Arteixo - ORDENANZA FISCAL N.º 7, REGULADORA DA TAXA POLA INTERVENCIÓN MUNICIPAL NAS COMUNICACIÓNS PREVIAS, DECLARACIÓNS RESPONSÁBEIS E NO OUTORGAMENTO DE LICENZAS URBANÍSTICAS

En uso das facultades concedidas polos artigos 133.2 e 142 da Constitución e polo artigo 106 da Lei 7/1985, do 2 de abril, reguladora das Bases de Réxime Local, e de conformidade co disposto nos artigos 15 ao 19 do R.D. lexislativo 2/2004, do 5 de marzo, polo que se aproba o texto refundido da Lei reguladora das facendas locais, este Concello establece a exacción da taxa pola intervención municipal nas comunicacións previas, declaracións responsábeis e no outorgamento de licenzas urbanísticas, que se rexerá pola presente Ordenanza Fiscal, cuxas normas atenden ao disposto no artigo 57 do devandito R.D.lexislativo.

Constitúe o feito impoñible da presente taxa a actividade municipal, técnica e administrativa derivada da presentación das comunicacións previas e declaracións responsábeis así como a tendente a verificar se os actos de edificación e uso do solo á que se refiren os artigos 194 e 198 da Lei 9/2002, do 30 de decembro, de ordenación urbanística e protección do medio rural de Galicia, e que se vaian realizar dentro do termo municipal, se axustan ás normas urbanísticas vixentes.

1.-Son suxeitos pasivos contribuíntes as persoas físicas ou xurídicas e as entidades ás que se refire o artigo 36 da Lei Xeral Tributaria, que sexan solicitantes da licenza, que presenten as comunicacións previas e declaracións responsábeis derivadas da vixente normativa e as que executen as instalacións, obras ou construcións sen obte-la receptiva autorización.

2.-En todo caso, terán a condición de substitutos do contribuínte os construtores e contratistas das obras.

1.-Responderán solidariamente das obrigas tributarias do suxeito pasivo, as persoas físicas, e xurídicas ás que se refiren os artigos 42 da Lei 58/2003, do 17 de decembro, xeral tributaria.

2.-Serán responsables subsidiarios os/as administradores/as das sociedades e os síndicos, interventores ou liquidadores de crebas, concursos, sociedades e entidades en xeral, nos supostos e co alcance que sinala o artigo 43 da Lei 58/2003, do 17 de decembro, xeral tributaria.

1.-Constitúe a base impoñible da taxa:

a) Nos servizos urbanísticos, o número de servizos prestados.

b) Nas obras de nova planta e reconstrución, reforma e derrubamento, a superficie expresada en metros cadrados.

c) Nos pechamentos de fincas e solares, a lonxitude expresada en metros lineais.

d) Nas obras ou instalacións na vía pública, a lonxitude ou a superficie afectada pola obra ou instalacións, expresada en metros lineais ou cadrados, respectivamente, ou o número de unidades, segundo as características dos mesmos.

e) Nas instalacións industriais de maquinaria e análogos, a potencia dos aparatos ou o número de unidades, segundo as características dos mesmos.

Non se concederá exención nin bonificación ningunha na exacción da taxa, agás aqueles expresamente recollidos nas normas ou os derivados da aplicación de Tratados Internacionais.

Non estarán suxeitos ao pagamento da taxa, pero si da obriga de solicita- la oportuna licenza, a comunicación previa ou declaración responsable:

a) As obras que deban efectuar os particulares nas vías públicas ou na fachada dos pisos baixos e que sexan consecuencia directa das modificacións de aliñacións ou rasantes, canalizacións ou sumidoiros que faga o Concello de Arteixo.

b) O branqueo ou pintado de fachadas e muros.

c) Os derrubamentos ou demolicións que se produzan como consecuencia de declaracións de ruína inminente e que foran ordenados polo Concello.

d) Os derrubamentos ou demolicións daqueles inmobles que de acordo coa actual regulamentación urbanística do Concello se atopen fóra de ordenación.

e) As obras necesarias para a eliminación de barreiras arquitectónicas, sempre e cando non impliquen incremento de volume da edificación nin cambio de uso de ela.

1. Devéngase a taxa e nace a obriga de contribuír cando se inicie a actividade municipal que constitúe o seu feito impoñible. A estes efectos, entenderase iniciada dita actividade na data de presentación da oportuna solicitude de licenza urbanística, da comunicación previa ou declaración responsábel.

2. Cando as obras foran iniciadas ou executadas sen obter a oportuna licenza, ou presentar a correspondente declaración previa ou comunicación responsable, a taxa cobrarase cando se inicie a actividade municipal conducente a determinar se a obra en cuestión é ou non autorizable.

1. Sen prexuízo do establecido no artigo anterior e a teor do conferido no artigo 27 do R.D. lexislativo 2/2004, do 5 de marzo, polo que se aproba o texto refundido da Lei reguladora das facendas locais, o solicitante da licenza, quen presente a comunicación previa ou a declaración responsable procederá a autoliquidar o seu importe e ingresar a cota tributaria resultante en concepto de depósito previo, non tramitándose o expediente se non chegara a abonarse a taxa. A referida autoliquidación é un acto do obrigado tributario, cuxo importe será reintegrado ao contribuínte, se por causas non imputables ao mesmo non chegara a prestarse o servizo.

2. Se unha vez autoliquidada a taxa, resultara unha cota superior ou inferior as especificadas na presente ordenanza fiscal, procederase, no primeiro caso, a requirir o ingreso da diferenza antes de resolver o expediente, e no segundo, á devolución do exceso.

1. Antes de que sexa ditado o acto administrativo sobre concesión da licenza, ou no seu caso, dentro dos tres meses seguintes á presentación da comunicación previa ou declaración responsábel, os interesados poderán desistir expresamente das solicitudes. Dito desistimento xerará a devolución do 50% das taxas abonadas, sempre que se realizara no prazo de tres meses desde a presentación da solicitude de licenza urbanística ou dentro dos tres meses seguintes á presentación da comunicación previa ou declaración responsábel e as obras non se tiveran iniciadas.

2. A caducidade, como un dos xeitos de rematar o procedemento administrativo e tramitada de oficio, non xerará dereitos económicos a favor dos contribuíntes.

3. Todas as licenzas, delcaracións responsables e comunicacións previas terán un prazo máximo para a execución das obras. Rematado o prazo quedará caducada e sen valor nin efecto ningún a autorización obtida, salvo que, anticipadamente, se solicite e obteña, no seu caso, a prórroga regulamentaria. Os dereitos pola concesión da prórroga fíxanse no 1% da parte da obra pendente de executar.

En todo o relativo á cualificación de infraccións tributarias, así como das sancións que ás mesmas corresponden en cada caso, estarase o disposto nos artigos 183 e seguintes da Lei 58/2003, do 17 de decembro, xeral tributaria.

As cotas tributarias establecidas na presente ordenanza incrementaranse anualmente segundo o IPC.

A presente Ordenanza fiscal foi aprobada polo Concello Pleno en sesión realizada o día 29 de setembro de 2011.

A presente modificación, Pleno de 29 de abril de 2021, entrará en vigor ao día seguinte da súa publicación no Boletín Oficial da Provincia, permanecendo en vigor até a súa modificación ou derrogación expresas.