San Sadurniño - ORDENANZA FISCAL Nº T-4, REGULADORA DA TAXA POR EXPEDICIÓN DE DOCUMENTOS

En aplicación do disposto nos artigos 15 a 27 e 58 do texto refundido da Lei de Facendas Locais, aprobado por Real Decreto Lexislativo 2/2004 de 5 de marzo, este Concello establece a exacción da taxa por expedición de documentos, que se rexerá pola presente ordenanza fiscal.

1. Constitúe o feito impoñible da taxa a actividade administrativa desempeñada con motivo da tramitación, a instancia de parte, de toda clase de documentos que expidan e de expedientes de que entendan a Administración ou as autoridades municipais.

2. Para tal efecto, considerarase tramitada a instancia de parte calquera documentación administrativa que fose provocada pola persoa particular ou redunde no seu beneficio aínda que non mediara solicitude expresa da persoa interesada.

3. Non estará suxeita á taxa a tramitación de expedientes e documentos necesarios para o cumprimento dos deberes de colaboración coa Administración de Xustiza (entendidos estes no que se refire ás certificacións e informes solicitados de oficio polas autoridades xudiciais).

4. Igualmente considerarase non suxeita á presenta taxa a expedición de documentos administrativos de calquera clase solicitados por outras Administración públicas no exercicio das súas funcións, ou ben polos organismos autónomos ou sociedades mercantís dependentes destas sempre que actúen no cumprimento de fins de interese público.

Son suxeitos pasivos contribuíntes as persoas físicas e xurídicas e as entidades a que se refire o artigo 35.4 da Lei xeral tributaria, que insten ou soliciten, ou no interese da cal redunde, a tramitación do documento ou expediente de que se trate.

Responderán solidariamente das obrigas tributarias do suxeito pasivo as persoas físicas ou xurídicas a que se refiren os artigos 41 e 43 da Lei xeral tributaria.

Serán responsables subsidiarios as persoas administradoras das sociedades e as que asuman as tarefas de sindicación, intervención ou liquidación de quebras, concursos, sociedades e entidades en xeral, nos supostos e co alcance que sinala o artigo 40 da Lei xeral tributaria.

a) A cota tributaria consistirá nunha cantidade fixa, sinalada en función da natureza dos documentos ou expedientes a tramitar, de acordo coa seguinte tarifa:

b) As anteriores tarifas actualizaranse anualmente e de forma automática segundo o índice de prezos ó consumo (IPC) publicado polo Instituto Nacional de Estatística.

Non serán aplicables outros beneficios fiscais que os que expresamente prevexan as normas con rango de lei e os derivados da aplicación de tratados internacionais.

Xerarase a taxa, e nace a obriga de pagamento no momento en que se presente a solicitude que inicie a tramitación dos expedientes e documentos suxeitos á taxa. No caso de iniciación de oficio, a taxa xerarase no momento da expedición do documento, ou do inicio da tramitación do expediente de que se trate.

1. A taxa esixirase en réxime de autoliquidación, segundo o modelo aprobado polo Concello, abonándose directamente na administración nos supostos dos epígrafes 1, 2, 3 e 6. No caso dos epígrafes 4 e 5 tramitarase o pago da taxa mediante transferencia bancaria e entrega posterior do xustificante da mesma. Todos os xustificantes integrarán o rexistro de solicitudes.

2. Nos casos de expedientes iniciados ou documentos expedidos de oficio, esixirase no momento da notificación ou entrega da documentación á persoa interesada. Ningunha actuación do Concello pola que se xere a presente taxa xerará ningún efecto mentres non se realizara o abono correspondente.

3. As solicitudes recibidas polos medios sinalados nos epígrafes b), c), d) e e) do apartado 4 do artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común, nas que non se xustifique o pagamento da presente taxa, serán admitidas provisionalmente, pero non poderá dárselles curso sen que se emende esa deficiencia. A tal finalidade, requirirase á persoa interesada para que, no prazo de dez días, aboe a cota correspondente, coa indicación de que, en caso de non o facer, se lle terá por desistido na súa petición, arquivándose sen máis trámite, de conformidade co establecido no artigo 71.1 da referida Lei 30/1992.

En todo o relativo á cualificación de infraccións tributarias, así como ás sancións que a estas correspondan en cada caso, estarase ao disposto nos artigos 178 e seguintes da Lei xeral tributaria.

A presente ordenanza fiscal entrará en vigor o día seguinte da súa publicación no Boletín Oficial da Provincia.