debate dos asuntos da orde do día procederase á súa votación. Antes de comezar a votación, o Alcalde ou Alcaldesa exporá clara e concisamente os termos da mesma e a forma de emitir o voto. Iniciada a votación, esta non poderá interromperse por ningún motivo. Durante o desenvolvemento da votación o/a Presidente/a non concederá o uso da palabra e ningún/ha membro corporativo poderá entrar no Salón ou abandonalo. Se no transcurso da votación xorden incidencias o Alcalde ou Alcaldesa suspenderaa iniciándose aquela cando se consideren resoltas.

Rematada a votación ordinaria, o Alcalde ou Alcaldesa declarará o acordado. Concluída a votación nominal, o/a Secretario/a computará os sufraxios emitidos e anunciará en voz alta o seu resultado, en vista do cal o Alcalde ou Alcaldesa proclamará o Acordo adoptado.

Artigo 64. Adopción de acordos.

O Pleno do Concello adopta os seus Acordos, como regra xeral, por maioría simple dos membros presentes. Existe maioría simple cando os votos afirmativos son máis que os negativos.

Entenderase por maioría absoluta cando os votos afirmativos son máis da metade do número legal de membros da Corporación e será necesaria nos supostos enumerados no Artigo 47.2 da Lei 7/1985, do 2 de abril, Reguladora das Bases de Réxime Local.

No caso de que, seguindo a Lei Orgánica do Réxime Electoral Xeneral, non quedarán máis posibles candidatos/as ou suplentes a nomear, o quórum de asistencia e votación previstos na Lexislación vixente entenderanse automaticamente referidos ao número de feito de membros da Corporación subsistente.

O voto dos/as Concelleiros/as é persoal e indelegable.

Artigo 65. Sentido do voto, abstención e empates.

O sentido do voto pode ser afirmativo ou negativo, podendo os/as membros da Corporación absterse de votar.

A efectos da votación correspondente, considerarase que se absteñen os/as membros da Corporación que se ausentaron do Salón de Sesións unha vez iniciada a deliberación dun asunto e non estivesen presentes no momento da votación. No caso de que se reincorporasen ao Salón de Sesións antes da votación poderán, desde logo, tomar parte da mesma.

No caso de votacións con resultado de empate, efectuarase unha nova votación e, se persistise o empate, decidirá o voto de calidade da Presidencia.

Artigo 66. Tipos de votacións.

As votacións poderán ser de tres tipos: ordinarias, nominais e secretas.

- Ordinarias: aquelas que se manifestan por signos convencionais de asentimiento, disentimiento ou abstención. É o sistema normal de votación.

- Nominais: aquelas votacións que se realizan mediante chamamento por orde alfabética de apelidos e sempre en último lugar o/a Presidente/a, na que cada membro da Corporación, ao ser chamado, responde en voz alta «si», «non» ou «abstéñome». Requirirá a solicitude dun Grupo Municipal aprobada polo Pleno por unha maioría simple en votación ordinaria.

- Segredas: votacións que se realizan por papeleta que cada membro da Corporación irá depositando nunha urna ou bolsa. Só se poderá utilizar para a elección ou destitución de persoas.

Artigo 67. Explicación do voto.

Proclamado o Acordo, os Grupos que non tiveran intervido no debate, ou que tras este cambiasen o sentido do seu voto, poderán solicitar do/a Presidente/a unha quenda de explicación de voto.

SECCIÓN CUARTA. DO CONTROL E FISCALIZACIÓN POLO PLENO DA ACTUACIÓN DOS DEMAIS ÓRGANOS DE GOBERNO

Artigo 68. Medios de control e fiscalización.

O control e fiscalización polo Pleno da actuación dos demais Órganos de Goberno exercerase a través dos seguintes medios:

- Moción de censura ao Alcalde ou Alcaldesa.

- Mocións, rogos e preguntas, de conformidade co Artigo 46.2 da Lei 7/1985, do 2 de abril, Reguladora das Bases de Réxime Local.

Artigo 69. Comparecencias.

Todo/a membro do Concello que, por delegación da Alcaldía, obstente a responsabilidade dunha área de xestión estará obrigado/a a comparecer ante o Pleno, cando este así o acorde, ao obxecto de responder ás preguntas que se lle formulen sobre a súa actuación.

