Ponteceso - ORDENANZA FISCAL NÚMERO 13, REGULADORA DA TAXA POLA PRESTACIÓN DO SERVICIO PÚBLICO DE SUBMINISTRACIÓN DE AUGA POTABLE A DOMICILIO

No uso das facultades concedidas polos artigos 133.2 e 142 da Constitución e polo artigo 106 da Lei 7/85, do 2 de abril, reguladora das bases de réxime local, e de conformidade co disposto nos artigos 15 a 19 da Lei 39/88, do 28 de decembro, reguladora das facendas locais, este Concello establece a taxa por prestación do servicio público de subministración de auga potable a domicilio e das acometidas á rede xeral de abastecemento de auga, que se rexerá pola presente ordenanza fiscal, atendendo as súas normas ó disposto no artigo 38 da Lei 39/88.

Constitúe o feito impoñible desta taxa a prestación no Concello dos seguintes servicios:

a)  Subministración de auga potable a domicilio.

b)  Acometidas á rede xeral de abastecemento de auga.

b)  Conservación de acometidas e contadores.

Son suxeitos pasivos desta taxa, en concepto de contribuíntes, as persoas físicas, xurídicas e as entidades a que se refire o artigo 33 da Lei xeral tributaria, e 23 da Lei 39/88, do 28 de decembro, que soliciten, resulten beneficiadas ou sexan usuarias dos servicios descritos no parágrafo anterior.

Terán a condición de substitutos do contribuínte os propietarios das vivendas ou locais ós que se provea do servicio, podendo repercutir, de se-lo caso, as cotas sobre os respectivos beneficiarios.

1.-Responderán solidariamente das obrigas tributarias do suxeito pasivo as persoas físicas ou xurídicas a que se refiren os artigos 38 e 39 da Lei xeral tributaria.

2.-Serán responsables subsidiarios os administradores das sociedades e os síndicos, interventores ou liquidadores de quebras, concursos, sociedades e entidades en xeral, nos supostos e co alcance que sinala o artigo 40 da Lei xeral tributaria.

A base do presente tributo estará constituída por:

a)  Na subministración ou distribución de auga: os metros cúbicos de auga consumida no inmoble onde estea instalado o servicio.

b)  Nas acometidas á rede xeral: a sección da rede de distribución e do ramal de conexión.

1.-A contía da taxa, regulada neste texto, será a fixada nas seguintes tarifas:

a)  Abastecemento de auga.

    ABONADOS DOMÉSTICOS

Mínimo: 12.5 m³/abonado. Mes: 0.369021* euros/m³ (61,4 pesetas/m³).

Excesos: 0.451360* euros/m³ (75,10 pesetas/m³).

    ABONADOS INDUSTRIAIS

Mínimo: 31.00 m³/abonado. Mes: 0.451360*euros/m³ (75,10 pesetas/m³).

Excesos: 0.508456* euros/m³ (84,60 pesetas/m³).

* Importante.-O artigo 11.4 da Lei 46/1998, do 17 de decembro, sobre introducción do euro, dispón: "Cando se trate da conversión á unidade euro de tarifas, prezos, aranceis ou cantidades unitarias que teñan que aplicarse a bases expresadas en calquera magnitude, as cifras que resulten da aplicación do tipo de conversión tomaranse con seis cifras decimais, efectuándose o redondeo por exceso ou por defecto ó sexto decimal máis próximo. No caso de que ó aplica-lo tipo de conversión se obteña unha cantidade a sétima cifra decimal da cal sexa cinco, o redondeo efecturarase á cifra superior".

Cota de enganche para calquera uso (dunha soa vez): 150,25 euros (25.000 pesetas).

b)  Cota de conservación dos contadores.

Calibre (mm).-Cota mensual

13 mm: 0,21 euros/mes (35 pesetas/mes)

25/30 mm: 0,37 euros/mes (62 pesetas/mes)

40/50 mm: 0,68 euros/mes (112 pesetas/mes)

65 mm: 4,16 euros/mes (691 pesetas/mes)

80 mm: 5,19 euros/mes (863 pesetas/mes)

100 mm: 6,49 euros/mes (1.079 pesetas/mes)

150 mm: 9,36 euros/mes (1.557 pesetas/mes)

200 mm: 18,95 euros/mes (3.153 pesetas/mes)

250 mm: 23,88 euros/mes (3.974 pesetas/mes)

300 mm: 32.15 euros/mes (5.350 pesetas/mes)

400 mm: 47.11 euros/mes (7.838 pesetas/mes)

500 mm: 60,54 euros/mes (10.073 pesetas/mes)

c)  Cota de conservación da acometida.

0,22 euros/unidade (35,95 pesetas/unidade).

A presente taxa percibirase dende o momento en que se inicie a prestación do servicio, previa a correspondente solicitude ou desde que se utilice este sen ter obtido a previa licencia.

1.-Altas e baixas:

A)  Usos domésticos.-Para poder dá-la alta ó futuro abonado de usos domésticos, o interesado deberá presentar, xunto coa correspondente solicitude, o último dos recibos efectivos do imposto de bens inmobles da vivenda na que pretenda a subministración e aboa-la cota de enganche fixada no artigo 6.º .

B)  Usos industriais.-Ademais do esixido no apartado anterior, ó interesado poderáselle esixi-lo último dos recibos efectivos do imposto de actividades económicas.

C)  Usos para obras en construcción.-O interesado deberá presentar, xunto coa solicitude de enganche, a correspondente copia da solicitude da licencia de obra e aboa-la cota de enganche mencionada.

D)  No caso de que, por motivos hixiénico-sanitarios, a comisión de goberno o considere oportuno, poderá conceder altas provisionais aplicando, neste caso, a tarifa que corresponde ós usos industriais.

E)  No caso de que, para cada un dos conceptos anteriormente indicados, o interesado non presente os documentos que se citan, o Concello desestimará a solicitude.

F)  Respecto ás baixas, o Concello non outorgará baixas temporais.

2.-O pagamento desta taxa farase no momento en que se lle presente ó interesado, obrigado a realizalo, a correspondente factura, que se realizará con periodicidade trimestral.

3.-As débedas correspondentes á prestación do servicio poderán esixirse polo procedemento de constrinximento, de conformidade co establecido no Regulamento xeral de recadación.

En todo o relativo a infraccións tributarias e á súa cualificación, así como ás sancións que correspondan en cada caso, aplicaranse as normas contidas na Lei xeral tributaria.

1.-A presente ordenanza fiscal, aprobada polo Pleno o día 15 de novembro de 2001, entrará en vigor o día da súa publicación no Boletín Oficial da Provincia, comezará a rexer a partir do 1 de xaneiro de 2002 e permanecerá en vigor ata súa modificación ou derrogación expresas.

2.-Queda derrogada expresamente a Ordenanza fiscal número 13, reguladora do prezo público por subministración de auga,aprobada polo Concello pleno na sesión do 13 de novembro de 1989 e publicada integramente no Boletín Oficial da Provincia número 298 bis, do 30 de decembro de 1989, que quedará sen efectos no momento da entrada en vigor da presente ordenanza fiscal.