Acordada a comparecencia polo Pleno, o Alcalde ou Alcaldesa incluirá o asunto na orde do día da próxima sesión ordinaria ou extraordinaria a celebrar pola Corporación, notificando ao/á interesado/a o Acordo adoptado e a data en que se celebrará a sesión en que deberá comparecer. Entre esta notificación e a celebración da sesión deberán transcorrer un mínimo de tres días.

No desenvolvemento das comparecencias seguirase a orde das intervencións establecidas no presente Regulamento.

Artigo 70. Debate sobre a actuación da Xunta.

O Pleno, a proposta do Alcalde ou Alcaldesa ou mediante solicitude da cuarta parte, polo menos, do número legal de membros corporativos, poderá acordar a celebración de sesión extraordinaria cuxo obxecto sexa a consulta sobre asuntos competencia da Xunta de Goberno Local. As solicitudes destes plenos extraordinarios serán computados no total legalmente autorizado e neste órgano non se adoptarán acordos resolutorios, xa que o mesmo ten exclusivamente a finalidade de coñecer ou consultar expedientes competencia doutro órgano.

No desenvolvemento das comparecencias seguirase a orde das intervencións establecidas neste Regulamento.

Artigo 71. Celebración de sesión extraordinaria

O Pleno, a proposta do Alcalde ou Alcaldesa ou mediante solicitude da cuarta parte, polo menos, do número legal de membros corporativos, poderá acordar a celebración de sesión extraordinaria sobre asuntos da súa competencia.

O desenvolvemento da sesión a que fai referencia o apartado anterior suxeitarase ao establecido con carácter xeral.

Artigo 72. Moción de censura ao Alcalde.

O Alcalde ou Alcaldesa pode ser destituído/a mediante moción de cesura, cuxa presentación, tramitación e votación rexerase polo disposto no Artigo 20 do presente Regulamento.

SECCIÓN QUINTA. FÉ PÚBLICA

Artigo 73. Acta das sesións.

De cada sesión plenaria o/a Secretario/a do Concello estenderá Acta na que fará constar:

a) Lugar da reunión, con expresión do nome do Municipio e o local en que se celebra.

b) Día, mes e ano.

c) Hora en que comeza.

d) Nome e apelidos do/a Presidente/a, dos/as membros da Corporación presentes, dos/as ausentes que se escusaron e dos/as que falten sen escusa.

e) Carácter ordinario ou extraordinario da sesión, e se se celebra en primeira ou segunda convocatoria.

f) Asistencia do/a Secretario/a, ou de quen legalmente lle substitúa, e presenza do/a funcionario/a responsable da Intervención, cando concorra.

g) Asuntos que examinen, opinións sintetizadas dos Grupos ou membros da Corporación que interviñesen nas deliberacións e incidencias destas.

h) Votacións que se verifiquen e no caso das nominais o sentido en que cada membro emita o seu voto. Nas votacións ordinarias farase constar o número de votos afirmativos, negativos e das abstencións. Farase constar nominalmente o sentido do voto cando así o pidan os interesados.

i) Parte dispositiva dos Acordos que se tomen.

j) Hora en que a Presidencia levanta a sesión.

De non celebrarse o Pleno por falta de quórum ou outro motivo, o/a Secretario/a suplirá a Acta por unha dilixencia autorizada coa súa firma, na que consigne a causa e os nomes das persoas que non concorreron á sesión, e o nome dos asistentes.

Artigo 74. Votación do acta.

O Acta deberá ser sometida a votación do Pleno na sesión inmediatamente posterior á que se recolle na mesma, previa lectura no caso de que non fose distribuída antes entre os/as membros da Corporación.

No Acta farase constar a aprobación do acta anterior e, no seu caso, as rectificacións que se produciron, sen que, en ningún caso, poidan producirse modificacións en canto ao fondo do asunto e atendendo o todo caso ao réxime xurídico establecido no presente Regulamento.

Artigo 75. Libro de actas.

O Acta, unha vez que aprobada polo Pleno, transcribirase ao Libro de Actas que será asinado dixitalmente polo/a Alcalde/AlcaldesaPresidente/a e o/a Secretario/a.

As actas das sesións dos órganos colexiados de goberno estenderanse en soporte electrónico incorporando, ou non o arquivo audiovisual das sesións.

Os libros de actas e os de resolucións en soporte electrónico estarán formados, respectivamente, pola agregación cronolóxica e numerada correlativamente das correspondentes actas e resolución no seu caso. Cada libro abranguerá o período dun ano natural e poderá incorporar un índice comprensivo dos arquivos incluídos.

A aplicación informática que soporte tales libros deberá garantir a integridade, autenticidade, calidade, confidencialidade, protección e conservación dos ficheiros electrónicos correspondentes.

Artigo 76. Transcrición das actas.

As actas das sesións dos órganos colexiados de goberno transcribiranse en documentos asinados electrónicamente pola persoa titular da secretaría e pola persoa titular da presidencia do órgano colexiado de goberno ou persoa que a substitúa ou en quen delegue. As sinaturas destes documentos terán as garantías exixidas pola normativa reguladora dos documentos electrónicos.

As actas das sesións dos órganos colexiados de goberno estenderanse en soporte electrónico incorporando, ou non o arquivo audiovisual das sesións.

A acta en soporte electrónico sen incorporación do arquivo audiovisual da sesión defínese coma o documento electrónico que conteña, como mínimo:

a) Consignación expresa dos seguintes estremos: lugar de reunión, data e hora de inicio e finalización da sesión, indicación do carácter ordinario ou extraordinario, persoas asistentes con expresión dos seus cargos (presidente/a, vogais e demais) e os membros que se escusasen, orde do día, contido dos acordos acadados, se for o caso, e opinións sintetizadas dos membros que tivesen intervido nas deliberacións, así como a expresión do sentido do voto dos membros.

b) Sinatura electrónica: a sinatura electrónica da persoa que exerce a secretaría do órgano, que dota de fe pública e efectos de dereito o documento, e da persoa que exerza a presidencia.

Por acordo de pleno poderá optarse porque as actas das sesións dos órganos colexiados de goberno incorporen o arquivo audiovisual da sesión. Neste caso, o ficheiro resultante da gravación, xunto coa certificación expedida pola secretaría da súa autenticidade e integridade, e cantos documentos en soporte electrónico se empregasen como documentos da sesión, incorporaranse á acta da sesión, sen necesidade de facer constar nesta última as deliberacións.

A acta en soporte electrónico con incorporación do arquivo audiovisual da sesión defínese como un documento electrónico e multimedia que conteña como mínimo:

a) A consignación expresa dos seguintes datos: lugar de reunión, data e hora de inicio e finalización da sesión, indicación do carácter ordinario ou extraordinario, persoas asistentes con expresión dos seus cargos (presidente/a, vogais e demais) e os membros que se escusasen, orde do día, contido dos acordos alcanzados, se for o caso, así como a expresión do sentido do voto dos membros.

b) A gravación da sesión cun arquivo de audio e vídeo. Este documento recollerá a literalidade das intervencións.

c) Sinatura electrónica: a sinatura electrónica da persoa que exerce a secretaría do órgano, que dota de fe pública e efectos de dereito o documento, e da persoa que exerza a presidencia.

Artigo 77. Publicidade das sesións do Pleno.

As sesións do Pleno son públicas; con todo, poderán ser segredos os debates e as votacións daqueles asuntos que poidan afectar ao dereito fundamental á honra, a intimidade persoal e familiar e á propia imaxe, ao que se refire o Artigo 18 da Constitución, cando así se acorde por maioría absoluta.

CAPÍTULO SEGUNDO. FUNCIONAMENTO DA XUNTA DE GOBERNO LOCAL

Artigo 78. Das Sesións.

A Xunta de Goberno Local celebrará sesión constitutiva, a convocatoria do/a Alcalde/Alcaldesa, dentro dos dez días seguintes a aquel en que este designase aos/ás membros que a integran. Celebrarase por parte da Xunta de Goberno Local sesión ordinaria cada quince días como mínimo. Corresponde á Alcaldía fixar, mediante Decreto, o día e hora en que deba celebrarse sesión ordinaria. As sesións extraordinarias e as urxentes terán lugar cando, con tal carácter, sexan convocadas polo/a Alcalde/ Alcaldesa. O Alcalde ou Alcaldesa poderá en calquera momento reunir á Xunta de Goberno Local cando estime necesario coñecer o seu parecer ou pedir a súa asistencia con anterioridade a ditar Resolucións en exercicio das atribucións que lle correspondan. As sesións celebraranse na Casa Consistorial/edificio que sexa sede da Entidade, salvo os supostos de forza maior. Asimesmo, a celebración poderá ter lugar por medios telemáticos e será así determinado na convocatoria da mesma. O réxime de funcionamento telemático atenderá ao previsto a estos efectos no presente Regulamento.

Non serán públicas as sesións da Xunta de Goberno Local

Artigo 79. Regras de funcionamento.

As regras especiais de funcionamento da Xunta de Goberno Local son as seguintes:

- Entre a convocatoria e a celebración da sesión non poderán transcorrer menos de vinte e catro horas, salvo no caso das sesións extraordinarias e urxentes nas que, antes de entrar a coñecer os asuntos incluídos na orde do día, deberá ser declarada a urxencia por Acordo favorable da maioría dos/as membros.

- As sesións da Xunta non serán públicas, sen prexuízo da publicidade e comunicación á Administración Estatal e Autonómica dos Acordos adoptados. No prazo de dez días deberá enviarse, por correo electrónico, a todos os/as membros da Corporación copia do Acta ou en caso de non designar dirección de correo electrónico entregarase un exemplar exclusivamente aos/ás portavoces de cada grupo municipal.

- Para a válida constitución da Xunta de Goberno Local requírese a asistencia da maioría absoluta dos seus compoñentes. Se non existise quórum, constituirase en segunda convocatoria, unha hora despois da sinalada para a primeira, sendo suficiente a asistencia da terceira parte dos seus membros e, en todo caso, un número non inferior a tres.

- O Alcalde ou Alcaldesa dirixe e ordena ao seu prudente arbitrio os debates no seo da Xunta.

- Nos casos en que a Xunta de Goberno Local exerza competencias delegadas polo Pleno, será preceptivo o previo informe da Comisión Informativa correspondente.

- As Actas das sesións da Xunta de Goberno Local transcribiranse en Libro distinto do das sesións do Pleno.

A Xunta de Goberno Local nas súas reunións deliberantes non poderá adoptar ningún Acordo, formalizarase en forma de Ditames.

Artigo 80. Asistencia doutros/as membros da Corporación.

Nas sesións e reunións da Xunta de Goberno Local, o/a Alcalde/Alcaldesa poderá requirir a presenza de membros da Corporación non pertencentes á Xunta de Goberno Local, ou de persoal ao servizo da Entidade, ao obxecto de informar no relativo o ámbito das súas actividades.

Artigo 81. Réxime supletorio.

En todo o non previsto para a Xunta de Goberno Local, estarase ao previsto sobre o funcionamento do Pleno

CAPÍTULO PRIMEIRO. As COMISIÓNS INFORMATIVAS

Artigo 82. Celebración das sesións.

As Comisións Informativas celebrarán sesións ordinarias coa periodicidade que se acorde polo Pleno no momento en que se constitúan, nos días e horas que estableza o Alcalde ou Alcaldesa, ou o/a Presidente/a da Comisión, quen poderá, así mesmo, convocar sesións extraordinarias ou urxentes das mesmas. O/a Alcalde/Alcaldesa ou o/a Presidente/a da Comisión estará obrigado/a a convocar sesión extraordinaria cando o solicite a cuarta parte, polo menos, dos/as membros da Comisión. Réxese neste suposto polas mesmas normas que para a celebración dunha sesión extraordinaria do Pleno. As sesións celebraranse no salón de sesións municipal. As sesión poderán ser celebradas telemáticamente e será así determinado na convocatoria. O réxime de funcionamento telemático atenderá ao previsto a estos efectos no presente Regulamento. A convocatoria e a orde do día deberán ser notificados aos/ás membros da Comisión, por medios electrónicos e co cumprimento dos requisitos legalmente esixidos.

Artigo 83. Quórum.

A válida celebración das sesións require a presenza da maioría absoluta dos/as compoñentes da Comisión, xa sexan titulares ou suplentes, en primeira convocatoria e un mínimo de tres membros en segunda convocatoria unha hora máis tarde.

O/a Presidente/a dirixe e ordena, ao seu prudente arbitrio, respectando os principios xerais que rexen os debates plenarios, os debates da Comisión.

Os Ditames aprobaranse sempre por maioría simple dos presentes, decidindo os empates o/a Presidente/a, pois conta con voto de calidade.

Artigo 84. Alcance das competencias.

Ningunha Comisión poderá deliberar sobre asuntos competencia doutra, a menos que se trate de problemas comúns, nese caso poderá convocarse unha sesión conxunta a proposta dos/as Presidentes/as das respectivas Comisións, convocándose polo/a Presidente/a da Corporación.

Artigo 85. Acta das sesións.

De cada sesión das Comisións Informativas levantarase Acta na que consten os extremos a que se refiren os apartados a), b), c), d), e), g), h), e j) do Artigo 73 do presente Regulamento, e á que se acompañarán os Ditames que fosen aprobados e os votos particulares que fosen formulados a aqueles.

Artigo 86. Publicidade as sesións.

Non son públicas as sesións das Comisións Informativas.

Artigo 87. Réxime supletorio.

En todo o non previsto para o funcionamento das Comisións Informativas serán de aplicación as disposicións sobre funcionamento do Pleno.

CAPÍTULO SEGUNDO. REGRAS ESPECIAIS DE FUNCIONAMENTO DOS DEMAIS ÓRGANOS COMPLEMENTARIOS COLEXIADOS

Artigo 88 Outros órganos colexiados (Xuntas de Distrito, Consellos Sectoriais, etc.).

O funcionamento das Xuntas de Distrito réxese polas normas que acorde o Pleno, a través do Regulamento que as regule, e inspirarase nas normas reguladoras do funcionamento do Pleno, que rexerán en todo caso de maneira supletoria.

O funcionamento dos Consellos Sectoriais rexerase polo disposto nos Acordos plenarios que os establezan.

O funcionamento dos órganos colexiados dos Entes descentralizados de xestión rexerase polo que dispoña a Lexislación en materia de formas de xestión de servizos, segundo a súa natureza específica.

Artigo 89. Dereitos e deberes dos veciños e veciñas.

Son dereitos e deberes da veciñanza:

- Ser elector/a e elexible de acordo co disposto na Lexislación electoral.

- Participar na xestión municipal de acordo co disposto nas Leis e, no seu caso, cando a colaboración con carácter voluntario dos veciños sexa interesada polos Órganos de Goberno e Administración Municipal.

- Utilizar, de acordo coa súa natureza, os servizos públicos municipais, e acceder aos aproveitamentos comunais, conforme ás normas aplicables.

- Contribuír mediante as prestacións económicas e persoais legalmente previstas á realización das competencias municipais.

- Ser informado previa petición razoada e dirixir solicitudes á Administración Municipal en relación con todos os expedientes e documentación municipal, de acordo co previsto no Artigo 105 da Constitución.

- Pedir a consulta popular nos termos previstos na Lei.

- Esixir a prestación e, no seu caso, o establecemento do correspondente servizo público, no suposto de constituír unha competencia municipal propia de carácter obrigatorio.

- Exercer a iniciativa popular nos termos previstos no Artigo 70.bis da Lei 7/1985, do 2 de abril Reguladora das Bases de Réxime Local.

- Aqueloutros dereitos e deberes establecidos nas Leis.

Artigo 90. Participación cidadá.

O Concello facilitará información sobre a súa actividade e promoverá a participación de todos os cidadáns e cidadás na vida local.

DISPOSICIÓN DEROGATORIA

Quedan derrogadas cantas normas municipais, Acordos ou disposicións, contradigan o establecido no presente Regulamento.

DISPOSICIÓN FINAL

O presente Regulamento entrará en vigor a partir da súa íntegra publicación no Boletín Oficial da Provincia de Coruña.

O regulamento dispón a súa entrada en vigor a partir da súa íntegra publicación no Boletín Oficial da Provincia de Coruña, pero se debe ter en conta que o artigo 70.2 da Lei 7/1985, de 2 de abril , reguladora das Bases do Réxime Local establece que:

¿¿..Las ordenanzas, incluídos el articulado de las normas de los planes urbanísticos, así como los acuerdos correspondientes a éstos cuya aprobación definitiva sea competencia de los entes locales, se publicarán en el ¿Boletín Oficial" de la provincia y no entrarán en vigor hasta que se haya publicado completamente su texto y haya transcurrido el plazo previsto en el artículo 65.2 salvo los presupuestos y las ordenanzas fiscales que se publican y entran en vigor en los términos establecidos en la Ley 39/1988, de 28 de diciembre, Reguladora de las Haciendas Locales....." (desde el 10 de marzo de 2004 RDL 2/2004, de 5 de marzo).

Artigo 65.2: ¿El requerimiento deberá ser motivado y expresar la normativa que se estime vulnerada. Se formulará en el plazo de quince días hábiles a partir de la recepción de la comunicación del acuerdo."